ሉቃሳ 23:17-53 in Gamo

¹⁷ ኢዚ ሄሳ ጊዳይ ኢስታ ባዓሌ ጋላስ ቃሼቲዳ ኣሳፔ ኢሳዴ ቢርሺዛ ዎጋይ ዲዛ ጊሻሳ።

¹⁸ ዴሬይ ዉሪካ ኢሲ ቦላ “ባርባኔ ቢርሻዳ ሃይሳ ኣዴዛ ዲጋ!” ጊዲ ዋሲዴስ።

¹⁹ ባርባኔይ ካታማ ጊዶን ኣሳ ማካላ ዮዖን ዴንꬄꬂዲ ኣስ ዎꬊ ቃሼቲዳ ኣሳ።

²⁰ ጲላፆሲካ ዬሱሳ ቢርሻናስ ኮይዳ ጊሽ ቃሴካ ዛሪዲ ኦይቺዴስ።

²¹ ኣሳይ ዛሪዲ ኢዛ “ካቃ! ካቃ!” ጊዲ ዋሲዴስ።

²² ጲላፆሲ ሄꬓንꬆካ “ኣዛስ ካቆ? ሃይሲ ኣዴዚ ኣይ ኢታ ኦꬂዴ? ታኒ ኢዛ ሃይቆስ ጋꬂዛ ኢታ ኦሶ ኢዛ ቦላ ቤያቤኬ፤ ሄሳ ጊሽ ቃፃያዳ ታ ኢዛ ቢርሻ ዬዳና” ጊዴስ።

²³ ኣሳይካ ቃላ ꬎቁ ሂስቲዲ ዬሱሲ ካቄታና ማላ ጲላፆሳ ኬሂ ዎሲሼ ዋሲዳ።

²⁴ ሄሳ ጊሽ ጲላፆሲ ኢስታ ኦይሾይ ፖሌታና ማላ ኣዛዚዴስ።

²⁵ ኣሳ ማካሊሲዲ ሼምፖ ዎꬊዳ ጊሽ ቃሼቲዳይሳ ቢርሻና ማላ ኢስቲ ዎሲዳዴ ቢርሺዲ ቃሴካ ዬሱሳ ኢስቲ ዶሲዳ ማላ ኦꬄቶ ጊዲ ዴራስ ኣꬂ ኢሚዴስ።

²⁶ ኢስቲካ ዬሱሳ ኦይኪዲ ኤኪ ቢሺን ቃሬና ጌቴቲዛ ካታማፔ ኢሲ ሲሞና ጌቴቲዛ ኣዴይ ሃሆፔ ዪዛይሳ ዴሚዳ ዬሱሲ ካቄታና ማስቃሌ ኮጫ ኢዚ ቶኪዲ ዬሱሳ ካላና ማላ ዎልቃꬂዳ።

²⁷ ዳሮ ዴሬይ ባ ቲራ ኢጪ ኢጪ ዬኪዛ ማጫሳቲ፥

²⁸ ዬሱሳፔ ጉዬራ ኢዛ ካሊዳ። ዬሱሲ ኢስታኮ ሲሚ ፄሊዲ “ኢንቴ ዬሩሳላሜ ማጫሳይ ኢንቴሲኔ ኢንቴ ናይታስ ዬኪቴ ኣቲን ታስ ዬኮፍቴ።

²⁹ ‘ሲንꬃፌ ኢንቴ ሄኮ ማካራ ጊዲዳ ማጫሳቲ፥ ዬሎንታ ኡሎቲኔ ናይ ꬋሞንታ ꬋንꬃቲ ኣንጄቲዳይታ!’ ጋና ዎዴይ ሲንꬃራ ዬስ።

³⁰ ሄ ዎዴ ኣሳይ ‘ዙማቶ! ኑ ቦላ ዎዲቴ፤ ቄሪ ዙማቲካ ኑና ቆቲቴ!’ ጋና።

³¹ ሂስቲን ቃዬ ሚꬃ ቦላ ሃይሳꬆ ኦꬂዳይቲ ሜላ ሚꬃ ቦላ ዎስታኔሻ?” ጊዴስ።

³² ኢዛራ ኢሲፌ ሃይቃና ማላ ሃራ ናምዑ ኢታ ኦꬂዳ ኣሳታ ኢዛራ ኤፊዳ።

³³ ቃራኒዮ ጌቴቲዛሶ ጋꬂዲ ካቂዳ። ኢታ ኦꬂዳይታፔ ኢሳ ኡሻቻ ባጋራ ኢሳ ሃዲርሳ ባጋራ ካቂዳ።

³⁴ ዬሱሲካ “ታ ኣዋዉ! ሃይቲ ባ ኦꬂዛይሳ ኤሪዲ ኦꬆንታ ጊሽ ኢስታስ ኣቶ ጋ!” ጊዴስ። ኢስቲካ ኢዛ ማይዖዛ ሳማ ዬጊዲ ባ ጊዶን ጊሼቲ ኤኪዳ።

³⁵ ሄሲ ሃኒሺን ኣሳይ ዉሪ ኤቂ ፄሊዴስ፤ ዳናቲካ “ኢዚ ሃራ ኣሳ ኣሺዴስ ሺን ፆሳፌ ዶሬቲዳ ኪርስቶሲ ኢዛ ጊዲኮ ኣኔ ሃዒ ባና ኣሾ” ጊዲ ቂꬊዳ።

³⁶ ዎታዳራቲካ ሺቂዲ ዎይኔፔ ኣጌቲዳ ጫላ ኡሻ ኡሺዲ ኢዛ ቂꬊዳ።

³⁷ “ኔኒ ኣይሁዳ ካዎ ጊዲኪ? ኣኔ ሃዒ ኔና ኣሻ” ጊዳ።

³⁸ ኢዛ ሁዔፔ ቦላ ባጋራ ማስቃሌ ኮጫ ቦላ “ሃይሲ ኣይሁዳታ ካዎ” ጊዛ ቃላ ፃፊ ቃጲዳ።

³⁹ ኢታ ኦꬂዲ ካቄቲዳ ኣሳታፔ ኢሶይ ጫሻ ቃላ ዬሱሳ ቦላ ቆቆፊዴስ። “ኔ ኪርስቶሳ ጊዲኪ? ኣኔ ኔናካ ኑናካ ኣሻ” ጊዴስ።

⁴⁰ ኢታ ኦሲዳይታፔ ኢሶይ “ኔኒ ኔስ ቤሲዛ ፒርዳ ኤካሼ ፆሳስ ባቢኪ?

⁴¹ ኑኒ ኑ ኦꬂዳ ኢታ ኦሶስ ቤሲዛይሳ ኤኮስ፤ ሃይሲ ኣዴዚ ጊዲኮ ኢሲ ኢታካ ኦꬂቤና” ጊዴስ።

⁴² ዬሱሳ “ኔኒ ኔ ካዎቴꬃራ ዪዛ ዎዴ ታና ቆፓ!” ጊዴስ።

⁴³ ዬሱሲካ ዛሪዲ “ታ ኔስ ቱሙ ጋይስ፤ ሃች ኔ ታናራ ጋናቴን ዳና” ጊዴስ።

⁴⁴ ሄሳ ዎዴ ጋዴይ ሴታ ጋላስ ሺን ቢዲ ኡዱፉን ሳቴ ጋካናስ ኩሜꬃ ቢታ ቦላ ꬉማይ ꬉሚዴስ።

⁴⁵ ኣዋ ኣርሼ ፖዖይ ዲጌቲዴስ። ፆሳ ኬꬃ ማጋላሻይካ ዳኬቲዲ ናምዑ ኬዚዴስ።

⁴⁶ ዬሱሲካ ኬሂ ዋሲዲ “ታ ኣዋዉ! ታኒ ታ ሼምፖ ኔ ኩሼን ኢማይስ” ጊዳ ማላ ሼምፖ ኬዚዴስ።

⁴⁷ ማቶ ሃላቃይ ሄሳ ቤዪዲ “ሃይሲ ኣዴዚ ቱማፔ ፂሎ ኣሳኮሺን” ጊዲ ፆሳ ጋላቲዴስ።

⁴⁸ ሄሳ ቤያናስ ሄን ሺቂዲ ዴሬይ ዉሪ ሄ ሃኒዳይሳ ቤዪዲ ቲራ ኢጪ ኢጪዲ ሲሚዴስ።

⁴⁹ ጊዶ ኣቲን ዬሱሳ ካሴ ሎዔꬂ ኤሪዛይቲ ዉሪ ቃሴካ ጋሊላፔራ ኢዛ ካሊዛ ማጫሳቲ ሄሳ ፄሊሼ ሃኪ ኤቂዳ።

⁵⁰ ኣይሁዳታ ዱላታ ኣሳፔ ኢሶይ ኢዚካ ዮሴፌ ጌቴቲዛይሲ ኢሲ ዳሮ ኪያኔ ፂሎ ኣሳ።

⁵¹ ኢዚካ ካሴ ኣሳይ ዬሱሳ ቦላ ዱላቲሺን ሄ ዱላታን ዴና፤ ኢዚካ ኢሲ ኣርማቲያሳ ጌቴቲዛ ኣይሁዳታ ካታማ ኣሳ ሺን ፆሳ ካዎቴꬂ ያናይሳ ናጊሼ ጋምዒዴስ።

⁵² ኢዚካ ጲላፆሳኮ ቢዲ ዬሱሳ ኣሃ ባስ ኢማና ማላ ጲላፆሳ ዎሲዴስ።

⁵³ ጲላፆሲ ኢዛስ ኤሮ ጊን ዮሴፌይ ኣሃ ማስቃሌ ኮጫፔ ዎꬂዳ ማላ ፃፂዲ ሹቻፌ ዎጬቲዳ ካሴ ሃራ ኣሲ ሞጌቶንታ ዱፎን ኤፊዲ ዎꬂዴስ።

¹⁷ Izi hessa giday ista ba7aale gallas qashettida asappe issade birshiza wogay diza gishassa.

¹⁸ Derey wurikka issi bolla “Barbaane birshada hayssa addeza digga!” giidi waassides.

¹⁹ Barbaaney katama giddon asa makala yo7on dentheththidi as wodhi qashettida asa.

²⁰ Philaxoosikka Yesusa birshanas koyda gish qasseka zaaridi oychides.

²¹ Asay zaaridi iza “Kaqqa! Kaqqa!” giidi waassides.

²² Philaxoosi heedzdzanthokka “Aazas kaqqoo? Hayssi addezi ay iita ooththidee? Tani iza hayqos gaththiza iita ooso iza bolla beyabeekke; hessa gish qaxayada ta iza birsha yeddana” gides.

²³ Asaykka qaala dhoqu histidi Yesusi kaqqettana mala Philaxoosa keehi woossishe waassida.

²⁴ Hessa gish Philaxoosi ista oyshoy polettana mala azazides.

²⁵ Asa makalisidi shempo wodhdhida gish qashettidayssa birshana mala isti woossidade birshidi qasseka Yesusa isti dossida mala ooththeto giidi deraas aaththi immides.

²⁶ Istika Yesusa oykkidi ekki bishin Qareena geetettiza katamappe issi Simoona geetettiza addey hahoppe yizayssa demmida Yesusi kaqqettana masqale koca izi tookkidi Yesusa kaallana mala wolqathida.

²⁷ Daro derey ba tira icci icci yeekkiza macasati,

²⁸ Yesusappe guyera iza kaallida. Yesusi istako simmi xeelidi “Inte Yerusalame macasay intessinne inte naytas yeekkite attin taas yeekkofte.

²⁹ ‘Sinthafe inte hekko makkara gidida macasati, yelonta ulotinne nay dhammonta dhanthati anjettidayta!’ gaana wodey sinthara yees.

³⁰ He wode asay ‘Zumato! Nu bolla woddite; qeeri zumatikka nuna qottite!’ gaana.

³¹ Histin qaye mitha bolla hayssatho ooththidayti mela mitha bolla wostaneshaa?” gides.

³² Izara issife hayqqana mala hara nam7u iita ooththida asata izara efida.

³³ Qaaraaniyo geetettizaso gaththidi kaqqida. Iita ooththidaytappe issa ushacha baggara issa hadirsa baggara kaqqida.

³⁴ Yesusikka “Ta Aawawu! Hayti ba ooththizayssa eridi ooththonta gish istas atto ga!” gides. Istika iza may7oza saama yeggidi ba giddon gishetti ekkida.

³⁵ Hessi hanishin asay wuri eqqi xeellides; daannatikka “Izi hara asa ashshides shin Xoossafe doorettida Kirstoosi iza gidikko ane ha7i bana asho” giidi qidhida.

³⁶ Wotadaratikka shiiqidi woyneppe aggettida caala ushsha ushshidi iza qidhida.

³⁷ “Neni Ayhuda kawo gidikkii? Ane ha7i nena ashsha” gida.

³⁸ Iza hu7eppe bolla baggara masqale koca bolla “Hayssi Ayhudata kawo” giza qaala xaafi qaaphida.

³⁹ Iita ooththidi kaqqettida asatappe issoy cashsha qaala Yesusa bolla qoqofides. “Ne Kirstoosa gidikii? Ane nenakka nunakka ashsha” gides.

⁴⁰ Iita oosidaytappe issoy “Neni nees bessiza pirda ekkashe Xoossas babbikkii?

⁴¹ Nuni nu ooththida iita oosos bessizayssa ekkoos; hayssi addezi gidikko issi iitakka ooththibenna” gides.

⁴² Yesusa “Neni ne kawoteththara yiza wode tana qoppa!” gides.

⁴³ Yesusikka zaaridi “Ta nees tumu gays; hach ne tanara Gannaten daana” gides.

⁴⁴ Hessa wode gadey seeta gallas shin biidi uddufun saate gakkanaas kumeththa biitta bolla dhumay dhumides.

⁴⁵ Awa arshe poo7oy diggettides. Xoossa Keeththa magalashaykka dakkettidi nam7u kezides.

⁴⁶ Yesusikka keehi waassidi “Ta aawawu! Tani ta shempo ne kushen immays” gida mala shempo kezides.

⁴⁷ Mato halaqay hessa beyidi “Hayssi addezi tumappe xillo asakkoshin” giidi Xoossa galatides.

⁴⁸ Hessa beyanas heen shiiqidi derey wuri he hanidayssa beyidi tira icci icidi simmides.

⁴⁹ Gido attin Yesusa kase lo7ethi erizayti wuri qasseka Galilappera iza kaalliza macasati hessa xeellishe haakki eqqida.

⁵⁰ Ayhudata duulata asappe issoy izikka Yoosefe geetettizayssi issi daro kiyanne xillo asa.

⁵¹ Izikka kase asay Yesusa bolla duulatishin he duulatan deenna; izikka issi Armatiyasa geetettiza Ayhudata katama asa shin Xoossa Kawotethi yaanayssa naagishe gam7ides.

⁵² Izikka Philaxoosakko biidi Yesusa aha baas immana mala Philaxoosa woossides.

⁵³ Philaxoosi izas ero gin Yoosefey aha masqale kocappe woththida mala xaaxidi shuchchafe woocettida kase hara asi moogettonta duufon efidi woththides.