ሉቃሳ 24:7-43 in Gamo

⁷ ኣሳ ናይ ናጋራንቻታ ኩሼን ኣꬊ ኢሜታናሲኔ ካቄታናስ፥ ሃይቆፔካ ሄꬓንꬆ ጋላስ ዴንዳናስ ቤሴስ” ጊዲ ዮቲ ዎꬂዴስ።

⁸ ማጫሳቲካ ሄ ዎዴ ካሴ ኢዚ ጊዳ ቃላ ሃሳዪዳ።

⁹ ማጫሳቲ ዱፎሶፔ ሲሚዲ ሄሳ ዉርሲ ዬሱሳ ካሊዛ ታማኔ ኢሲኔታሲኔ ሃራታስ ዮቲዳ።

¹⁰ ሄሳካ ሃዋሬታስ ዮቲዳይ ማግዳሌ ጊዛሶፔ ዪዳ ማራሞኔ ዮሃኖ ጌቴቲዛሪራ ያቆቤ ማራሞኔ ኢስታራ ኢሲፌ ዲዛ ሃራ ማጫሳታ።

¹¹ ጊዶ ኣቲን ኢስታስ ማጫሳቲ ዮቲዳይሲ ኣጉሞ ሚሳቲን ኣማኒቤቴና።

¹² ጊዶ ኣቲን ጴፅሮሲ ዎꬃን ዬሱሳ ዱፎኮ ጋኪዲኔ ሆኪዲ ዱፎ ጊዶ ፄሊሺን ኢዛ ኣሃ ፃፂዳ ማይዖይ ፃላ ዲዛይሳ ቤዪዲ ኬሂ ማላሌቲሼ ባሶ ሲሚዴስ።

¹³ ሄ ጋላስ ኢዛ ካሊዛይታፔ ናምዓቲ ዬሩሳላሜፔ ታማኔ ኢሲ ኪሎሜቲሬ ሃኪዛ ኤማሆሴ ጌቴቲዛ ካታማ ቤቴስ።

¹⁴ ቢሼ ኢስቲ ሄ ዎዴ ሃኒዳ ዬሱሳ ሃይቆ ጊሽ ባ ጊዶን ሃሳዬቴቴስ።

¹⁵ ኢስቲ ሃሳዬቲሺን ዬሱሲ ኢስታኮ ሺቂዲ ኢስታራ ኢሲፌ ቢሺን፥

¹⁶ ኢስቲ ኢዛ ኤሮንታ ማላ ኢስታ ኣይፌይ ኦይኬቲዴስ።

¹⁷ ዬሱሲ ኢስታ “ሃይሲ ኦጌ ሃሙቲሼ ኢንቴ ኢንቴ ጊዶን ሃሳዬቲዛይሲ ኣዜ?” ጊዴስ። ኢስቲካ ዳጋማራ ሞꬌቲሼ ሲቲ ጊ ኤቃጊዳ።

¹⁸ ኢስታ ጊዶፌ ኢሶይ ቃሊዮጳ ጌቴቲዛይሲ ዛሪዲ “ሃ ማታ ጋላሳታን ዬሩሳላሜን ሃኒዳይሳ ኤሮንታ ኢማꬃ ኣሲ ኔና ፃላ?” ጊዴስ።

¹⁹ ኢዚካ ኢስታስ ዛሪዲ “ኣዚ ሃኒዴ?” ጊን ኢስቲ ቃሴ ዛሪዲ ‘ፆሳ ሲንꬃኒኔ ኡባ ኣሳ ሲንꬃን ኦሶኒኔ ቃላን ሚኖ ናቤ ጊዲዳ ናዚሬቴ ዬሱሳ ጊሽ’ ጊዳ።

²⁰ ኢዛካ ቄሴታ ሃላቃቲኔ ዳናቲ ሃይቆ ፒርዳስ ኣꬂ ኢሚዳኔ ካቂዳ።

²¹ ኑኒ ጊዲኮ “ኢስራዔሌ ዎዝናይ ኢዛ’ ጊዲ ኡፋዬቲዶሲሺን ሃራፔካ ሄሲ ሃኒን ቃሴ ሃች ሄꬓንꬆ ጋላሳ።

²² ቃሴ ኑ ጊዶፌ ኢሲ ኢሲ ማጫሳቲ ኑና ኬሂ ማላሊሲዳ፤ ኢስቲካ ማላዶ ዎንታራ ጌዴ ኢዛ ዱፎኮ ቢዲ፥

²³ ኢዛ ኣሃይ ቤቶንታ ኢፂን ዪዲ ኢዚ ፓፃ ዲዛይሳ ኢስታስ ዮቲን ኪታንቻታ ቤዪዳይሳ ኑስ ዮቲዳ።

²⁴ ኑፔካ ኢሲ ኢሲ ኣሲ ኢዛ ዱፎኮ ቢዲ ማጫሳቲ ጊዳ ማላ ቤዪዳ ኣቲን ዬሱሳ ዴሚቤቴና” ጊዳ።

²⁵ ኢዚካ ኢስታስ “ኢንቴ ዎዝናን ዎꬆንታይቶ! ኢንቴ ዎዝናይ ካሴ ናቤቲ ዮቲዳይሳ ኣማናናፔ ታኪዳይቶ!

²⁶ ፆሳፌ ኪቴቲዳይሲ ሃ ሜቶዛ ኤካናሲኔ ጌዴ ባ ቦንቾሶ ጌላናስ ቤሴኔ?’ ጊዴስ።

²⁷ ሙሴፔኔ ናቤታፔ ዶሚዲ ጌሻ ማፃፋታን ኢዛ ጊሽ ፃፌቲዳይሳ ኢስታስ ሎዔꬅ ዮቲዴስ።

²⁸ ኢስቲ ባ ቢዛሶ ማቲዳ ዎዴ ዬሱሲ ኣꬊ ቢዛ ሚሳቲዴስ።

²⁹ ኢስቲካ ቃሴ “ጋዴይ ቃሚዛ ጊሽ ኑናራ ኣቃ” ጊዲ ኢዛ ኬሂ ዎሲን ኢስታራ ኣቃናስ ጌሊዴስ።

³⁰ ኢስታራ ኢሲፌ ማዳን ኡቲዲ ኡኬꬅ ባ ኩሼን ኦይኪዲ ኢስታስ ሜንꬂ ሜንꬂ ኢሚዴስ።

³¹ ሄሳ ዎዴ ኢስታ ኣይፌይ ዶዬቲን ኢዛ ጊዲዳይሳ ኤሪዳ፤ ኢዚካ ኢስታ ኣይፌፔ ጌሚዴስ።

³² ኢስቲካ “ኑ ዪሼ ኦጌ ቦላ ዲሺን ኑና ሃሳዪሲዲ ጌሻ ማፃፋታካ ቆንጪሲዲ ኑስ ጌላናሼ ዮቲን ኑ ዎዝናይ ታማ ማላ ፁጌቲቤኔ?” ጊዲ ኢሶይ ኢሳራ ሃሳዬቲዳ

³³ ሄራካ ዴንዲዲ ዬሩሳላሜ ሲሚ ቢዳ። ታማኔ ኢሲኔቲኔ ኢስታራ ኢሲፌ ዲዛይቲካ ኢሲ ቦላ ሺቂ ዲዛይታ ዴሚዳ።

³⁴ ኢስቲካ ባ ጊዶን ኢሶይ ኢሳስ “ጎዳይ ቱሙ ዴንዲዴስ! ሲሞናስካ ቤቲዴስ” ጊዳ።

³⁵ ኢዛ ካሊዛይታፔ ናምዓቲ ኦጌ ቦላ ሃኒዳይሳኔ ዬሱሲ ኡኬꬃ ሜንꬂ ሜንꬂ ኢሚዳ ዎዴ ኢስቲ ዎስት ኤሪዳኮ ኢስታስ ዮቲዳ።

³⁶ ሄሳ ጊሽ ኢስቲ ባ ጊዶን ሃሳዬቲሺን ዬሱሲ ኢስታ ጊዶን ኤቂዲ “ሳሮይ ኢንቴስ ጊዶ!” ጊዴስ።

³⁷ ጊዶ ኣቲን ኢስቲ ሞይቲሌ ቤዪዳ ሚሳቲን ኬሂ ዳጋሚዳ።

³⁸ ኢዚካ ኢስታስ “ኣዛስ ዳሮ ቆፔቲ? ኣዛስ ኢንቴ ዎዝናራ ሲꬌቲ?

³⁹ ታ ኩሼታኔ ታ ቶሆታ ሃ ፄሊቴ ታናኮ፤ ቃሴካ ታና ኦይኪ ቤዪቴ፤ ታና ኢንቴ ቤዪዛይሳ ማላ ሞይቲሌስ ኣሾይኔ ሜቄꬂ ዴና” ጊዴስ።

⁴⁰ ሄሳ ጊ ሲሚዲ ባ ቶሆታኔ ባ ኩሼታ ኢስታ ቤሲዴስ።

⁴¹ ኢስቲካ ኡፋይሳ ዳሮፔኔ ማላሌቴꬃፌ ዴንዲዳይሳን ቡሮ ኣማኖንታ ዲሺን ዬሱሲ ‘ሄሳን ኣይኮ ሚዛዚ ዲዜ?” ጊዲ ኢስታ ኦይቺዴስ።

⁴² ኢስቲካ ሞሌ ፂፃ ኢሲ ባርስ ኢዛስ ኢሚዳ።

⁴³ ኢዚካ ኤኪዲ ኢስታ ሲንꬃን ሚዴስ።

⁷ Asa Nay nagaranchata kushen aadhdhi imettanassinne kaqettanas, hayqoppeka heedzdzantho gallas dendanas bessees” giidi yooti woththides.

⁸ Macasatikka he wode kase izi gida qaala haasayida.

⁹ Macasati duufosoppe simmidi hessa wursi Yesusa kaalliza tammanne issinetassinne haratas yootida.

¹⁰ Hessaka Hawaaretas yootiday Magdale gizasoppe yida Maaramonne Yohaano geetettizarira Yaqoobe Maaramonne istara issife diza hara macasata.

¹¹ Gido attin istas macasati yootidayssi agumo misatin ammanibeetenna.

¹² Gido attin Phexroosi wothan Yesusa duufokko gakkidinne hokkidi duufo giddo xeellishin iza aha xaaxida may7oy xalla dizayssa beyidi keehi malalettishe baso simmides.

¹³ He gallas iza kaallizaytappe nam7ati Yerusalameppe tammanne issi kilometire haakkiza Emahoose geetettiza katama beettes.

¹⁴ Bishe isti he wode hanida Yesusa hayqo gish ba giddon haasayetettes.

¹⁵ Isti haasayettishin Yesusi istako shiiqidi istara issife bishin,

¹⁶ isti iza eronta mala ista ayfey oykettides.

¹⁷ Yesusi ista “Hayssi oge hamuttishe inte inte giddon haasayettizayssi aazee?” gides. Istika dagamara modhettishe siti gi eqqagida.

¹⁸ Ista giddofe issoy Qaliyoopha geetettizayssi zaaridi “Ha mata gallassatan Yerusalamen hanidayssa eronta imatha asi nena xallaa?” gides.

¹⁹ Izikka istas zaaridi “Aazi hanidee?” giin isti qasse zaaridi “Xoossa sinthaninne ubba asa sinthan oosoninne qaalan mino nabe gidida Naazirete Yesusa gish” gida.

²⁰ Izakka Qeeseta halaqatinne daannati hayqo pirdas aaththi immidanne kaqqida.

²¹ Nuni gidikko “Isra7eele woznay iza giidi ufayettidosishin harappeka hessi hanin qasse hach heedzdzantho gallassa.

²² Qasse nu giddofe issi issi macasati nuna keehi malalisida; istika maalado wontara gede iza duufokko biidi,

²³ iza ahay beettonta ixin yiidi izi paxa dizayssa istas yootin Kiitanchata beyidayssa nuus yootida.

²⁴ Nuupekka issi issi asi iza duufokko biidi macasati gida mala beyida attin Yesusa demmibeetenna” gida.

²⁵ Izikka istas “Inte woznan wothontayto! Inte woznay kase nabeti yootidayssa ammananappe takkidayto!

²⁶ Xoossafe kiitettidayssi ha metoza ekkanassinne gede ba bonchoso gelanas bessennee?” gides.

²⁷ Museppenne nabetappe doommidi Geeshsha Maxaafatan iza gish xaafettidayssa istas lo7eth yootides.

²⁸ Isti ba bizaso matida wode Yesusi aadhdhi biza misatides.

²⁹ Istika qasse “Gadey qammiza gish nunara aqa” giidi iza keehi woossin istara aqanas gelides.

³⁰ Istara issife maaddan uttidi uketh ba kushen oykkidi istas menthi menthi immides.

³¹ Hessa wode ista ayfey doyettin iza gididayssa erida; izikka ista ayfeppe geemides.

³² Istika “Nu yishe oge bolla dishin nuna haasayisidi Geeshsha Maxaafataka qoncisidi nuus gelanashe yootin nu woznay tama mala xuugettibenee?” giidi issoy issara haasayettida

³³ Heerakka dendidi Yerusalame simmi bida. Tammanne issinetinne istara issife dizaytikka issi bolla shiiqi dizayta demmida.

³⁴ Istika ba giddon issoy issas “Goday tumu dendides! Simoonaska beettides” gida.

³⁵ Iza kaallizaytappe nam7ati oge bolla hanidayssanne Yesusi uketha menthi menthi immida wode isti wost eridakko istas yootida.

³⁶ Hessa gish isti ba giddon haasayettishin Yesusi ista giddon eqqidi “Saroy intes gido!” gides.

³⁷ Gido attin isti moytile beyida misatin keehi daggamida.

³⁸ Izikka istas “Aazas daro qoppetii? Aazas inte woznara sidheetii?

³⁹ Ta kushetanne ta tohota haa xeellite tanakko; qasseka tana oykki beyite; tana inte beyizayssa mala moytiles ashoynne meqethi deenna” gides.

⁴⁰ Hessa gi simmidi ba tohotanne ba kusheta ista bessides.

⁴¹ Istika ufayssa daroppenne malaletethafe dendidayssan buro ammanonta dishin Yesusi “Hessan aykko mizazi dizee?” giidi ista oychides.

⁴² Istika mole xiixa issi bars izas immida.

⁴³ Izikka ekkidi ista sinthan mides.