ሉቃሳ 22:31-57 in Gamo

³¹ ቃሴካ ዬሱሲ ሲሞና ፄይጊዲ “ሲሞና! ፃላዔይ ኢንቴና ጊስቴ ማላ ሱራጋናስ ዎሲዴስ።

³² ጊዶ ኣቲን ታኒ ኔፔ ኣማኖይ ꬋዮንታ ማላ ኔ ጊሽ ፆሳ ዎሳዲስ፤ ኔካ ሲሚዳ ዎዴ ኔ ኢሻታ ሚንꬄꬃ” ጊዴስ።

³³ ሲሞኒካ ዛሪዲ “ጎዶ! ታ ኔናራ ቃሼታናሲኔ ሃይቃናስ ጊጋ ኡታዲስ” ጊዴስ።

³⁴ ዬሱሲካ ዛሪዲ “ጴፅሮሳ ሃች ኩቶይ ኢሲቶ ዋሳናስ ‘ታ ኢዛ ኤሪኬ’ ጋዳ ሄꬑቶ ኔ ታና ካዳና” ጊዴስ።

³⁵ ቃሴካ ዬሱሲ ኢስታ “ታ ኢንቴና ካሴ ጫማይ፥ ኮሮጆይኔ ቃራፂቴ ባይንዳ ኪቲዳ ዎዴ ኢንቴስ ኣዚ ፓጪዴ?” ጊዲ ኦይቺዴስ። ኢስቲካ “ኣይኮይካ ፓጪቤና” ጊዳ።

³⁶ ኢዚካ ዛሪዲ “ሃዒ ጊዲኮ ኮሮጆካ ቃራፂቴይካ ዲዛዴይ ኦይኮ፤ ጊꬃ ማሻይ ባይንዳዴይ ባ ማይዖ ባይዚዲ ሻሞ።

³⁷ ታ ኢንቴስ ቱማ ጋይስ ‘ማካላታራ ኢዚ ኢሲፌ ታይቤቲዴስ’ ጌቴቲ ካሴ ፃፌቲዳ ቃላይ ታ ቦላ ፖሌታና ቤሴስ፤ ታ ጊሽ ፃፌቲዳይሳስ ፖሎይ ቱማፔ ጋኪዴስ” ጊዴስ።

³⁸ ኢዛ ካሊዛይቲ ቃሴ “ጎዶ! ሄኮ ናምዑ ጊꬃ ማሻቲ ሃይሳን ዴቴስ” ጊዳ። ኢዚካ ኢዛ ጊሽ “ሃይሲ ጊዳና” ጊዴስ።

³⁹ ካሴ ኢዛስ ሎሴ ጊዲዳ ማላ ፑዴ ዳብራዛይቴ ጌቴቲዛ ዙማ ቦላ ኬዚ ቢዴስ። ኢዛ ካሊዛይቲካ ኢዛ ካሊ ቢዳ።

⁴⁰ ሄ ጋኪዳ ማላ “ኢንቴ ፓጬን ጌሎንታ ማላ ዎሲቴ” ጊዴስ።

⁴¹ ዬሱሲ ባና ካሊዛይታፔ ኣሲ ሹች ኦሊዲ ጋꬃናሶ ማላ ሃኪ ቢዲ ጉልባቲ ዎሲዴስ።

⁴² “ታ ኣዋዉ! ኔ ሼኔ ጊዲኮ ሃኖ ሜቶዮ ታፔ ዲጋ፤ ጊዶ ኣቲን ኔ ሼኔይ ሃኖፔ ኣቲን ታ ሼኔይ ሃኖፖ” ጊዲ ዎሲዴስ።

⁴³ ሳሎፔ ኪታንቻይ ቆንጪዲ ዬሱሳ ሚንꬄꬂዴስ።

⁴⁴ ኢዚካ ኬሂ ፁጌቲዲ ዎሲሺን ኢዛ ኣሳቴꬃፌ ጫዋይ ሱꬃ ማላ ጉኪዴስ።

⁴⁵ ዎሳፔ ዴንዲዲ ባና ካሊዛይታኮ ቢዴስ። ኢስቲካ ኢዛስ ሚሼቲዲ ቆፒሺን ꬊስኮይ ኤፊዳሼ ዬሱሲ ኢስታኮ ዪዲ፥

⁴⁶ “ኣይስ ꬊሲኬቲ? ኢንቴ ፓጬን ጌሎንታ ማላ ሃዒ ዴንዲዲ ዎሲቴ” ጊዴስ።

⁴⁷ ኢዚ ቡሮ ሃሳያን ዲሺን ዬሱሳ ካሊዛይታፔ ኢሶይ ዩሁዳ ጌቴቲዛይሲ ባናራ ዳሮ ኣሳ ካሌꬂ ኤኪ ዪዲ ዬሱሳ ዬራናስ ኢዛኮ ሺቂዴስ።

⁴⁸ ጊዶ ኣቲን ዬሱሲ ኢዛ “ዩሁዳ! ታና ኣሳ ና ዬሮን ኣꬃ ኢማይ?” ጊዴስ።

⁴⁹ ዬሱሳ ዩዪ ኣꬊ ዲዛ ኣሳይ ሃኖዛ ሎዔꬂ ፄሊዲ “ጎዶ! ሃይታንታ ማሻራ ቡꬂኖ?” ጊዳ።

⁵⁰ ኢስታፌ ኢሶይ ቄሴታ ኣላፌ ኣሽካራ ኡሻቻ ሃይꬄ ማሻራ ቃንፂዴስ።

⁵¹ ዬሱሲ ኢስታ “ኢንቴ ሃዒ ታስ ኣጊቴ!” ጊዲ ኣሽካራ ሃይꬃ ቦቺዲ ፓꬂዴስ።

⁵² ቃሴካ ኢዛ ኦይካና ዪዳ ቄሴታ ሃላቃታ ፆሳ ኬꬃ ኣላፌታኔ ጪማታ “ፓንጋ ኦይኪዛ ኣሳ ማላ ጊꬃ ማሻኔ ዱርቃ ኤኪዲ ዪዴቲ?

⁵³ ጋላስ ጋላስ ታ ኢንቴናራ ፆሳ ኬꬃን ዲሺን ታ ቦላ ኩሼ ዎꬂቤኬታ፤ ሃይሲ ꬉማይ ካዎቲዳ ኢንቴ ዎዴ” ጊዴስ።

⁵⁴ ሄሳፌ ጉዬ ዬሱሳ ኦይኪ ኤኪዲ ቄሴታ ሃላቃሶ ጌሊዳ፤ ጴፅሮሲካ ዬሱሳ ሃሆራ ካሊዴስ።

⁵⁵ ኣሳይ ቄሴታ ሃላቃ ጋꬃን ታማ ኤꬂዲ ሆዒሼ ኢሲ ቦላ ኡቲዳሼ ጴፅሮሲካ ኢስታራ ኢሲፌ ኡቲዴስ።

⁵⁶ ኢሲ ጋራዴያ ጴፅሮሲ ታማ ሆዒዛይታራ ኡቲዳይሳ ቤያዳኔ ቲሺ ኦꬃ ፄላዳ “ሃይሲ ኣዴዚካ ዬሱሳራ ዴስ!” ጋዱስ።

⁵⁷ ጴፅሮሲካ “ሃኔ ማጫሳዬ! ታ ኢዛ ኤሪኬ” ጊዲ ካዲዴስ።

³¹ Qasseka Yesusi Simoona xeygidi “Simoona! Xala7ey intena giste mala suraganas woossides.

³² Gido attin tani neeppe ammanoy dhayonta mala ne gish Xoossa woossadis; nekka simmida wode ne ishata minthetha” gides.

³³ Simoonikka zaaridi “Godo! Ta nenara qashettanassinne hayqqanas giiga uttadis” gides.

³⁴ Yesusikka zaaridi “Phexroosa hach kuttoy issito waassanas ‘Ta iza erikke’ gaada heedzdzuto ne tana kaadana” gides.

³⁵ Qasseka Yesusi ista “Ta intena kase caammay, korojoynne qaraxite baynda kiittida wode intes aazi paccidee?” giidi oychides. Istika “Aykkoykka paccibenna” gida.

³⁶ Izikka zaaridi “Ha7i gidikko korojokka qaraxiteyka dizadey oykko; giththa mashshay bayndadey ba may7o bayzidi shamo.

³⁷ Ta intes tuma gays ‘Makalatara izi issife taybettides’ geetetti kase xaafettida qaalay ta bolla polettana bessees; ta gish xaafettidayssas poloy tumappe gakkides” gides.

³⁸ Iza kaallizayti qasse “Godo! Hekko nam7u giththa mashshati hayssan deettes” gida. Izikka iza gish “Hayssi gidana” gides.

³⁹ Kase izas lose gidida mala pude Dabrazayte geetettiza zuma bolla kezi bides. Iza kaallizaytikka iza kaalli bida.

⁴⁰ Hee gakkida mala “Inte paacen gelonta mala woossite” gides.

⁴¹ Yesusi bana kaallizaytappe asi shuch olidi gaththanaso mala haakki biidi gulbati woossides.

⁴² “Ta Aawawu! Ne shene gidikko hanno metoyo taappe digga; gido attin ne sheney hanoppe attin ta sheney hanoppo” giidi woossides.

⁴³ Saloppe Kiitanchay qoncidi Yesusa minthethides.

⁴⁴ Izikka keehi xuugettidi woossishin iza asatethafe caway suutha mala gukkides.

⁴⁵ Woosappe dendidi bana kaallizaytakko bides. Istika izas mishetidi qoppishin dhiskoy efidashe Yesusi istako yiidi,

⁴⁶ “Ays dhisikeetii? Inte paacen gelonta mala ha7i dendidi woossite” gides.

⁴⁷ Izi buro haasayan dishin Yesusa kaallizaytappe issoy Yuhuda geetettizayssi banara daro asa kaalethi ekki yiidi Yesusa yeeranas izakko shiiqides.

⁴⁸ Gido attin Yesusi iza “Yuhuda! Tana Asa Naa yeeron aaththa immay?” gides.

⁴⁹ Yesusa yuuyi aadhdhi diza asay hanoza lo7ethi xeelidi “Godo! Haytanta mashshara buththinoo?” gida.

⁵⁰ Istafe issoy Qeeseta alafe ashkara ushacha haythe mashshara qanxides.

⁵¹ Yesusi ista “Inte ha7i taas aggite!” giidi ashkara haytha bochchidi pathides.

⁵² Qasseka iza oykkana yida Qeeseta halaqata Xoossa Keeththa alafetanne cimata “Panga oykkiza asa mala giththa mashshanne durqa ekkidi yidetii?

⁵³ Gallas gallas ta intenara Xoossa Keeththan dishin ta bolla kushe woththibeekketa; hayssi dhumay kawotida inte wode” gides.

⁵⁴ Hessafe guye Yesusa oykki ekkidi Qeeseta halaqaso gelida; Phexroosikka Yesusa hahora kaallides.

⁵⁵ Asay Qeeseta halaqa gaathan tama eethidi ho7ishe issi bolla uttidashe Phexroosikka istara issife uttides.

⁵⁶ Issi garadeya Phexroosi tama ho7izaytara uttidayssa beyadanne tishshi ooththa xeellada “Hayssi addezikka Yesusara dees!” gadus.

⁵⁷ Phexroosikka “Hanne macasaye! Ta iza erikke” giidi kadides.