ሉቃሳ 5:1-13 in Gamo

¹ ዬሱሲ ጌንሴሬፄ ኣባ ላንቄን ኤቂዲ ፆሳ ቃላ ታማርሲሺን ሲዪዛ ኣሳይ ኢዛ ኡንዔꬂዴስ።

² ሄ ዎዴ ናምዑ ዎጎሎቲ ኣባ ኣቻን ዲሺን ዬሱሲ ቤዪዴስ። ሞሌ ኦይኪዛይቲ ዎጎሎታፔ ዎꬊዲ ሞሌ ጊቴታ ሜጬቴስ።

³ ዬሱሲ ዎጎሎታፔ ሲሞና ዎጎሎን ጌሊዲ ቢታፌ ጌዴ ኣባ ጊዶ ሺሻና ማላ ኦይቺዲኔ ዎጎሎ ጊዶን ኡቲዲ ኣሳ ታማርሲዴስ።

⁴ ታማርሲ ዉርሲዳፔ ጉዬ ሲሞና “ኣባይ ጪማቲዛሶ ሺቃ ሞሌ ኦይካናስ ኢንቴ ጊቴዛ ኣባ ጊዶ ዬጊቴ” ጊዴስ።

⁵ ሲሞናይ ዬሱሳስ ዛሪዲ “ጎዶ! ቃማ ኩሜꬅ ዳቡሪ ኣቂዲ ኢሲኖካ ኦይኪቦኮ፤ ጊዶ ኣቲን ኔ ቃላን ጊቴዛ ዬጋና” ጊዴስ።

⁶ ዬጊዳ ዎዴ ዳሮ ሞሌ ኦይኪዳ። ጊቴይካ ዳኬቲዴስ።

⁷ ሃራ ዎጎሎን ዲዛይቲ ዪዲ ኢስታ ማዳና ማላ ኩሼራ ዉቲ ፄይጊዳ። ኢስቲካ ዪዲ ናምዑ ዎጎሎታ ሞሌ ኩንꬂዳ። ዎጎሎቲካ ዱጌ ሚቴቴꬅ ኦይኪዳ።

⁸ ሲሞና ጌቴቲዛ ጴፅሮሲ ሄሳ ቤዪዲ ዬሱሳ ቶሆ ቦላ ኩንዲዲ “ጎዶ! ታ ናጋራንቻ ጊዲዳ ጊሽ ታ ኣቻፌ ኪቻ” ጊዴስ።

⁹ ኢዚ ሄሳ ጊዳይ ኢዚኔ ኢዛራ ዲዛይቲ ኦይኪዳ ዳሮ ሞሌዛን ማላሌቲዳ ጊሻሳ።

¹⁰ ቃሴካ ሲሞና ላጌቲ ዛቢዶሳ ናይቲ ያቆቤይኔ ዮሃኒሲካ ዉሪ ማላሌቲዳ። ዬሱሲካ ሲሞና “ባቦፋ! ሃይሳፌ ጉዬ ኔ ኣስ ኦይኪዛዴ ጊዳና” ጊዴስ።

¹¹ ኢስቲካ ዎጎሎታ ቢታኮ ሺሺዲ ዉርሲካ ዬጊ ኣጊዲ ዬሱሳ ካሊዳ።

¹² ዬሱሲ ካታማታፔ ኢሲኔዪን ዲሺን ኢንቺራቻ ሃርጌይ ቦላ ዉርሲ ኦይኪዳ ኢሲ ኣሲ ሄ ካታማን ዴስ። ሄ ኣዴዚካ ዬሱሳ ቤዪዲ ኢዛ ሲንꬃን ኩንዲዲ “ጎዶ! ኔ ኮይኮ ታና ፓꬃና ዳንዳያሳ” ጊዲ ዎሲዴስ።

¹³ ዬሱሲ ባ ኩሼ ዬዲ ቦቺዲ “ታ ዶሳዲስ፥ ፓፃ” ጊዴስ። ኢንቺራንቻይ ሄራካ ꬋዪዴስ።

¹ Yesusi Gensereexe Abba lanqen eqqidi Xoossa qaala tamarsishin siyiza asay iza un7ethides.

² He wode nam7u wogoloti abba achchan dishin Yesusi beyides. Mole oykkizayti wogolotappe wodhdhidi mole giteta meceettes.

³ Yesusi wogolotappe Simoona wogolon gelidi biittafe gede abba gido shiishana mala oychidinne wogolo giddon uttidi asaa tamarsides.

⁴ Tamarsi wursidappe guye Simoona “Abbay ciimmatizaso shiiqa mole oykkanas inte giteza abba gido yeggite” gides.

⁵ Simoonay Yesusas zaaridi “Godo! Qamma kumeth daaburi aqqidi issinokka oykkibookko; gido attin ne qaalan giteza yeggana” gides.

⁶ Yeggida wode daro mole oykkida. Giteyka daakkettides.

⁷ Hara wogolon dizayti yiidi ista maaddana mala kushera wutti xeygida. Istika yiidi nam7u wogolota mole kunthida. Wogolotikka duge mitetteth oykkida.

⁸ Simoona geetettiza Phexroosi hessa beyidi Yesusa toho bolla kundidi “Godo! Ta nagarancha gidida gish ta achchafe kichcha” gides.

⁹ Izi hessa giday izinne izara dizayti oykkida daro molezan malalettida gishassa.

¹⁰ Qasseka Simoona laggeti Zabidoosa nayti Yaqoobeynne Yohannisikka wuri malalettida. Yesusikka Simoona “Babbofa! Hayssafe guye ne as oykkizade gidana” gides.

¹¹ Istika wogolota biittakko shiishshidi wursikka yeggi aggidi Yesusa kaallida.

¹² Yesusi katamatappe issineyin dishin inchiracha hargey bolla wursi oykkida issi asi he kataman dees. He addezikka Yesusa beyidi iza sinthan kundidi “Godo! Ne koykko tana pathana dandayassa” giidi woossides.

¹³ Yesusi ba kushe yeddi bochchidi “Ta dosadis, paxa” gides. Inchiranchay heerakka dhayides.