LUUG 1:29-61 in Wolof

²⁹ Waxi malaaka ma daldi jaaxal Maryaama, muy xalaat lu nuyoo boobu mana tekki.

³⁰ Malaaka ma ne ko: «Bul ragal dara Maryaama, ndaxte Yàlla tànn na la ci yiwam.

³¹ Dinga ëmb, jur doom ju góor; nanga ko tudde Yeesu.

³² Ku màgg lay nekki, te dinañu ko wooye Doomu Aji Kawe ji. Boroom bi Yàlla dina ko jébbal nguuru Daawuda maamam.

³³ Noonu dina yilif askanu Yanqóoba ba fàww, te nguuram du am àpp.»

³⁴ Maryaama laaj malaaka ma ne ko: «Naka la loolu mana ame? Man de, janq laa ba tey.»

³⁵ Malaaka ma ne ko: «Xel mu Sell mi dina wàcc ci yaw, te Aji Kawe ji dina la yiir ci kàttanam. Moo tax xale biy juddu dinañu ko wooye Ku sell ki, Doomu Yàlla ji.

³⁶ Elisabet sa mbokk mi it dina am doom ju góor cig màggatam. Ki ñu doon wooye ku manula am doom, mu ngi ci juróom benni weeram.

³⁷ Ndaxte dara tëwul Yàlla.»

³⁸ Maryaama ne ko: «Jaamub Boroom bi laa. Na Yàlla def ci man li nga wax.» Ci noonu malaaka ma daldi dem.

³⁹ Ci jamono jooju Maryaama jóg, gaawantu dem ci benn dëkk bu nekkoon ca tund ya ca diiwaanu Yude.

⁴⁰ Mu dugg ca kër Sakari, daldi nuyu Elisabet.

⁴¹ Naka la Elisabet dégg Maryaama di nuyoo, doomam daldi yëngatu ci biiram. Noonu Xelum Yàlla mu Sell mi daldi solu Elisabet.

⁴² Elisabet wax ca kaw ne: «Barkeel nañu la ci jigéen ñi, barkeel doom ji nga ëmb!

⁴³ Man maay kan, ba ndeyu sama Boroom ñëw di ma seetsi?

⁴⁴ Maa ngi lay wax ne naka laa la dégg ngay nuyoo rekk, sama doom ji yëngu ci sama biir ndax mbég.

⁴⁵ Barke ñeel na la, yaw mi gëm ne li la Boroom bi yégal dina mat!»

⁴⁶ Noonu Maryaama daldi ne:

⁴⁷ «Sama xol a ngi màggal Boroom bi, sama xel di bég ci Yàlla sama Musalkat,

⁴⁸ ndaxte fàttaliku na ma, man jaamam bu woyof bi. Gannaaw-si-tey, niti jamono yépp dinañu ma wooye ki ñu barkeel,

⁴⁹ ndaxte Ku Màgg ki defal na ma lu réy. Turam dafa sell.

⁵⁰ Day wàcce yërmandeem ci ñi ko ragal, ci seeni sët ba ci seeni sëtaat.

⁵¹ Wone na jëf yu mag ci dooley loxoom, te tas mbooloom ñiy réy-réylu,

⁵² daaneel boroom doole yi ci seen nguur, yékkati baadoolo yi.

⁵³ Ñi xiif, reggal na leen ak ñam wu neex, te dàq boroom alal yi, ñu daw ak loxoy neen.

⁵⁴ Wallu na bànni Israyil giy jaamam, di fàttaliku yërmandeem,

⁵⁵ ni mu ko dige woon sunuy maam, jëmale ko ci Ibraayma ak askanam ba fàww.»

⁵⁶ Noonu Maryaama toog fa Elisabet lu wara tollook ñetti weer, sooga ñibbi.

⁵⁷ Gannaaw loolu jamono ji Elisabet wara mucc agsi, mu daldi jur doom ju góor.

⁵⁸ Dëkkandoom yi ak bokkam yi yég ne, Boroom bi won na ko yërmande ju réy, ñu ànd ak moom bég.

⁵⁹ Bi bés ba délsee, ñu ñëw xarafalsi xale ba, bëgg koo dippee baayam Sakari.

⁶⁰ Waaye yaayam ne leen: «Déedéet, Yaxya lay tudd.»

⁶¹ Ñu ne ko: «Amoo menn mbokk mu tudd noonu.»

²⁹ Waxi malaaka ma nag jaaxal Maryaama, muy xalaat lu nuyoo boobu mana tekki.

³⁰ Malaaka ma ne ko: «Maryaama, bul tiit, ndax daje nga ak yiwu Yàlla.

³¹ Dinga ëmb, ba jur doom ju góor; nanga ko tudde Yeesu.

³² Ku màgg lay doon, te dees na ko wooye Doomu Aji Kawe ji. Boroom bi Yàlla moo koy jagleel nguurug Daawuda maamam.

³³ Mooy nguuru fi kaw waa kër Yanqóoba ba fàww, te nguuram du foq mukk.»

³⁴ Ci kaw loolu Maryaama laaj malaaka mi ne ko: «Nu loolu di ame, te man xawma góor?»

³⁵ Malaaka mi ne ko: «Noo gu Sell gi mooy wàccsi ci yaw, dooley Aji Kawe ji yiir la. Moo tax itam ku Sell kiy juddoo ci yaw, dees na ko wooye Doomu Yàlla.

³⁶ Te kat Elisabet sa mbokk mi itam ëmb na doom ju góor te fekk ko màggat. Ki ñu doon wooye jigéen ju jaasir, mu ngi nii ci juróom benni weeram,

³⁷ ndax Yàlla, dara tëwu ko.»

³⁸ Maryaama daldi ne: «Maa ngi, di jaamub Boroom bi. Nii nga waxe, na ame noonu ci man.» Ba loolu amee malaaka ma bàyyikoo ca moom, dem.

³⁹ Ci fan yooyu la Maryaama fabu gaaw, jëm diiwaanu tund ya, ca dëkkub Yude,

⁴⁰ ba Sàkkaryaa dëkke. Mu agsi ca kër ga, nuyu Elisabet.

⁴¹ Naka la Elisabet dégg nuyoob Maryaama, doom ja mu ëmb yëngu ca biiram. Elisabet daldi feese Noo gu Sell gi.

⁴² Mu àddu ca kaw ne: «Yaa gëna barkeel ci jigéen ñi, sa doom ji nga ëmb it barkeel na!

⁴³ Ana ku ma doon ba sama ndeyu Sang di ma seetsi?

⁴⁴ Naka la sa kàddug nuyoo tàbbi sama nopp rekk, sama doom ji yëngu ci sama biir bi ndax bég.

⁴⁵ Ndokklee yaw mi gëm ne mbir mi ñu la yégal, te mu tukkee ci Boroom bi dina sotti!»

⁴⁶ Maryaama nag ne:

⁴⁷ «Sama xol laay màggale Boroom bi, samag noo laay bége Yàlla mi may musal,

⁴⁸ moo geesu bii jaamam bu tekkeedi, ba maasoo maas doxe fi wooye ma boroom mbég mi,

⁴⁹ nde Kiy Boroom doole moo ma defal jaloore, sellnga ñeel naw turam.

⁵⁰ «Yërmandeem a ñeel ay ragalkatam, maas ci kaw maas.

⁵¹ Dooley loxoom la defe ay jaloore, tasaare ñi jikkowoo réy-réylu,

⁵² wàccee buur yi ci seeni gàngune, yékkati baadoolo yi.

⁵³ Ñi xiif, mu reggal leen lu neex, ñi duunle, mu dàqe loxoy neen.

⁵⁴ Moo wallu bànni Israyil, jaamam, bàyyee ko xel yërmandeem,

⁵⁵ noonee mu ko dige woon sunuy maam, ñeel Ibraayma ak askanam ba fàww.»

⁵⁶ Maryaama toog na fa Elisabet lu wara tollook ñetti weer, sooga ñibbi.

⁵⁷ Gannaaw gi Elisabet dem ba àppam mat, mu mucc, am doom ju góor.

⁵⁸ Dëkkandoom yaak ay bokkam yég noonu ko Boroom bi xéewalee yërmandeem, ñu bokk ak moom mbégte ma.

⁵⁹ Ba bés ba délsee, ñu dikk xarfalsi xale ba, bëgg koo tudde Sàkkaryaa, dippee ko baayam.

⁶⁰ Yaayam nag ne leen: «Déet, Yaxya lay tudd.»

⁶¹ Ñu ne ko: «Waaye kenn ci say bokk tuddul noonu!»