12 Peewu zaakweliiye ntarikhi, zinlikanisaniwa atthu apale ansiilaaye nttakhuzi la Nnyizinku ila sheethwani khulazavo varoho vaya nttakhuzi ntthile yoori ahaamini apattha wuusurukha.
13 Peewu epi zaakweliiye vamawe, zinlikanisaniwa atthu apale ansiilaaye nttakhuzi la Nnyizinku khupokherela na furaha. Ila mwaasa woohiina mitathaari, wakathi vattitthiiru nawootootiwa ti sheethwani anlikha waamini waya.
14 Peewu epi zaakweliiye vanyiiwa, zinlikanisaniwa atthu apale ansiilaaye nttakhuzi la Nnyizinku, ila mwaasa wooshukulikhela opattha tuvela na haali za meekhazi, yo waamini waya vattiitthi-vattiitthi onzima, ahifiyelelaka wiima mishumo.
15 Peewu epi zaakweliiye vanshaka wooshapweya, zinlikanisaniwa atthu apale ansiilaaye nttakhuzi la Nnyizinku khuthokorela nroho mwaya khushututela na khwiiyana niiya, apo aniima mishumo zooshapweya.
16 Khaavo ankhozaaye khantteya khufinikha na enyipo wala khupweha nlivuku. Entthiiwa vahali onooneyaavo yoori esala ewaamwasikhela apale anviraaye nnyupa.
17 Khayiivo envithiwaaye ehinttelaaye osaruwela oje, zooshi epile za siiri enttela wiiya payana.
18 Apho mwiyane ophoole wa nanna yoosiila, otule ariina ontta weekezeliwa, ila otule ahina hatha na etile anuupuwelelaaye wiiyana ontta onyakanyiwa.
19 Mamaawe na attwiize Yinsa khulankha yoori amoone, ila khuhisala ewaheya mwaasa yoori aarivo atthu a waatta.
20 Khuuziwa Yinsa yoori: “Vaje apho atavo mamaawo na attwiizo.”
21 Ye khuwaajipu araka: “Maama na attwiizaku pi apale ansiilaaye Nttakhuzi la Nnyizinku khushututela.”
22 Siikhu moote, Yinsa khuwooza anakhiyoni awe yoori: “Olawa neette phantte ya kaapu kinoko.” Khupakhira nkalawa khusala alawa.
23 Aphano eettaka olawa Yinsa khusala alala, khupuwa pheevo ya waatta kalawa khusala esaleela ozama.
24 Anakhiyoni apale khoova khusala anlansa Yinsa araka: “Mwanliimu, Mwanliimu nasaleela ozama!” Yinsa khulankha khunyamaza pheevo na mawipi, khupuwa nreke.
25 Nawiisha khuwoozela anakhiyoni awe yoori: “Waamini wenu ori vayi?” Yo khwiiya awoova na ooshanka khusala oozelana, araka: “Otu aya paani anrumaaye pheevo na mawipi khunshututela?”
26 Yinsa na anakhiyoni awe khulankha khulokhela Keraaza, kaapu ya Kalileya.
27 Wakathi Yinsa apakhuwiweevo nkalawa, khuta nlume mmote wa sitati ethiitile aariina masheethwani a waatta. Ye eekhaliye siikhu za waatta ahiwalaka kuwo na ahiikhalaka vaje, aari wiikhala mvilalo.
28 N'oomoona Yinsa khunyakula, khunkokhorela khukhuwa araka: “Onkitakhela-ni, Yinsa mwaana wa Nnyizinku Nwulu wa Pinkuuni? Safwatali ohikihukhumu.”
29 Ye aalupiye mattakhuzi apa mwaasa yoori Yinsa aarumiye onsaruwa masheethwani. Masheethwani apale eekhaliye siikhu za waatta mmwiili wa nlume otule. Na afukaniwaavo makwinjili khwinkhiwa atthu oomweekesela, eetta ottumulaka n'oothuuliwa pi masheethwani n'onlawana makuluttu.
30 Aphano Yinsa khumuuzela yoori: “Weeyo nzina lawo o paani?” Ye khujipu yoori: “Miiyo nzina laka ki omathi,” mwaasa yoori ntthu otule aamweettiye masheethwani a waatta mmwiili mwawe.
31 Masheethwani apale khusala anvekela Yinsa yoori ahiikarele khilintti.
32 Liphanko liwululene la kuluwe laari oshukisiwa vamwaako, masheethwani apale khunvekela ruhusa Yinsa yoori eette nkuluwe, ye khukhupalela.
33 Wakathi aliiyeemo masheethwani apale mmwiili wa nlume otule khweetta nkuluwe, aphano kuluwe khusala zitthira ziishukhela vantthatta khutupweela.
34 Apale aari oshukisaaye kuluwe epile nawoona vitthu epile zaarettikhaniyeezo, khutthira khulawa khulupa hapari epile nsitati mphule na miti mikinoko zaya.
35 Khulawa atthu a waatta olawa woona vitthu epile zaarettikhaniyeezo. Wakathi amwaattamiyeeyo Yinsa, khumoona nlume otule ansaruwiyeeyo masheethwani eekhaliye nshini wa moolu a Yinsa awaliye kuwo zawe na atthiiyemo akhili zawe, yo khwiiya awoova.
36 Apale ooniiyeeyo, khulawa khuwooza atthu nanna aavonisiweezo nlume otule.
37 Aphano atthu ooshi apale a nti opule wa Keraaza khunvekela Yinsa yoori aleemo mmuti mwaya mwaasa wa woova channu, Ye khuwela nkalawa khulaawo.
38 Nlume otule ansaruwiyeeyo masheethwani khusala anvekela Yinsa amuuzaka yoori anlikhe alawe vamote na-ye. Ila Yinsa khumuuza olawa araka:
39 “Orutele owawo wawooze atthu etile Nnyizinku ooretteliyeeyo.” Nlume otule khulankha khusala alawa owawe alaleyaka sitati yooshi etile aaretteliweeyo ti Yinsa.
40 Wakathi Yinsa arutiyeevo, khuntti khuluyeene ya atthu ooshi atthaapale aari onwejaaye khumpokherela na furaha.
