ሉቃሳ 22:18-47 in Gamo

¹⁸ “ታ ኢንቴስ ቱሙ ጋይስ፤ ሃይሳፌ ጉዬ ፆሳ ካዎቴꬂ ያና ጋካናስ ናምዓንꬆ ሃ ዎይኔ ኡሻፌ ኡዪኬ” ጊዴስ።

¹⁹ ኡኬꬃ ኤኪዲ ፆሳ ጋላቲዴስ። ኢዛፔ ኢስታስ ሜንꬂ ኢሚዲ “ሃይሲ ኢንቴ ጊሽ ኢሜታና ታ ኣሾ ሌሚሶ ጊዲዛ ጊሽ ሃይሳ ኡባ ዎዴ ታና ቆፓናስ ኦꬂቴ” ጊዴስ።

²⁰ ኢዛꬆካ ካዎፔ ጉዬ ኡሻ ፁዓ ዴንꬂዲ “ሃይሲ ኡሻይ ኢንቴ ጊሽ ታ ሱꬃን ሃናና ኦራꬅ ጫቆ ዎጋ።

²¹ “ጊዶ ኣቲን ታና ኣꬂ ኢማናዴ ኩሼይ ታ ኩሼራ ኢሲፌ ማዳን ዴስ።

²² ኣሳ ናይ ካሴቲዲ ኢዛ ጊሽ ሃናናይሲ ዉሪ ኡቲዳ ማላ ኢዚ ባና፤ ጊዶ ኣቲን ኢዛ ኣꬂ ኢሚዛዴስ ኣዬ-ኣና” ጊዴስ።

²³ ኢስቲካ ሄሳ ኦꬃናይ ኦኔ? ጊዲ ባ ጊዶን ኢሶይ ኢሳ ኦይሼሬꬂዳ።

²⁴ ቃሴካ “ኦኒ ኦናፔ ኣꬊዛኮኔ” ጊዲ ባ ጊዶን ኢሶይ ኢሳራ ፓላሜቲዳ።

²⁵ ዬሱሲካ ኢስታ “ዴሬ ሃሪዛ ካዎቲ ባ ዴሬ ኣሳ ዎልቃራ ሃሬቴሲኔ ኢስቲካ ሎዖ ካዎታ ጌቴቲዲ ፄይጌቴቴስ።

²⁶ “ኢንቴ ጊዲኮ ሄሳꬆ ሃኖፒቴ፤ ኢንቴፌ ጊታ ጊዲዳዴይ ዎይኮ ታ ኦፔካ ኣꬋይስ ጊዛ ኣሲ ኡባፌ ቄሪ ና ማላ ጊዶ፤ ሃሪዛዴይ ሃሬቲዛዴ ማላ ጊዶ።

²⁷ ቁማ ኤቂዲ ሚዚዳዴፌኔ ኡቲዲ ሚዛዴፌ ኦኒ ኣꬊዜ? ኡቲዲ ሚዛዴ ጊዴኔ? ታኒ ቃሴ ኢንቴ ጊዶን ኣሽካራ ማላ ዳይስ።

²⁸ “ኢንቴን ጊዲኮ ታፔ ሻኬቶንታ ታ ዋዪሺን ታ ማታን ኤቂዳይታ።

²⁹ ታ ኣዋይ ታና ካዎꬂዳይሳ ማላ ታኒካ ታ ካዎቴꬃን ኢንቴና ካዎꬃና።

³⁰ ሄሲካ ታ ካዎቴꬃን ታ ማዳፌ ኢንቴ ማና ማላኔ ኡያና ማላ። ቃሴካ ታ ካዎቴꬃ ኣልጋን ኡቲዲ ታማኔ ናምዑ ኢስራዔሌ ናይታ ቦላ ፒርዳናሳ” ጊዴስ።

³¹ ቃሴካ ዬሱሲ ሲሞና ፄይጊዲ “ሲሞና! ፃላዔይ ኢንቴና ጊስቴ ማላ ሱራጋናስ ዎሲዴስ።

³² ጊዶ ኣቲን ታኒ ኔፔ ኣማኖይ ꬋዮንታ ማላ ኔ ጊሽ ፆሳ ዎሳዲስ፤ ኔካ ሲሚዳ ዎዴ ኔ ኢሻታ ሚንꬄꬃ” ጊዴስ።

³³ ሲሞኒካ ዛሪዲ “ጎዶ! ታ ኔናራ ቃሼታናሲኔ ሃይቃናስ ጊጋ ኡታዲስ” ጊዴስ።

³⁴ ዬሱሲካ ዛሪዲ “ጴፅሮሳ ሃች ኩቶይ ኢሲቶ ዋሳናስ ‘ታ ኢዛ ኤሪኬ’ ጋዳ ሄꬑቶ ኔ ታና ካዳና” ጊዴስ።

³⁵ ቃሴካ ዬሱሲ ኢስታ “ታ ኢንቴና ካሴ ጫማይ፥ ኮሮጆይኔ ቃራፂቴ ባይንዳ ኪቲዳ ዎዴ ኢንቴስ ኣዚ ፓጪዴ?” ጊዲ ኦይቺዴስ። ኢስቲካ “ኣይኮይካ ፓጪቤና” ጊዳ።

³⁶ ኢዚካ ዛሪዲ “ሃዒ ጊዲኮ ኮሮጆካ ቃራፂቴይካ ዲዛዴይ ኦይኮ፤ ጊꬃ ማሻይ ባይንዳዴይ ባ ማይዖ ባይዚዲ ሻሞ።

³⁷ ታ ኢንቴስ ቱማ ጋይስ ‘ማካላታራ ኢዚ ኢሲፌ ታይቤቲዴስ’ ጌቴቲ ካሴ ፃፌቲዳ ቃላይ ታ ቦላ ፖሌታና ቤሴስ፤ ታ ጊሽ ፃፌቲዳይሳስ ፖሎይ ቱማፔ ጋኪዴስ” ጊዴስ።

³⁸ ኢዛ ካሊዛይቲ ቃሴ “ጎዶ! ሄኮ ናምዑ ጊꬃ ማሻቲ ሃይሳን ዴቴስ” ጊዳ። ኢዚካ ኢዛ ጊሽ “ሃይሲ ጊዳና” ጊዴስ።

³⁹ ካሴ ኢዛስ ሎሴ ጊዲዳ ማላ ፑዴ ዳብራዛይቴ ጌቴቲዛ ዙማ ቦላ ኬዚ ቢዴስ። ኢዛ ካሊዛይቲካ ኢዛ ካሊ ቢዳ።

⁴⁰ ሄ ጋኪዳ ማላ “ኢንቴ ፓጬን ጌሎንታ ማላ ዎሲቴ” ጊዴስ።

⁴¹ ዬሱሲ ባና ካሊዛይታፔ ኣሲ ሹች ኦሊዲ ጋꬃናሶ ማላ ሃኪ ቢዲ ጉልባቲ ዎሲዴስ።

⁴² “ታ ኣዋዉ! ኔ ሼኔ ጊዲኮ ሃኖ ሜቶዮ ታፔ ዲጋ፤ ጊዶ ኣቲን ኔ ሼኔይ ሃኖፔ ኣቲን ታ ሼኔይ ሃኖፖ” ጊዲ ዎሲዴስ።

⁴³ ሳሎፔ ኪታንቻይ ቆንጪዲ ዬሱሳ ሚንꬄꬂዴስ።

⁴⁴ ኢዚካ ኬሂ ፁጌቲዲ ዎሲሺን ኢዛ ኣሳቴꬃፌ ጫዋይ ሱꬃ ማላ ጉኪዴስ።

⁴⁵ ዎሳፔ ዴንዲዲ ባና ካሊዛይታኮ ቢዴስ። ኢስቲካ ኢዛስ ሚሼቲዲ ቆፒሺን ꬊስኮይ ኤፊዳሼ ዬሱሲ ኢስታኮ ዪዲ፥

⁴⁶ “ኣይስ ꬊሲኬቲ? ኢንቴ ፓጬን ጌሎንታ ማላ ሃዒ ዴንዲዲ ዎሲቴ” ጊዴስ።

⁴⁷ ኢዚ ቡሮ ሃሳያን ዲሺን ዬሱሳ ካሊዛይታፔ ኢሶይ ዩሁዳ ጌቴቲዛይሲ ባናራ ዳሮ ኣሳ ካሌꬂ ኤኪ ዪዲ ዬሱሳ ዬራናስ ኢዛኮ ሺቂዴስ።

¹⁸ “Ta intes tumu gays; hayssafe guye Xoossa Kawotethi yaana gakkanaas nam7antho ha woyne ushshafe uyikke” gides.

¹⁹ Uketha ekkidi Xoossa galatides. Izappe istas menthi immidi “Hayssi inte gish imettana ta asho leemiso gidiza gish hayssa ubba wode tana qoppanas ooththite” gides.

²⁰ Izathoka kawoppe guye ushsha xu7a denthidi “Hayssi ushshay inte gish ta suuthan hanana oorath caaqo woga.

²¹ “Gido attin tana aaththi immanade kushey ta kushera issife maaddan dees.

²² Asa Nay kasetidi iza gish hananayssi wuri uttida mala izi baana; gido attin iza aaththi immizades aayye-ana” gides.

²³ Istika hessa ooththanay oonee? giidi ba giddon issoy issa oysherethida.

²⁴ Qasseka “Ooni oonappe aadhdhizakkonne” giidi ba giddon issoy issara palamettida.

²⁵ Yesusikka ista “Dere haariza kawoti ba dere asa wolqara haarettessinne istika lo7o kawota geetettidi xeygettetes.

²⁶ “Inte gidikko hessatho hanoppite; intefe gita gididadey woykko ta ooppekka aadhdhays giza asi ubbafe qeeri naa mala gido; haarizaddey haarettizade mala gido.

²⁷ Quma eqqidi mizidadefenne uttidi mizadefe ooni aadhdhizee? Uttidi mizade gidennee? Tani qasse inte giddon ashkara mala days.

²⁸ “Inten gidikko taappe shaaketonta ta waayishin ta matan eqqidayta.

²⁹ Ta Aaway tana kawothidayssa mala tanikka ta kawoteththan intena kawoththana.

³⁰ Hessika ta kawoteththan ta maaddafe inte maana malanne uyana mala. Qasseka ta kawoteththa algan uttidi tammanne nam7u Isra7eele nayta bolla pirdanassa” gides.

³¹ Qasseka Yesusi Simoona xeygidi “Simoona! Xala7ey intena giste mala suraganas woossides.

³² Gido attin tani neeppe ammanoy dhayonta mala ne gish Xoossa woossadis; nekka simmida wode ne ishata minthetha” gides.

³³ Simoonikka zaaridi “Godo! Ta nenara qashettanassinne hayqqanas giiga uttadis” gides.

³⁴ Yesusikka zaaridi “Phexroosa hach kuttoy issito waassanas ‘Ta iza erikke’ gaada heedzdzuto ne tana kaadana” gides.

³⁵ Qasseka Yesusi ista “Ta intena kase caammay, korojoynne qaraxite baynda kiittida wode intes aazi paccidee?” giidi oychides. Istika “Aykkoykka paccibenna” gida.

³⁶ Izikka zaaridi “Ha7i gidikko korojokka qaraxiteyka dizadey oykko; giththa mashshay bayndadey ba may7o bayzidi shamo.

³⁷ Ta intes tuma gays ‘Makalatara izi issife taybettides’ geetetti kase xaafettida qaalay ta bolla polettana bessees; ta gish xaafettidayssas poloy tumappe gakkides” gides.

³⁸ Iza kaallizayti qasse “Godo! Hekko nam7u giththa mashshati hayssan deettes” gida. Izikka iza gish “Hayssi gidana” gides.

³⁹ Kase izas lose gidida mala pude Dabrazayte geetettiza zuma bolla kezi bides. Iza kaallizaytikka iza kaalli bida.

⁴⁰ Hee gakkida mala “Inte paacen gelonta mala woossite” gides.

⁴¹ Yesusi bana kaallizaytappe asi shuch olidi gaththanaso mala haakki biidi gulbati woossides.

⁴² “Ta Aawawu! Ne shene gidikko hanno metoyo taappe digga; gido attin ne sheney hanoppe attin ta sheney hanoppo” giidi woossides.

⁴³ Saloppe Kiitanchay qoncidi Yesusa minthethides.

⁴⁴ Izikka keehi xuugettidi woossishin iza asatethafe caway suutha mala gukkides.

⁴⁵ Woosappe dendidi bana kaallizaytakko bides. Istika izas mishetidi qoppishin dhiskoy efidashe Yesusi istako yiidi,

⁴⁶ “Ays dhisikeetii? Inte paacen gelonta mala ha7i dendidi woossite” gides.

⁴⁷ Izi buro haasayan dishin Yesusa kaallizaytappe issoy Yuhuda geetettizayssi banara daro asa kaalethi ekki yiidi Yesusa yeeranas izakko shiiqides.