19 Dhali awaambuhany ’kwani ŋap̱ki a’di mo mmota a’di is ki me’d mo haali/ mom’bi’th yaki’d mo ’peni a’di mo dhali a’di wac̱ki uni ’baar mo be.
20 Dhali a’di ’de’kki em piti ki mis mo ap̱o/ imanciḵ a’di gwo mo dhali o gwo mo ki: Mom’bor mii gom um gun hatha’ko’d mo haali/ ’peŋkuman bampam bum jin tana um mo tani a’di ta ji ma Arumgimis mo be.
21 Mom’bor mii gom um gun ’kosha ṯe/ shwane/ mo haali/ um minu kap̱ mo be. Mom’bor mii gom um gun gwokin mo shwane/ haali/ um mini p̱e’th mo be.
22 Mom’bor mii gom um ki ’kwani shi/i um i e mo dhali ki uni mini ḵwa’th um mo dhali waḵ um mo dhali ṯa’k gway bum mo me’d tonthus gom gway gi Ya/ gi ’Kwani mo.
23 ’Kunyi bwa mo ma ka tee c̱aan mo dhali iiyi i mis mo gom bwam ’borga/ mo haali/ hili mo mo ma, adhan tom bum kun ish ḵumma/ mo tani uni ’kon mo e momis mo be, haali/ wakan miikina ibabam buni mo gom imanc̱i gwo ma Arumgimis kadhamo/ mo be.
24 Hili wayyi e um mo kun ta pa ki pa mo haali/ um bu’thki momalas bum mo.
25 Wayyi e um kun ’tu’du/ mo shwane/ haali/ um mina ṯe/ i’kosh mo. Wayyi e um mo kun p̱e’thkin mo shwane/ haali/ um mini ko mo ki kony jabu’th mo mmomiiya c̱inthar mo.
26 Wayyi e um mo, ka ris ’kwani ’baar mo mini o gwom ’boro’d gom um mo haali/ wakan miikina ibabam buni mo si’da/ gom imanc̱i gwonthus mo be.
27 Hili aha/ ona um gwo mo um gun ciḵ gwo mo ki: Eni uni gwansan kun ta ’kup̱ ki um mo ma. Miiyi ki ’bore/ gom uni gwansan kun shi/i um i e mo.
28 ’Bori uni gwansan mii mo ma kun jee um mo. ’Thoyi gom uni gwansan kun sorki um mo ma.
29 E a’di jin dori /e mo e ’peshe/ mo tani ṯu’kki a’di ’pesheŋ kamu/ si’da/ mo, dhali ’peni a’di jin gu /e burrinyem p̱o/ mo tani dhalku/ ki non a’di ki burrinyem bwaman si’da/ mo.
30 C̱ika ris ’kwani ’baar mo ka ’deṯe/ ’deṯe/ to mo ma kun doṯki to ’peni /e mo dhali ’peni a’di jin ḵalki tom pini mo tani dhalku/ ki doṯ uni ka nyaŋ’ko’d mo doḵ/e.
31 Dhali me’d jin ona bwa um mo jin mina ’kwani mii to ki ’bore/ gom um mo tani, miiyi a’di wakan si’da/ mo ma gom uni mo.
32 Waḵki/ um eni uni gwansan kun eni um mo tani um minu o gwo maŋ kata mo ’te/? Haali/ me’d uni gwansan kun miiki miinthus mo tani uni enki uni gwansan kun enki uni mo be.
33 Dhali waḵki/ um miin ki ’bore/ gom uni gwansan kun mii ki ’bore/ gom um mo tani um minu o gwo maŋ kata mo ’te/? Haali/ me’d imanmii miinthus mo uni mii a’di jin nyaḵka’d kan mo be.
34 Dhali waḵki/ um wan to e ki ’kwani gwansan mo tani ’peni uni kun tana uma ’teŋ kap̱e/ mo mmobu’th to mo tani um minu o gwo maŋ kata mo ’te/? Me’d imanmii miinthus mo uni wanki to e ki imanmii miinthus mo tani uni ki bu’th a’di jin nyaḵa she/ kan doḵ/e mo.
35 Hili eni uni gwansan kun ta ’kup̱ ki um mo ma dhali miiyi ki ’bore/ gom uni mo dhali wani to e mo mmo’koki c̱or toŋ kamu/ mmodoḵu/ um ka nyaŋ’ko’d mo, dhali tom bum kun ish ḵumma/ mini eḵa/ eḵ mo dhali um mini ta iya/ gi a’di jin Cayaa/ e ki Ca mo, haali/ a’di mii’d ki mo/en gom uni gwansan kun dar ga nynyc̱a/ mo dhali kun tana ham ’kus ka ham ’kus mo.
36 Wari ki imanmiimii mo ma, me’da Babam bum a’di ta’da manmiimii mo be.
37 Dhalku/ ki c̱iŋitha c̱iŋi’th mo ma dhali um minu ’koki c̱iŋi’th si’da/ mo. Dhalka waḵ ki waḵ mo ma dhali um minu ’koki waḵ mo be. Dhalki markin ’kwani ’pen mo ma dhali um minu dhal markin ’pen mo be.
38 C̱iyi to mo ma dhali a’di minu c̱i um mo be, tombar tom ’boro’d jin shomu is mo tani uni shekemkini monṯal ’de/ mo mmo’tu’d mo mmogac̱a ’cesh mo dhali uni minu dhu ’ko’da ’dup̱un bum mo. Haali/ to jin bara um mmoc̱i mo tani mini ta tom bum kun baru um ka nyaŋ’ko’d mo be.
39 A’di si’da/ ki ṯor uni gwo ki gwom ’bi’th/e mo mmo/o gwo mo ki: Mina wathiny ja’da/ mish sus wathiny ja’da/ mo ’taa? Mina uni su/ ’koki ṯa’k mo e bwany jis mo ’taa?
40 Amanciḵ gwo yisa ica’d ka manṯor a’di gwo mo yisa hili aris ’kwani ’baar mo ka ’deṯe/ ’deṯe/ ki uni bu’thki gwonṯori ’baar mo tani uni mina e wa ka manṯor uni gwo mo be.
41 Atinta ihilkina /e businyan to i e ma kam pini mo, ihili /e diki hil aḵa’dum jin di’d e em piniŋ gana/ mo?
42 Walla atinta imina /e i/owa kan gwo mo ki: Akam pema, dhalki aha/ guna /e businyan to c̱aan jin di /e i e mo? ki /e ki is pini diki hila ḵa’dum c̱aan jin di /e i em piniŋ gana/ mo. /e he’k e yan, /e mini mii buḵa ḵa’dum ’peni em piniŋ gana/ nṯwa/a/ mo dhali yan’ko’d /e mini mish hil mo mo ki ’bore/, mmogu businyan to c̱aan jin di’da kam pini i e mo be.
43 Haali/ cwam ’boro’da kamu/ yisa di’da jin dhothi maman kun shi/ashi/ mo, walla wakan si’da/ cwa shigga/ mol maman dho’th kun ’kunya’kuny mo be.
44 Haali/ aris cwa ’baar mo ka ’deṯe/ ’deṯe/ mo uni mishu ki maman buniŋ gana/ mo. Haali/ mamana p̱u/ ’konuki ho mo ’pena ’de/ mo walla amura’th si’da/ ’konuki ho mo ’pena buyy mo be.
45 Wathim ’boro’d jin ish to ḵumma/ jin ’boro’d eya dum piti mo tani wagaski tom ’boro’d mo dhali wathin thus jin isha tonthus ḵumma/ mo eya du mo tani a’di wagaski tonthus mo, haali/ ’peni mo jin isha to ka enthus eya du mo tani ’twa/ a’di ic̱iki gwo ka pije/ mo be.
46 Atinta yuḵa um aha/ ki Tap̱a, Tap̱a mo? dhali ’koki mii to gun ṯorka/ um mo?
47 Aris ’kwani ’baar mo ka ’deṯe/ ’deṯe/ kun iiyini aha/ mo dhali ciḵ gwom pem mo dhali mii uni mo tani aha/ mina ṯor um gwo a’di jin wana e cikise/ mo be.
