ሉቃሳ 11:11-40 in Gofa

¹¹ «ሂንቴኖ፥ ኣዋቶ ሂንቴ ጊዶፌ ናዒ ኡይꬂ ዎሲን ሹቹ ኢሜይ ኦኔ? ሞሎ ዎሲን ሾሺ ኢሜይ ኦኔ?

¹² ዎይኮ ጱጱሌ ዎሲኮ ኮርኔ ኢሚ?

¹³ ሂንቴ ኢታታ ጊዲሼ ሂንቴ ናይታስ ሎዖባ ኢሞ ኤሪኮ፥ ሳሎን ዴዒያ ሂንቴ ኣዋይ ዎሴይሳታስ ጌሻ ኣያና ዋቲ ኣꬂ ኢሜኔ?» ያጊስ።

¹⁴ ኢሲ ጋላስ ዬሱሲ ዶና ሙሚሲዳ ቱና ኣያና ኢሲ ኡራፔ ኬሲስ። ቱና ኣያናይ ኬዪዳ ሜላ ሙሜ ኡራይ ኦዴቲስ። ኣሳይካ ማላሌቲስ።

¹⁵ ሺን ኢሶቲ ኢሶቲ፥ «ቱና ኣያና ሃላቃ፥ ቢዔልዜቡላ ዎልቃን ቱና ኣያናታ ኬሴስ» ያጊዶሶና።

¹⁶ ሃራቲ ቃሲ ፓጬስ ሳሎፔ ማላ ቤሳና ሜላ ኮዪዶሶና።

¹⁷ ሺን ዬሱሲ ኤንታ ቆፋ ኤሪዲ ኤንታኮ፥ «ዎሊ ጊዶን ሻኬቲያ ካዎቴꬂ ኡባይ ꬋዬስ፤ ዎሊ ጊዶን ሻኬቲያ ኬꬂ ኩንዴስ።

¹⁸ ፃላሄይ ዎሊ ጊዶን ሻኬቲኮ ኢያ ካዎቴꬃይ ዋኒዲ ሚኒዲ ኤቃኔ? ሂንቴ ታና፥ ‹ኢ ቱና ኣያናታ ቢዔልዜቡላ ዎልቃን ኬሴስ› ያጌታ።

¹⁹ ሂዛ፥ ታኒ ቱና ኣያና ቢዔልዜቡላ ዎልቃን ኬሲያባ ጊዲኮ ሂንቴ ናይቲ ኦዴ ዎልቃን ኬሶናሻ? ሄሳ ጊሾ፥ ኤንቲ ሂንቴ ቦላ ፒርዴይሳታ ጊዳና።

²⁰ ሺን ታኒ ቱና ኣያናታ ፆሳ ቢራꬌን ኬሲያባ ጊዲኮ ሂዛ ፆሳ ካዎቴꬃይ ሂንቴኮ ማቲዳይሳ ኤሪቴ።

²¹ «ሚኖ ኣሲ ዳንጬቲዲ ባ ኬꬃ ናጊያባ ጊዲኮ፥ ኢያ ሻሎይ ቦሼቴና።

²² ሃኖሺን፥ ኢያፔ ኣꬊ ሚኖ ጊዲዳ ኣሲ ዪዲ፥ ኢያ ቆሂዲ ፆኒኮ ኣማኔቲዲ ዳንጪዳ ዳንጩዋ ቢሊሲዲ፥ ኢያ ሻሉዋ ቦንቂዲ ሃራስ ሻኬስ።

²³ «ታራ ጊዶናይሲ ታና ኢፄስ፤ ታራ ሺሾናይሲካ ላሌስ።

²⁴ «ቱና ኣያናይ ኣሳፔ ኬዪዳ ዎዴ ሼምፒያሶ ኮዪዲ ሃꬂ ባይናሶራ ዩዬስ። ሼምፒያሶ ꬋዪዳ ዎዴ ‹ታ ኬዪዳሱዋ ሲማና› ያጌስ።

²⁵ ኢ ሲሚያ ዎዴ ኬꬃይ ፒቴቲዲ ሎዒዲ ዴዒሺን ዴሚስ።

²⁶ ሄሳፌ ጉዬ፥ ቢዲ ኢያፔ ኣꬊዲ ኢቲዳ ሃራ ላፑን ቱና ኣያናታ ኤኪዲ ዬስ። ኢያን ጌሊዲ ዱሱ ኦይኬስ። ሄ ኡራስ ኮይሮይሳፌ ጉዬይሲ ኣꬊዲ ኢታ ጊዴስ» ያጊስ።

²⁷ ዬሱሲ ሄሳ ኦዳ ቦላ ዴዒሺን ኢሲ ማጫሲ ኣሳ ጋꬃፌ ዴንዳዳ፥ ባ ቃላ ꬎቁ ኦꬃዳ፥ «ኔና ቶኪዳ ኡሎይኔ ኔኒ ꬋሚዳ ꬋንꬃቲ ኣንጄቲዶሶና» ያጋሱ።

²⁸ ሺን ኢ፥ «ኣንጄቲዳይሳቲ ፆሳ ቃላ ሲዒዲ ኪቴቴይሳታ» ያጊስ።

²⁹ ዳሮ ኣሳይ ሺቂዳ ዎዴ ዬሱሲ፥ «ሃ ዬሌቴꬃይ ኢታ፤ ኦራꬃ ማላ ኮዬስ። ሺን ዮናሳ ማላታፔ ኣቲን ሃሪ ኤንታው ኢሜቴና።

³⁰ ዮናሲ ናናዌ ኣሳስ ማላ ጊዲዳ ሜላ ኣሳ ናዓይካ ሃ ዬሌቴꬃስ ማላ ጊዳና።

³¹ ዱጌሃ ካዊያ ፒርዳ ጋላስ ሃ ዬሌቴꬃራ ዴንዳዳ ፒርዳና። ጋሶይካ፥ ኢያ ሶሎሞኔ ጪንጫቴꬃ ሲዓናው ቢታ ጋፃፔ ዴንዳዳ ያሱ። ሄኮ ሶሎሞኔፔ ኣꬌይሲ ሃይሳን ዴዔስ

³² ናናዌ ኣሳቲ ፒርዳ ጋላስ ሃ ዬሌቴꬃራ ዴንዲዲ ኤንታ ቦላ ፒርዳና። ጋሶይካ ዮናሳ ሲብካቲያን ማሮታ ጌሊዶሶና። ሄኮ፥ ዮናሳፔ ኣꬌይ ሃይሳን ዴዔስ» ያጊስ።

³³ «ፆምፔ ፆምፒዲ ቆሳ ቤሳን ዎይኮ ኦቶ ጊዶን ዎꬂያ ኣሲ ዴና። ኣሲ ፖዑዋ ቤዓና ሜላ ꬎቃ ቤሳን ዎꬄስ።

³⁴ ኔ ኣሳቴꬃስ ፖዖይ ኔ ኣይፊያ። ኔ ኣይፌይ ሎዖ ጊዲኮ፥ ኔ ኩሜꬃ ኣሳቴꬃይ ፖዔስ። ኔና ኣይፌይ ሳኪኮ ኔ ኣሳቴꬃይ ኡባይ ꬉሜስ።

³⁵ ሄሳ ጊሾ፥ ኔ ጋርሳን ዴዒያ ፖዖይ ꬉሞና ሜላ ናጌታ።

³⁶ ሂዛ፥ ኔ ኩሜꬃ ኣሳቴꬃይ ፖዖ ጊዲኮ፥ ኔ ኣሳቴꬃንካ ሃሪ ꬉማ ቤሲ ꬋዪኮ፥ ኔ ኣሳቴꬃ ኩሜꬃይ ዎሊሌ ፖዖ ሜላ ጊዴስ» ያጊስ።

³⁷ ዬሱሲ ባ ኦዳ ኦንጊዳ ሜላ ኢሲ ፋሪሳዌይ ባራ ካꬂ ማና ሜላ ፄጊስ። ኢ ኢያራ ኢሲፌ ጌሊዲ ጊቢራ ቦላ ኡቲስ።

³⁸ ፋሪሳዌይ ዬሱሲ ካꬂ ማናፔ ሲንꬄ ኩሼ ሜጮናይሳ ቤዒዲ ማላሌቲስ።

³⁹ ጎዳይ ኢያኮ፥ «ሂንቴ ፋሪሳዌቲ ቁሊያኔ ሻቲያ ቦላ ባጋ ሜጬታ። ሺን ሂንቴ ጋꬃይ ኡዜቴꬃኒኔ ኢታቴꬃን ኩሚስ።

⁴⁰ ሂንቴኖ፥ ኤያቶ፥ ካሬ ባጋ ሜꬊዳይሲ ጋꬃ ሜꬊዳይ ኢያ ጊዴኔዬ?

¹¹ “Hinttenoo, aawato hintte giddofe na7i uythi woossin shuchchu immey oonee? Molo woossin shooshi immey oonee?

¹² Woykko phuuphphulle woossiko kornne immi?

¹³ Hintte iitata gidishe hintte naytas lo77obaa immo erikko, salon de7iya hintte aaway woosseyssatas Geeshsha Ayyaana waati aathi immenne?” yaagis.

¹⁴ Issi gallas Yesuusi doona muumisida tuna ayyaanaa issi uraappe kessis. Tuna ayyaanay keyida mela muume uray odettis. Asaykka malaalettis.

¹⁵ Shin issoti issoti, “Tuna ayyaanaa halaqaa, Bi7elzebuula wolqqan tuna ayyaanata kessees” yaagidosona.

¹⁶ Harati qassi paaces saloppe malla bessana mela koyidosona.

¹⁷ Shin Yesuusi entta qofaa eridi enttako, “Woli giddon shaakettiya kawotethi ubbay dhayees; woli giddon shaakettiya keethi kunddees.

¹⁸ Xalahey woli giddon shaakettiko iya kawotethay waanidi minnidi eqqanee? Hintte tana, ‘I tuna ayyaanata Bi7elzebuula wolqqan kessees’ yaageta.

¹⁹ Hiza, taani tuna ayyaanaa Bi7elzebuula wolqqan kessiyabaa gidikko hintte nayti oodde wolqqan kessonashsha? Hessa gisho, entti hintte bolla pirddeyssata gidana.

²⁰ Shin taani tuna ayyaanata Xoossaa biradhdhen kessiyabaa gidikko hiza Xoossaa kawotethay hintteko matidayssa erite.

²¹ “Mino asi danccettidi ba keethaa naagiyabaa gidikko, iya shaloy boshettenna.

²² Hanoshin, iyappe aadhdhi mino gidida asi yidi, iya qohidi xoonikko ammanettidi danccida danccuwa bilisidi, iya shaluwa bonqqidi haraas shaakkees.

²³ “Taara gidonnayssi tana ixxees; taara shiishonnaysika laallees.

²⁴ “Tuna ayyaanay asappe keyida wode shemppiyaso koyidi haathi baynnasoora yuuyees. Shemppiyaso dhayida wode ‘Ta keyidasuwa simmana’ yaagees.

²⁵ I simmiya wode keethay pitettidi lo77idi de7ishin demmis.

²⁶ Hessafe guye, bidi iyappe aadhdhidi iitida haraa laappun tuna ayyaanata ekkidi yees. Iyan gelidi duussu oykkees. He uraas koyroyssafe guyeyssi aadhdhidi iita gidees” yaagis.

²⁷ Yesuusi hessa oda bolla de7ishin issi maccasi asaa gaathafe denddada, ba qaala dhoqqu oothada, “Nena tookkida uloynne neeni dhammida dhanthati anjjettidosona” yaagasu.

²⁸ Shin I, “Anjjettidayssati Xoossaa qaala si7idi kiitetteyssata” yaagis.

²⁹ Daro asay shiiqida wode Yesuusi, “Ha yeletethay iita; ooratha malla koyees. Shin Yoonasa malaatappe attin hari enttaw imettena.

³⁰ Yoonasi Nanawe asaas malla gidida mela Asa Na7aykka ha yeletethaas malla gidana.

³¹ Dugeha kawiya pirdda gallas ha yeletethaara denddada pirddana. Gaasoykka, iya Solomone cinccatethaa si7anaw biitta gaxappe denddada yasu. Hekko Solomoneppe aadhdheyssi hayssan de7ees

³² Nanawe asati pirdda gallas ha yeletethaara denddidi entta bolla pirddana. Gaasoykka Yoonasa sibkkatiyan maarota gelidosona. Hekko, Yoonasappe aadhdhey hayssan de7ees” yaagis.

³³ “Xomppe xomppidi qosa bessan woykko oto giddon wothiya asi deenna. Asi poo7uwa be7ana mela dhoqqa bessan wothees.

³⁴ Ne asatethaas poo7oy ne ayfiyaa. Ne ayfey lo77o gidikko, ne kumetha asatethay poo7ees. Nena ayfey sakkiko ne asatethay ubbay dhumees.

³⁵ Hessa gisho, ne garssan de7iya poo7oy dhumonna mela naageeta.

³⁶ Hiza, ne kumetha asatethay poo7o gidikko, ne asatethankka hari dhuma bessi dhayikko, ne asatetha kumethay wolile poo7o mela gidees” yaagis.

³⁷ Yesuusi ba oda onggida mela issi Farisaawey baara kathi maana mela xeegis. I iyara issife gelidi gibira bolla uttis.

³⁸ Farisaawey Yesuusi kathi maanappe sinthe kushe meecconayssa be7idi malaalettis.

³⁹ Goday iyaakko, “Hintte Farisaaweti quuliyanne shaatiya bolla bagga meecetta. Shin hintte gaathay uuzetethaninne iitatethan kumis.

⁴⁰ Hinttenoo, eeyato, kare baggaa medhdhidayssi gaatha medhdhiday iya gidenneyye?