ሉቃሳ 8:21-48 in Gamo

²¹ ዬሱሲካ ዛሪዲ “ታ ኣያኔ ታ ኢሻቲ ፆሳ ቃላ ሲይዲ ናጊዛይታ” ጊዴስ።

²² ኢሲ ጋላስ ዬሱሲ ባና ካሊዛይታራ ዎጎሎ ጊዶ ጌሊዲ “ኣባፌ ሄ ፒንꬅ ፒኖስ” ጊዴስ።

²³ ኢስቲካ ፒኒሺን ኣባ ቦላ ዳምባላይ ዴንዲዲ ዋይሲዛ ዎዴ ዬሱሲ ꬊስኪዴስ። ሃꬃይካ ዎጎሎዛ ጊዶ ጌሊን ኣሳይ ዳሮ ሜቶቴቲዴስ።

²⁴ ዬሱሳ ካሊዛይቲ ኢዛኮ ሺቂዲ “ጎዶ! ጎዶ! ኑ ዉራና ሃኖስ” ጊዲ ዬሱሳ ꬊስኮፌ ዴንꬂዳ። ኢዚካ ቤጊዲ ጫርኮዛኔ ኣባ ዳምባላ ሴሪን ጫርኮይኔ ኣባ ዳምባላይ ጮዑ ጊዴስ።

²⁵ ኢዚካ ባና ካሊዛይታ “ኢንቴ ኣማኖይ ኣዋ ቢዴ?” ጊዴስ። ኢስቲካ ባ ጊዶን ባቢሼኔ ማላሌቲሼ “ጫርኮኔ ሃꬄ ኣዛዚዛይ፤ ኢስቲካ ኢዛስ ኣዛዜቲዛይ ኢዚ ኦኔ?” ጊዳ።

²⁶ ኢዛፔ ጉዬ ጋሊላፔ ሄ ፒንꬃን ዲዛ ጌርጌሴኖኔ ጌቴቲዛ ዴሬ ዎጎሎራ ፒኒዳ።

²⁷ ዬሱሲ ዎጎሎዛፔ ጋዴን ዎꬊዳ ዎዴ ዳይዳንꬂ ኢዛ ቦላ ዲዛ ኢሳዴይ ካታማፔ ኬዚዲ ኢዛ ዴሚዴስ። ሄ ኣዴዚ ዳሮ ዎዴ ማይዖ ማይዖንታ ካሎ ዲዛዴኔ ኬꬃን ኣቆንታ ዱፎ ባስ ኣቆሶ ኦꬂዳ ኣሳ።

²⁸ ዬሱሳ ቤዪዳ ዎዴ ዋሲሼ ዬሱሳ ሲንꬃን ኩንዲዴስ፤ ቃላ ꬎቁ ሂስቲዲ “ቦንቾ ፆሳ ና ዬሱሳ! ታሲኔ ኔስ ኣይ ጋይቶቴꬂ ዲዜ? ኔ ታና ዋይሶንታ ማላ ታ ኔና ዎሳይስ” ጊዴስ።

²⁹ ቱና ኣያናይ ሄሳ ጋናስ ዳንዳዪዳይ ኣዴዛፔ ኬዛና ማላ ዬሱሲ ኣዛዚዳ ጊሻሳ። ቱና ኣያናዚካ ዎዴን ዎዴን ዴንዲዛ ጊሽ ኣዴዚ ሳንሳላታኒኔ ቢራታን ቶሆ ቃቺ ናጊንካ ቃሼቲዳ ሳንሳላታ ዱꬄሬꬂዲ ኢዛ ቦላ ዲዛ ዳይዳንꬃይ ኢዛ ዱጌ ባዞ ዛሪ ኤፌስ።

³⁰ ዬሱሲ “ኔ ሱንꬂ ኦኔ?” ጊዲ ኦይቺዴስ፤ ኢዚካ ዳሮ ዳይዳንꬃቲ ኢዛን ጌሊዲ ዲዛ ጊሽ ታ ሱንꬂ “ሌጎኔ” ጊዴስ።

³¹ ዳይዳንꬃቲካ ባና ዉርሴꬂ ባይንዳ ጪማ ኦላን ዬጎንታ ማላ ሚንꬂዲ ዎሲዳ።

³² ሄንካ ዙማ ቦላ ዳሮ ጉዱንꬂ ሄሜቴስ፤ ዳይዳንꬃቲ “ጉዱንꬃ ዉዴዛን ጌሊቴ” ጊዲ ኣዛዛና ማላ ዎሲን ዬሱሲ “ኤሮ ጌሊቴ!” ጊዴስ።

³³ ዳይዱንꬃቲ ኣዴዛፔ ኬዚዲ ጉዱንꬃታን ጌሊዳ። ጉዱንꬃቲ ኣፎዛ ዱጉንꬃራ ቢቻርሼ ቢዲ ኣባን ጌሊዲ ኣባን ሚቴቲዳ።

³⁴ ሄሚዛይቲ ሃኒዳይሳ ቤዪዳ ዎዴ ቤሮቲ ቢዲ ካታማ ኣሳሲኔ ዴሬ ኣሳስ ዮቲዳ።

³⁵ ሃንዳይሳ ቤያና ጊዲ ኣሳይ ባ ዲዛሶፔ ዬሱሳኮ ዪዴስ። ዳይዳንꬃይ ኢዛፔ ኬዚዳ ኣዴዚካ ዎዝናይ ካሃይ ሲሚን ኣፋላ ማዒዲ ዬሱሳ ቶሆ ጊዶን ኡቲዳይሳ ቤዪዲ ባቢዳ።

³⁶ ዳይዳንꬃን ኦይኬቲዳ ኣዴዚ ፓፂሺን ቤዪዳይቲ ኢዚ ዋኒ ፓፂዳኮኔ ዴሬዛስ ዮቲዳ።

³⁷ ጌርጌሴኖኔ ማታን ዲዛ ኣሳይ ኬሂ ባቢዳ ጊሽ ዬሱሳ “ሃይሳፌ ኪቻ!” ጊዲ ዎሲዳ፤ ኢዚካ ዎጎሎዛን ጌሊዲ ሲሚ ቢዴስ።

³⁸ ዳይዳንꬃይ ኢዛፔ ኬዚዳ ኣዴዚ ዬሱሳራ ኢሲፌ ዳና ማላ ዎሲዴስ።

³⁹ ጊዶ ኣቲን ዬሱሲ ኢዛ “ኔሶ ሲማዳ ፆሲ ኔስ ኦꬂዳ ጊታ ሚሽ ዮታ” ጊዲ ሞይዚዴስ። ኣዴዚካ ዬሱሲ ኢዛስ ኦꬂዳ ጊታ ሚሽ ባ ካታማን ዲዛ ኣሳስ ኡባስ ቆንጬን ዮቲሼ ቢዴስ።

⁴⁰ ኣሳይ ዉሪ ዬሱሳ ዩሳ ናጊሼ ጋምዒዳ ጊሽ ኢዚ ሲሚሺን ኡፋይሳን ሞኪ ኤኪዳ።

⁴¹ ሄ ዎዴ ኢያዒሮሳ ጌቴቲዛ ኣይሁዳ ዎሳ ኬꬄ ሃላቃይ ዪዲ ዬሱሳ ቶሆ ቦላ ኩንዲዲ ባሶ ባና ማላ ዎሲዴስ።

⁴² ኢዚ ሄሳꬆ ኦይቺዳይ ኢዛስ ታማኔ ናምዑ ላይꬅ ኩሚዳ ኢሲ ማጫ ናይ ሳኬታዳ ሼምፖ ቦላ ዲዛ ጊሻሳ። ኢዚ ሄ ቡሳን ዲሺን ዴሬይ ዳሪዲ ባ ጊዶን ሱጌቲዲ ኢዛ ኬሂ ኡንዒሲዴስ።

⁴³ ታማኔ ናምዑ ላይꬅ ሱꬂ ኢዚፔ ጉኪሺን ዲዛ ኢሲ ማጫሳያ ባስ ዲዛ ሚሻ ዉርሳ ꬋሌ ኤሪዛ ኣሳታስ ኢማ ዉርሲን ኢዞ ፓꬃናስ ዳንዳዪዳ ኣሲ ኢሳዴይካ ባዋ።

⁴⁴ ኢዛካ ጉዬራ ሺቃዳ ዬሱሳ ኣፋላ ማጫራታ ቦቻዱስ፤ ኢዚፔ ጉኪዛ ሱꬃይ ሄራካ ኤቂ ኣጊዴስ

⁴⁵ ዬሱሲካ “ታና ቦቺዳይ ኦኔ?” ጊዴስ። ዉሪካ ኑኒ ቦቺቤኮ ጊ ካዲዳ ዎዴ ጴፅሮሲ ዛሪዲ “ጎዶ! ኣሲ ዉሪ ዩዪ ኣꬊዲ ኔና ሱጌሬꬂዲ ኡንዒሴስ” ጊዴስ።

⁴⁶ ጊዶ ኣቲን ዬሱሲ “ኣሲ ታና ቦቺዴስ፤ ዎልቃይ ታፔ ኬዚዳይሳ ታ ኤራይስ” ጊዴስ።

⁴⁷ ማጫሳያ ኤሬቶንታ ቆቴታዳ ባናስ ዳንዳዮንታይሳ ኤራዳ ኮኮራሼ ያዳ ዬሱሳ ሲንꬃን ኩንዳዱስ። ኢዛካ ዬሱሳ ዋና ቦቺዳኮኔ ቃሴካ ኤሌራ ዋና ፓፂዳኮ ኡባ ኣሳ ሲንꬃን ዮታዱስ።

⁴⁸ ኢዚካ “ታ ናዬ! ኔ ኣማኖይ ኔና ፓꬂዴስ፤ ሳሮን ባ!” ጊዴስ።

²¹ Yesusikka zaaridi “Ta aayanne ta ishati Xoossa qaala siydi naagizayta” gides.

²² Issi gallas Yesusi bana kaallizaytara wogolo giddo gelidi “Abbafe he pinth pinnoos” gides.

²³ Istika pinnishin abba bolla dambalay dendidi waayssiza wode Yesusi dhiskides. Haaththayka wogoloza giddo gelin asay daro metotettides.

²⁴ Yesusa kaallizayti izakko shiiqidi “Godo! Godo! Nu wurana hanoos” giidi Yesusa dhiskofe denthida. Izikka beeggidi carkozanne abba dambala seerin carkoynne abba dambalay co7u gides.

²⁵ Izikka bana kaallizayta “Inte ammanoy awa bidee?” gides. Istika ba giddon babbishenne malalettishe “Carkonne haaththe azazizay; istika Izas azazettizay izi oonee?” gida.

²⁶ Izappe guye Galilappe he pinthan diza Gergesenoone geetettiza dere wogolora pinnida.

²⁷ Yesusi wogolozappe gaden wodhdhida wode daydanthi iza bolla diza issadey katamappe kezidi iza demmides. He addezi daro wode may7o may7onta kallo dizaddenne keeththan aqonta duufo baas aqoso ooththida asa.

²⁸ Yesusa beyida wode waassishe Yesusa sinthan kundides; qaala dhoqu histidi “Boncho Xoossa Naa Yesusa! Taasinne nees ay gaytoteththi dizee? Ne tana waayssonta mala ta nena woossays” gides.

²⁹ Tuna ayanay hessa gaanas dandayiday addezappe kezana mala Yesusi azazida gishassa. Tuna ayanazikka woden woden dendiza gish addezi sansalataninne biratan toho qachchi naaginka qashetida sansalata duuthereththidi iza bolla diza daydanthay iza duge bazzo zaari efees.

³⁰ Yesusi “Ne sunthi oonee?” giidi oychides; izikka daro daydanthati izan gelidi diza gish ta sunthi “Leegone” gides.

³¹ Daydanthatikka bana wursethi baynda ciimma ollan yeggonta mala minthidi woossida.

³² Henka zuma bolla daro guddunthi heemettes; daydanthatti “Gudduntha wudezan gelite” giidi azazana mala woossin Yesusi “Ero gelite!” gides.

³³ Daydunthati addezappe kezidi guddunthatan gelida. Guddunthati aafoza dugunthara bicharshe biidi abban gelidi abban mitettida.

³⁴ Heemizayti hanidayssa beyida wode beerotti biidi katama asassinne dere asas yootida.

³⁵ Handayssa beyana giidi asay ba dizasoppe Yesusakko yides. Daydanthay izappe kezida addezikka woznay kahay simmin afala ma7idi Yesusa toho giddon uttidayssa beyidi babbida.

³⁶ Daydanthan oyketida addezi paxishin beyidayti izi waani paxidakkonne derezas yootida.

³⁷ Gergesenoone matan diza asay keehi babbida gish Yesusa “Hayssafe kichcha!” giidi woossida; Izikka wogolozan gelidi simmi bides.

³⁸ Daydanthay izappe kezida addezi Yesusara issife daana mala woossides.

³⁹ Gido attin Yesusi iza “Neso simmada Xoossi nees ooththida gita miish yoota” giidi moyzides. Addezikka Yesusi izas ooththida gita miish ba kataman diza asas ubbas qoncen yootishe bides.

⁴⁰ Asay wuri Yesusa yuussa naagishe gam7ida gish izi simmishin ufayssan mokki ekkida.

⁴¹ He wode Iya7iroosa geetettiza Ayhuda Woosa Keeththe halaqay yiidi Yesusa toho bolla kundidi baso baana mala woossides.

⁴² Izi hessatho oychiday izas tammanne nam7u layth kumida issi maca nay sakettada shempo bolla diza gishassa. Izi hee buussan dishin derey daridi ba giddon sugettidi iza keehi un7isides.

⁴³ Tammanne nam7u layth suuthi izippe gukkishin diza issi macasaya baas diza miisha wursa dhale eriza asatas imma wursin izo pathanas dandayida asi issadeyka baawa.

⁴⁴ Izakka guyera shiiqada Yesusa afala macarata bochchadus; izippe gukkiza suuthay heerakka eqqi aggides

⁴⁵ Yesusikka “Tana bochchiday oonee?” gides. Wurikka nuni bochchibeekko gi kadida wode Phexroosi zaaridi “Godo! Asi wuri yuuyi aadhdhidi nena suggerethidi un7isees” gides.

⁴⁶ Gido attin Yesusi “Asi tana bochchides; wolqay taappe kezidayssa ta erays” gides.

⁴⁷ Macasaya eretonta qotettada baanas dandayontayssa erada kokkorashe yaada Yesusa sinthan kundadus. Izakka Yesusa waana bochchidakkonne qasseka ellera waana paxidakko ubba asa sinthan yootadus.

⁴⁸ Izikka “Ta naye! Ne ammanoy nena pathides; saron ba!” gides.