LUUG 1:48-77 in Wolof

⁴⁸ ndaxte fàttaliku na ma, man jaamam bu woyof bi. Gannaaw-si-tey, niti jamono yépp dinañu ma wooye ki ñu barkeel,

⁴⁹ ndaxte Ku Màgg ki defal na ma lu réy. Turam dafa sell.

⁵⁰ Day wàcce yërmandeem ci ñi ko ragal, ci seeni sët ba ci seeni sëtaat.

⁵¹ Wone na jëf yu mag ci dooley loxoom, te tas mbooloom ñiy réy-réylu,

⁵² daaneel boroom doole yi ci seen nguur, yékkati baadoolo yi.

⁵³ Ñi xiif, reggal na leen ak ñam wu neex, te dàq boroom alal yi, ñu daw ak loxoy neen.

⁵⁴ Wallu na bànni Israyil giy jaamam, di fàttaliku yërmandeem,

⁵⁵ ni mu ko dige woon sunuy maam, jëmale ko ci Ibraayma ak askanam ba fàww.»

⁵⁶ Noonu Maryaama toog fa Elisabet lu wara tollook ñetti weer, sooga ñibbi.

⁵⁷ Gannaaw loolu jamono ji Elisabet wara mucc agsi, mu daldi jur doom ju góor.

⁵⁸ Dëkkandoom yi ak bokkam yi yég ne, Boroom bi won na ko yërmande ju réy, ñu ànd ak moom bég.

⁵⁹ Bi bés ba délsee, ñu ñëw xarafalsi xale ba, bëgg koo dippee baayam Sakari.

⁶⁰ Waaye yaayam ne leen: «Déedéet, Yaxya lay tudd.»

⁶¹ Ñu ne ko: «Amoo menn mbokk mu tudd noonu.»

⁶² Ñu daldi liyaar baayam, ngir xam nan la bëgg ñu tudde xale ba.

⁶³ Sakari laaj àlluwa, bind ci ne: «Yaxya la tudd.» Ñépp daldi waaru.

⁶⁴ Ca saa sa Yàlla dindi luu gi, Sakari daldi waxaat, di màggal Yàlla.

⁶⁵ Waa dëkk ba bépp jaaxle, xew-xew yooyu siiw ca tundi Yude yépp.

⁶⁶ Ñi dégg nettali, bi jëm ci mbir yooyu, dañu koo denc ci seen xol te naan: «Nu xale bii di mujje nag?» Ndaxte leeroon na ne dooley Boroom baa ngi ànd ak moom.

⁶⁷ Sakari baayu Yaxya daldi fees ak Xel mu Sell mi. Noonu mu wax ci kàddug Yàlla ne:

⁶⁸ «Cant ñeel na Boroom bi, Yàllay Israyil, ndaxte wallusi na mbooloom, ba jot leen!

⁶⁹ Feeñal na nu Musalkat bu am doole, bi soqikoo ci askanu Daawuda jaamam,

⁷⁰ ni mu yéglee woon bu yàgg jaarale ko ci yonentam yu sell yi.

⁷¹ Dina nu musal ci sunuy noon, jële nu ci sunu loxoy bañaale.

⁷² Yàlla wone na yërmandeem, ji mu digoon sunuy maam, te di fàttaliku kóllëre, gi mu fas ak ñoom,

⁷³ di ngiñ, li mu giñaloon sunu maam Ibraayma naan,

⁷⁴ dina nu teqale ak sunuy noon, ngir nu man koo jaamu ci jàmm,

⁷⁵ nu sell te jub ci kanamam sunu giiru dund.

⁷⁶ Yaw nag doom, dinañu lay wooye yonentu Aji Kawe ji, ndaxte dinga jiitu, di yégle ñëwug Boroom bi, di ko xàllal yoon wi.

⁷⁷ Dinga xamal mbooloom ni leen Boroom bi mana musale, jaare ko ci seen mbaalug bàkkaar,

⁴⁸ moo geesu bii jaamam bu tekkeedi, ba maasoo maas doxe fi wooye ma boroom mbég mi,

⁴⁹ nde Kiy Boroom doole moo ma defal jaloore, sellnga ñeel naw turam.

⁵⁰ «Yërmandeem a ñeel ay ragalkatam, maas ci kaw maas.

⁵¹ Dooley loxoom la defe ay jaloore, tasaare ñi jikkowoo réy-réylu,

⁵² wàccee buur yi ci seeni gàngune, yékkati baadoolo yi.

⁵³ Ñi xiif, mu reggal leen lu neex, ñi duunle, mu dàqe loxoy neen.

⁵⁴ Moo wallu bànni Israyil, jaamam, bàyyee ko xel yërmandeem,

⁵⁵ noonee mu ko dige woon sunuy maam, ñeel Ibraayma ak askanam ba fàww.»

⁵⁶ Maryaama toog na fa Elisabet lu wara tollook ñetti weer, sooga ñibbi.

⁵⁷ Gannaaw gi Elisabet dem ba àppam mat, mu mucc, am doom ju góor.

⁵⁸ Dëkkandoom yaak ay bokkam yég noonu ko Boroom bi xéewalee yërmandeem, ñu bokk ak moom mbégte ma.

⁵⁹ Ba bés ba délsee, ñu dikk xarfalsi xale ba, bëgg koo tudde Sàkkaryaa, dippee ko baayam.

⁶⁰ Yaayam nag ne leen: «Déet, Yaxya lay tudd.»

⁶¹ Ñu ne ko: «Waaye kenn ci say bokk tuddul noonu!»

⁶² Ci kaw loolu ñu liyaar baayam, ngir xam nu mu bëgg ñu tudde xale bi.

⁶³ Sàkkaryaa laaj àlluwa, ñu jox ko, mu bind ci: «Yaxya mooy turam.» Ñépp waaru.

⁶⁴ Ca saa sa gémmiñ ga ubbiku, làmmiñ wa nangu, muy wax, daldi sant Yàlla.

⁶⁵ Ba loolu amee tiitaange dikkal mboolem ña leen séq, mbir moomu mépp nag doon waxtaan ca diiwaanu tundi Yude gépp.

⁶⁶ Ña ca dégg ñépp daldi bàyyi xel ca mbir ma, te naan: «Lu xale bii nara doon ëllëg?» ngir manoorey Boroom bee àndoon ak moom.

⁶⁷ Ci kaw loolu Sàkkaryaa baayu Yaxya feese Noo gu Sell gi, daldi tàmbalee biral kàddug waxyu, ne:

⁶⁸ «Cant ñeel na Boroom bi Yàllay Israyil, moo seetsi ñoñam, ba jot leen!

⁶⁹ Moo nu feeñalal Musalkat bu manoorewu, fi biir kër Daawuda jaamam ba,

⁷⁰ noonee mu ko waxe woon ca jant yu jëkk ya, yonentam yu sell ya woon jottli,

⁷¹ moo nu musal ci sunuy noon, jële nu ci sunu loxoy mboolem bañaale.

⁷² Moo jëfe yërmande ñeel sunuy maam, tey bàyyi xel kóllëreem gu sell,

⁷³ ak ngiñ la mu giñaloon sunu maam Ibraayma,

⁷⁴ ne moo nuy may nu mucce ci loxoy noon, ba man koo jaamoo xel mu dal

⁷⁵ ci biir sellnga ak njub ci kanamam, sunu giiru dund.

⁷⁶ «Ngóor si nag yaw, yonentu Aji Kawe ji lees lay wooye, nde yaay dox, jiitu Sang bi, xàllal kow yoonam,

⁷⁷ ngir yégal ñoñam ag njot guy topp seen njéggalug bàkkaar.