ሉቃሳ 6:1-46 in Gamo

¹ ኢሲ ሳምባታ ጋላስ ዬሱሲ ካꬃ ጊዶራ ኣꬊ ቢሺን ኢዛ ካሊዛይቲ ቲያ ፁጲ ኤኪዲ ባ ኩሼን ሺጊቺ ሚሺን፥

² ፋርሳዌታፔ ኢሲ ኢሲ ኣሳቲ “ሳምባታ ጋላስ ኦꬃናስ ቤሶንታይሳ ኣይሲ ኦꬄቲ?” ጊዳ።

³ ዬሱሲካ ኢስታስ “ዳዉቴይ ኢዛራ ዲዛ ኣሳቲ ጋፊዳ ዎዴ ኢዚ ኦꬂዳይሳ ናባቢቤኬቲ?

⁴ ኢዚ ፆሳ ኬꬄ ጌሊዲ ቄሴቲ ፃላ ማና ማላ ኣዛዜቲዳ ዱማ ኡኬꬃ ባሲ ሚዲ ባናራ ዲዛይታስ ኢሚዴስ” ጊዲ ዛሪዴስ።

⁵ ቃሴካ ዬሱሲ “ኣሳ ናይ ሳምባታ ጎዳ” ጊዲ ኢስታስ ዮቲዴስ።

⁶ ዬሱሲካ ሃራ ሳምባታ ጋላስ ኣይሁዳ ዎሳ ኬꬄ ጌሊዲ ታማርሲሺን ኡሻቻ ኩሼይ ሲሊዳ ኢሲ ኣሲ ሄን ዴስ።

⁷ ሙሴ ዎጋ ታማርሲዛይቲኔ ፋርሳዌቲ ዬሱሳ ሞታናስ ጋሶ ኮይዲ ኣኔ ኢዚ ሳምባታ ጋላሳን ኣዴዛ ፓꬂኮ ቤያና ጊዲ ናጊሼ ጋምዒዳ።

⁸ ዬሱሲካ ኢስታ ዎዝና ቆፋ ኤሪዲ ኩሼይ ሲሊዳ ኣዴዛ ኡባ ሲንꬃን “ዴንዳ ኤቃ” ጊዴስ። ኣዴዚካ ዴንዲ ኤቂዴስ።

⁹ ዬሱሲካ ኢስታ “ታ ኢንቴና ኢሲ ሚሽ ኣኔ ኦይቻይስ፤ ሳምባታ ጋላስ ኦꬃናስ ቤሲዛይ ሎዖ ኦሶዬ? ኢታ ኦሶ? ሼምፖ ኣሾ ዎይኮ ꬋይሶ?” ጊዲ ኦይቺዴስ።

¹⁰ ቃሴካ ዬሱሲ ባ ዩሾን ዲዛ ዉርሲ ዩሺ ፄሊዳፔ ጉዬን ኣዴዛ “ኔ ኩሼ ፒዲሳ” ጊዴስ። ኣዴዚካ ዬሱሲ ጊዳ ማላ ኦꬂዴስ። ኢዛ ኩሼይካ ፓፂዴስ።

¹¹ ጊዶ ኣቲን ኣሳቲ ሃንቄቲዳ፤ ዬሱሳ ቦላ ኣይ ኦꬃናስ ኮሺዛኮኔ ባ ጊዶን ዞሬቲዳ።

¹² ሄ ጋላሳታፔ ኢሲ ጋላስ ዬሱሲ ዎሳናስ ዙማ ቦላ ኬዚዲ ቃማ ኩሜꬅ ፆሳ ዎሲሼ ኣቂዴስ።

¹³ ጋዴይ ዎንቲሺን ባና ካሊዛይታ ፄይጊዲ ኢስታፌ ታማኔ ናምዓታ ዶሪዴስ። ኢስታካ “ሃዋሬታ” ጊዲ ሱንꬂዴስ።

¹⁴ ኢስቲካ ጴፅሮሳ ጊዲ ሱንꬂዳ ሲሞናኔ ኢዛ ኢሻ ኢንዲራሳ፥ ያቆቤ፥ ዮሃኒሳ፥ ፒሊጶሳ፥ ባርቴሌሞሳ፥

¹⁵ ማቶሳ፥ ቶማሳ፥ ኢልፊዮሳ ና ያቆቤ፥ ባ ባጋስ ሚሼቲዛ ሲሞና፥

¹⁶ ያቆቤ ና ዩሁዳኔ ዬሱሳ ኣꬂ ኢሚዳ ኣስቆሮንቶ ዩሁዳ።

¹⁷ ዬሱሲካ ኢስታራ ኢሲፌ ዙማ ቦላፌ ዱጌ ዎꬊዲ ዴንባሶን ኤቂዴስ። ኢዛ ካሊዛይታፔ ዳሮ ኣሳይ ሄን ዴስ፥ ዩሁዳፔኔ ዬሩሳላሜፔ፥ ቃሴካ ፂሮሴፔኔ ሲዶና ኣባ ኣቻፌ ዪዳ ኬሂ ዳሮ ኣሳይካ ሄን ዴስ።

¹⁸ ኢስቲካ ዪዳይ ዬሱሲ ጊዛይሳ ሲያናሲኔ ሃርጌፌ ፓፃናሳ። ቱና ኣያናይካ ዋይሲዛይቲ ዉሪ ፓፂዳ።

¹⁹ ዎልቃይካ ኢዛፔ ኬዚዲ ዳሮታ ፓꬂዛ ጊሽ ኣሳይ ዉሪ ኢዛ ቦቻናስ ዪዴስ።

²⁰ ዬሱሲካ ባና ካሊዛይታስ “ፆሳ ካዎቴꬃይ ኢንቴስ ጊዲዳ ጊሽ ኢንቴኖ ማንቆቶ! ኢንቴ ኣንጄቲዳይታ፤

²¹ ኢንቴ ጉዬፔ ካላና ጊሽ ሃዒ ጋፊዛይቶ! ኢንቴ ኣንጄቲዳይታ፤ ኢንቴ ጉዬፔ ሚጫና ጊሽ ኢንቴኖ ሃዒ ዬኪዛይቶ! ኢንቴ ኣንጄቲዳይታ፤

²² ኣሳይ ታ ጊሽ ኢንቴና ኢፂሺን ባ ጊዶፌ ሻኪሺን፥ ቦርሺኒኔ ኢንቴና ኢታ ሱንꬃራ ፄይጊሺን ኢንቴ ኣንጄቲዳይታ፤

²³ “ኢንቴስ ሳሎን ጊታ ዎይቶይ ዲዛ ጊሽ ሄ ዎዴ ኡፋይሳን ጉፒቴ፤ ኣይስ ጊኮ ኢስታ ኣዋቲ ናቤታ ቦላ ሄሳꬆ ኦꬂዳ።

²⁴ ጊዶ ኣቲን ኢንቴኖ ዱሬቶ ኢንቴ ሃዒ ኡፋዬቲዳ ጊሽ ኢንቴና ኣዬ-ኣና!

²⁵ ኢንቴኖ ሃዒ ካሊዳይቶ ኢንቴና ኣዬ ኣና! ኢንቴ ጉዬፔ ጋፋና፤ ኢንቴኖ ሃዒ ሚጪዛይቶ! ኢንቴስ ኣዬ ኣና! ኢንቴ ጉዬፔ ሚሼታናኔ ዬካና።

²⁶ “ኣሲ ዉሪ ኢንቴ ጊሽ ሎዖ ሃሳዪዛ ዎዴ ኢንቴንስ ኣዬ-ኣና! ኣይስ ጊኮ ኢስታ ኣዋቲ ዎርዶ ናቤታስ ሄሳ ማላ ኦꬂዳ።

²⁷ “ጊዶ ኣቲን ታ ዮቲዛይሳ ሲዪዛይቶ ታኒ ኢንቴስ ዮቲዛይ ኢንቴ ሞርኬታ ሲቂቴ፤ ኢንቴና ኢፂዛይታስ ሎዖ ኦꬂቴ፤

²⁸ ኢንቴና ቃንጊዛይታ ኣንጂቴ፤ ኢንቴና ቆሂዛይታስ ዎሲቴ፤

²⁹ ኢሲ ሻጋላን ባቂኮ፥ ናምዓንꬆ ሻጋላ ጉጃ ቤሳ፤ ኦኒኔ ኔ ቦላራ ማይዒዳይሳ ቃሪ ኤኪኮ ጋꬃራ ማይዒዳይሳካ ዲጎፋ።

³⁰ “ኔና ዎሲዛ ኡባስ ኢማ፤ ኔ ሚሻ ኤኪዳ ኣሲ ዛሪ ኢማና ማላ ኦይቾፋ።

³¹ “ኣሲ ኢንቴስ ኦꬃና ማላ ኢንቴ ኮዪዛይሳꬆ ኢንቴካ ሃራ ኣሳስ ኦꬂቴ።

³² “ናጋራንቻቲካ ባና ሲቂዛይታ ሲቂዛ ጊሽ ኢንቴ ኢንቴና ሲቂዛይታ ፃላ ሲቂኮ ኢንቴስ ኣይ ዱማ ኣንጆይ ዲዜ?

³³ ኢንቴ ኢንቴስ ሎዖ ኦꬂዛይታስ ፃላላ ሎዖ ኦꬂኮ ኢንቴስ ኣይ ዱማ ኣንጆይ ዲዜ? ኣይሲ ጊኮ ናጋራንቻቲካ ሄሳꬆ ኦꬂዛ።

³⁴ ታልዔ ኤኪዲ ዛራና ዳንዳዬቴስ ጊዛይታስ ፃላ ኢንቴ ታልዒኮ ኢንቴ ሃራ ኣይ ዱማ ኣንጆ ዴማኔ? ኣይሲ ጊኮ ናጋራንቻቲካ ኢስቲ ታልዒዳይሳ ሲሬ ዛሪዲ ኤካናስ ናጋራንቻታስ ታልዔቴስ።

³⁵ ጊዶ ኣቲን ፆሲ ባና ጋላቶንታይታሲኔ ኢታታስ ኪያ ጊዲዳ ማላ ኢንቴ ሞርኬታ ሲቂቴ፤ ሎዖ ኦꬂቴ፤ ጉዬፔ ዛሪዲ ኤካናስ ቆፖንታ ዲሼ ታልዔ ኢሚቴ፤ ሄሳንካ ኢንቴስ ኩሼ ዛሮይ ጊታ ጊዳና፤ ቃሴካ ኢንቴ ዎጋ ፆሳ ና ጊዳና።

³⁶ ኢንቴ ኣዋይ ኪያ ጊዲዳ ማላ ኢንቴካ ኪያታ ጊዲቴ።

³⁷ “ኢንቴ ሃራታ ቦላ ፒርዶፍቴ ኢንቴ ቦላካ ፒርዴቴና፤ ኢንቴ ቦላ ፒርዳይ ዳሮንታ ማላ ሃራታ ቦላ ፒርዳ ዳርሶፍቴ፤ ኣሳስ ኣቶ ጊቴ ኢንቴስካ ኣቶ ጌቴታና።

³⁸ ኢሚቴ! ኢንቴስካ ኢሜታና፤ ኢንቴስ ኢንቴ ማኪዳ ሚሻን ሲሚዲ ማኬታና፤ ሃራፔካ ናቂ ባቄቲዲ ዪጌቲ ኩሚዲ ዎራ ጉካናሼ ሎዖ ማኪዛ ሚሻን ማኬቲዲ ኢንቴስ ኢሜታና” ጊዴስ።

³⁹ ቃሴካ ዬሱሲ ኢስታስ ሌሚሶን “ቆቄይ ቆቄ ካሌꬃናስ ዳንዳዪዜ? ካሌꬂኮካ ናምዓቲ ኢሶይ ኢሳራ ኦይኬቲዲ ኦላን ጌሌቴኔ?

⁴⁰ ታማሬይ ባና ታማርሲዛዴፌ ኣꬌና፥ ጊዶ ኣቲን ሎዔꬂ ታማሪዳ ኣሲ ዉሪ ባ ኣስታማሬ ማላ ጊዴስ።

⁴¹ “ኔ ኣይፌ ጊዶን ዲዛ ቱሳ ፄሎንታ ዳሼ ኔ ኢሻ ኣይፌ ጊዶን ዲዛ ቡራ ኣይስ ፄላይ?

⁴² ኔ ኣይፌን ዲዛ ቱሳ ቤዮንታ ኔ ኢሻ ‘ታኒ ኔ ኣይፌን ዲዛ ቡራ ኣኔ ኬሳይስ ጋናስ ዎስታ ዳንዳያይ?’ ኔኖ ቆꬌፔ ቆሞን ሃንዛይሶ ኮይሮታዳ ኔ ኣይፌን ዲዛ ቱሳ ኬሳ፤ ሄሳፌ ጉዬ ኔ ኢሻ ኣይፌን ዲዛ ቡራ ኬሳናስ ሎዔꬃ ፄላንዳሳ።

⁴³ “ሎዖ ሚꬂ ኢታ ኣይፌ ኣይፌና፤ ቃሴካ ኢታ ሚꬂ ሎዖ ኣይፌ ኣይፌና።

⁴⁴ ሚꬂ ዉሪካ ባ ኣይፌን ኣይፌን ኤሬቴስ፤ ኣጉንꬃፌ ባላሴ ጌቴቲዛ ሚꬃ ኣይፌይ ማፄቴና፤ ላዴፔ ዎይኔ ኣይፌይ ቃንፄቴና።

⁴⁵ ሎዖ ኣሲ ባ ዎዝና ኩሚዳ ሎዖ ሚሽ ኬሴስ፤ ኢታ ኣሲካ ባ ዎዝና ኩሚዳ ኢታ ሚሻፌ ኢታ ኬሴስ፤ ኣሲ ዉሪካ ባ ዎዝና ኩሚ ፓላሂዳይሳ ባ ዱናን ሃሳዬስ።

⁴⁶ “ታኒ ጊዛይሳ ኦꬄኬታ ሺን ኣይስ ታና ‘ጎዶ! ጎዶ!’ ጌቲ?

¹ Issi Sambata gallas Yesusi kaththa giddora aadhdhi bishin iza kaallizayti tiya xuphi ekkidi ba kushen shigichi mishin,

² Farsaaweetappe issi issi asati “Sambata gallas ooththanas bessontayssa ayssi ooththetii?” gida.

³ Yesusikka istas “Dawutey izara diza asati gafida wode izi ooththidayssa nababibeekketii?

⁴ Izi Xoossa Keeththe gelidi Qeeseti xalla maana mala azazettida dumma uketha baassi miidi banara dizaytas immides” giidi zaarides.

⁵ Qasseka Yesusi “Asa Nay Sambata Goda” giidi istas yootides.

⁶ Yesusikka hara Sambata gallas Ayhuda Woosa Keeththe gelidi tamarsishin ushacha kushey silida issi asi heen dees.

⁷ Muse woga tamarsizaytinne Farsaaweeti Yesusa mootanas gaaso koydi ane izi Sambata gallassan addeza pathiko beyana giidi naagishe gam7ida.

⁸ Yesusikka ista wozna qofa eridi kushey silida addeza ubba sinthan “Denda eqqa” gides. Addezikka dendi eqqides.

⁹ Yesusikka ista “Ta intena issi miish ane oychays; Sambata gallas ooththanas bessizay lo7o oosoyee? Iita oosoo? Shempo asho woykko dhayssoo?” giidi oychides.

¹⁰ Qasseka Yesusi ba yuushon diza wursi yuushi xeellidappe guyen addeza “Ne kushe piddisa” gides. Addezikka Yesusi gida mala ooththides. Iza kusheykka paxides.

¹¹ Gido attin asati hanqettida; Yesusa bolla ay ooththanas koshshizakkonne ba giddon zoretida.

¹² He gallassatappe issi gallas Yesusi woossanas zuma bolla kezidi qamma kumeth Xoossa woossishe aqides.

¹³ Gadey wontishin bana kaallizayta xeygidi istafe tammanne nam7ata doorides. Istaka “Hawaareta” giidi sunthides.

¹⁴ Istika Phexroosa giidi sunthida Simoonanne iza isha Indiraasa, Yaqoobe, Yohannisa, Piliphoosa, Bartelemoosa,

¹⁵ Matoosa, Toomaasa, Ilfiyoosa naa Yaqoobe, ba baggas mishettiza Simoona,

¹⁶ Yaqoobe naa Yuhudanne Yesusa aaththi immida Asqoroonto Yuhuda.

¹⁷ Yesusikka istara issife zuma bollafe duge wodhdhidi denbason eqqides. Iza kaallizaytappe daro asay heen dees, Yuhudappenne Yerusalameppe, qasseka Xirooseppenne Sidoona Abba achchafe yida keehi daro asaykka heen dees.

¹⁸ Istika yiday Yesusi gizayssa siyanassinne hargefe paxanassa. Tuna ayanaykka waayssizayti wuri paxida.

¹⁹ Wolqaykka izappe kezidi darota pathiza gish asay wuri iza bochchanas yides.

²⁰ Yesusikka bana kaallizaytas “Xoossa Kawoteththay intes gidida gish inteno manqotoo! Inte anjettidayta;

²¹ Inte guyeppe kallana gish ha7i gafizayto! Inte anjettidayta; inte guyeppe miicana gish inteno ha7i yeekkizayto! Inte anjettidayta;

²² asay ta gish intena ixishin ba giddofe shaakkishin, borshininne intena iita sunthara xeygishin inte anjettidayta;

²³ “Intes salon gita woytoy diza gish he wode ufayssan guppite; ays giikko ista Aawati nabeta bolla hessatho ooththida.

²⁴ Gido attin inteno dureto inte ha7i ufayettida gish intena aayye-ana!

²⁵ Inteno ha7i kallidayto intena aayye ana! Inte guyeppe gafana; inteno ha7i miicizayto! Intes aayye ana! Inte guyeppe mishetananne yeekkana.

²⁶ “Asi wuri inte gish lo7o haasayiza wode intens aayye-ana! Ays giikko ista aawati wordo nabetas hessa mala ooththida.

²⁷ “Gido attin ta yootizayssa siyizayto tani intes yootizay inte morketa siiqite; intena ixizaytas lo7o ooththite;

²⁸ intena qangizayta anjite; intena qohizaytas woossite;

²⁹ Issi shagalan baqqikko, nam7antho shagala gujja bessa; ooninne ne bollara may7idayssa qaari ekkikko gaaththara may7idayssakka diggofa.

³⁰ “Nena woossiza ubbas imma; ne miisha ekkida asi zaari immana mala oychofa.

³¹ “Asi intes ooththana mala inte koyizayssatho inteka hara asas ooththite.

³² “Nagaranchatikka bana siiqizayta siiqiza gish inte intena siiqizayta xalla siiqikko intes ay dumma anjoy dizee?

³³ Inte intes lo7o ooththizaytas xalala lo7o ooththikko intes ay dumma anjoy dizee? Ayssi giikko nagaranchatikka hessatho ooththiza.

³⁴ Tal7e ekkidi zaarana dandayettes gizaytas xalla inte tal7ikko inte hara ay dumma anjo demmanee? Ayssi giikko nagaranchatikka isti tal7idayssa sire zaaridi ekkanas nagaranchatas tal7etes.

³⁵ Gido attin Xoossi bana galatontaytassinne iitatas kiya gidida mala inte morketa siiqite; lo7o ooththite; guyeppe zaaridi ekkanas qopponta dishe tal7e immite; hessanka intes kushe zaaroy gita gidana; qasseka inte wogga Xoossa naa gidana.

³⁶ Inte aaway kiya gidida mala inteka kiyata gidite.

³⁷ “Inte harata bolla pirdofte inte bollakka pirdetenna; inte bolla pirday daronta mala harata bolla pirda darsofte; Asas atto gite inteska atto geetettana.

³⁸ Immite! Inteska imettana; intes inte makida miishan simmidi makettana; harappeka naaqi baqqettidi yiggeti kumidi wora gukkanashe lo7o makiza miishan makettidi intes imettana” gides.

³⁹ Qasseka Yesusi istas leemison “Qooqey qooqe kaalethanas dandayizee? Kaalethikkokka nam7ati issoy issara oyketidi ollan gelettennee?

⁴⁰ Tamarey bana tamarsizadefe aadhdhenna, gido attin lo7ethi tamarida asi wuri ba astamare mala gides.

⁴¹ “Ne ayfe giddon diza tuussa xeellonta dashe ne isha ayfe giddon diza buura ays xeellay?

⁴² Ne ayfen diza tuussa beyonta ne isha ‘Tani ne ayfen diza buura ane kessays gaanas wosta dandayay?’ Neno qoodheppe qommon hanzaysso koyrottada ne ayfen diza tuussa kessa; hessafe guye ne isha ayfen diza buura kessanas lo7etha xeellandassa.

⁴³ “Lo7o mithi iita ayfe ayfenna; qasseka iita mithi lo7o ayfe ayfenna.

⁴⁴ Mithi wurikka ba ayfen ayfen erettes; Agunthafe Balase geetettiza mitha ayfey maxettenna; laadeppe woyne ayfey qanxetenna.

⁴⁵ Lo7o asi ba wozna kumida lo7o miish kesses; iita asikka ba wozna kumida iita miishafe iita kesses; asi wurikka ba wozna kumi palahidayssa ba duunan haasayees.

⁴⁶ “Tani gizayssa ooththeketa shin ays tana ‘Godo! Godo!’ geetii?