3 na Zhuwaana muukha wa Kuuza, nsatoro wa Herooti, Suzaana na aakha akinoko aari ontthanttaaye Yinsa na vitthu zaya vamote na anakhiyoni awe.
4 Phantte za waatta za miti aari otawo atthu enkeene oteela okutthanana Yinsa. Aphano ye khulupa nlikaniso mmote araka:
5 “Aarivo namazala mmote aalawiiye ozala peewu zawe. Amwazaka, kinoko khukwela nshini wa tarikhi, khuluwatthiwa na khujiwa pi anyannyi.
6 Peewu kinoko khukwela vahali aariivo mawe, khoottha ila khuuma mwaasa woohiivo maati.
7 Peewu kinoko khukwela vanyiiwa, khuwula vamote na nyiiwa, khurapeliwa pi nyiiwa khufwa.
8 Ila peewu kinoko khukwela vanshaka wooshapweya, khuwula khwiima mishumo miiya wakhula peewu.” Alupiyeevo toole, ye khukhuwelela araka: “Ariina mashiilo ti asiile!”
9 Anakhiyoni awe khumuuzela maana a nlikaniso aya opule.
10 Yinsa khuwaajipu yoori: “Mweeyo mwenkhiwa ojuwa zootikinisa zoofwalume wa Nnyizinku, ila akinoko anuuzaniwa nlikaniso yoori oonaka ahisala ajuwa, asiilaka ehisala eweeleya.”
11 Maana a nlikaniso opu pi toono: peewu eti enthoonyeza nttakhuzi la Nnyizinku.
12 Peewu zaakweliiye ntarikhi, zinlikanisaniwa atthu apale ansiilaaye nttakhuzi la Nnyizinku ila sheethwani khulazavo varoho vaya nttakhuzi ntthile yoori ahaamini apattha wuusurukha.
13 Peewu epi zaakweliiye vamawe, zinlikanisaniwa atthu apale ansiilaaye nttakhuzi la Nnyizinku khupokherela na furaha. Ila mwaasa woohiina mitathaari, wakathi vattitthiiru nawootootiwa ti sheethwani anlikha waamini waya.
14 Peewu epi zaakweliiye vanyiiwa, zinlikanisaniwa atthu apale ansiilaaye nttakhuzi la Nnyizinku, ila mwaasa wooshukulikhela opattha tuvela na haali za meekhazi, yo waamini waya vattiitthi-vattiitthi onzima, ahifiyelelaka wiima mishumo.
15 Peewu epi zaakweliiye vanshaka wooshapweya, zinlikanisaniwa atthu apale ansiilaaye nttakhuzi la Nnyizinku khuthokorela nroho mwaya khushututela na khwiiyana niiya, apo aniima mishumo zooshapweya.
16 Khaavo ankhozaaye khantteya khufinikha na enyipo wala khupweha nlivuku. Entthiiwa vahali onooneyaavo yoori esala ewaamwasikhela apale anviraaye nnyupa.
17 Khayiivo envithiwaaye ehinttelaaye osaruwela oje, zooshi epile za siiri enttela wiiya payana.
18 Apho mwiyane ophoole wa nanna yoosiila, otule ariina ontta weekezeliwa, ila otule ahina hatha na etile anuupuwelelaaye wiiyana ontta onyakanyiwa.
