ሉቃሳ 20:1-14 in Gamo

¹ ኢሲ ጋላስ ዬሱሲ ኣሳ ፆሳ ኬꬃን ታማርሲሺኔ ሚሺራቾ ቃላ ሳባኪሺን ቄሴ ሃላቃቲ ፃፌቲኔ ዴሬ ጪማቲ ሺቄቲዲ ኢዛኮ ዪዳ።

² “ሃይሳ ኔ ኦꬂዛይ ኦና ሼኔኔ? ኔስ ሼኔ ኢሚዳይ ኦኔ?” ጊዲ ኢዛ ኦይቺዳ።

³ ኢዚካ ኢስታስ “ታካ ኢንቴና ኢሲ ኦይሾ ኦይቻይስ፤ ኣኔ ታስ ዛሪቴ።

⁴ ዮሃኒሳ ፂንቃታይ ሳሎፔዬ? ኣሳፔ?” ጊዴስ።

⁵ ኢስቲካ ባ ጊዶን ኢሶይ ኢሳራ “ኑ ‘ዮሃኒሳ ፂንቃታይ ሳሎፔ’ ጊኮ ኢዚ ኑና ‘ሂስቲን ኣዛስ ኣማኒቤኬቲ?’ ጋና።

⁶ ‘ኣሳፔ’ ጊኮ ኣሳይ ዉሪ ዮሃኒሲ ናቤ ጊዲዳይሳ ኣማኒዛ ጊሽ ኑና ሹቻራ ጫዳና” ጊ ዞሬቲዳ።

⁷ ሄሳ ጊሽ “ኢዚ ኣዋፔኮኔ ኑ ኤሮኮ” ጊዲ ዛሪዳ።

⁸ ዬሱሲካ ሂስቲኮ “ታካ ኣዛ ዎልቃን ኦꬂዛኮኔ ኢንቴስ ዮቲኬ” ጊዴስ።

⁹ ቃሴካ ዬሱሲ ኣሳስ ሌሚሶራ “ኢሳዴይ ዎይኔ ሚꬅ ቶኪዴስ፤ ጋዴ ጎዪዛይታስ ኪራ ኢሚዲኔ ሃራ ዴሬ ቢዲ ሄን ጋምዒዴስ።

¹⁰ ካፂዛ ቦኔ ዎዴ ካꬃፌ ኤኪ ያና ማላ ባ ኣሽካራታፔ ኢሳዴ ጋዴዛ ጎይዳ ኣሳታኮ ዬዲን ጋዳ ጎዪዛይቲ ኪታ ቢዳይሳ ቆፂዲ ሜላ ኩሼ ዬዲዳ።

¹¹ ካሌꬂዲካ ሃራ ኣሽካራ ዬዲን ጎሻንቻቲ ሃዒካ ኦይኪ ቆፂዲኔ ካዉሺዲ ሜላ ዬዲዳ።

¹² ሃዒካ ካሌꬂዲ ሄꬓንꬆ ኣሽካራ ዬዲን ጎሻንቻቲ ኢዛካ ቆፄሬꬂ ማዱንꬂዲ ጌዴ ካሬ ኬሲ ዬጊዳ።

¹³ “ዎይኔ ሚꬃ ጎዳይ ‘ሃዒ ኣይ ኦꬆ? ኦኔ ኤሪዛይ ታ ኬሃ ሲቂዛ ታ ናዛ ዬዲዳኮ ኢዛ ቦንቻንዴቶሻ?’ ጊዴስ።

¹⁴ “ጊዶ ኣቲን ቢታ ጎዪዛይቲ ናዛ ቤዪዳ ማላ ባ ጊዶን ‘ሃይሲ ኢዛ ላታና ናዛ ጊዴኔ? ሃ ዪቴ ኢዛ ዎꬊዲ ቢታ ላቶስ’ ጊዲ ዞሬቲዳ።

¹ Issi gallas Yesusi asaa Xoossa Keeththan tamarsishinne Mishiraachcho qaala sabakishin Qeese halaqati Xaafetinne dere Cimati shiiqettidi izakko yida.

² “Hayssa ne ooththizay oona shenenee? Nees shene immiday oonee?” giidi iza oychida.

³ Izikka istas “Takka intena issi oysho oychays; ane taas zaarite.

⁴ Yohannisa xinqatay saloppeyee? Asappee?” gides.

⁵ Istika ba giddon issoy issara “Nu ‘Yohannisa xinqatay saloppe’ giikko izi nuna ‘Histin aazas ammanibeekketii?’ gaana.

⁶ ‘Asappe’ giikko asay wuri Yohannisi nabe gididayssa ammaniza gish nuna shuchchara caddana” gi zorettida.

⁷ Hessa gish “Izi awappekkonne nu erokko” giidi zaarida.

⁸ Yesusikka histikko “Takka aaza wolqan ooththizakkonne intes yootikke” gides.

⁹ Qasseka Yesusi asaas leemisora “Issadey woyne mith tokkides; gade goyizaytas kira immidinne hara dere biidi heen gam7ides.

¹⁰ Kaxiza bone wode kathafe ekki yaana mala ba ashkaratappe issade gadeza goyda asatakko yeddin gadaa goyizayti kiita bidayssa qoxidi mela kushe yeddida.

¹¹ Kaalethidikka hara ashkara yeddin goshshanchati ha7ikka oykki qoxidinne kawushshidi mela yeddida.

¹² Ha7ikka kaaleththidi heedzdzantho ashkara yeddin goshshanchati izakka qoxerethi madunthidi gede kare kessi yeggida.

¹³ “Woyne mitha goday ‘Ha7i ay ooththoo? Oone erizay ta keeha siiqiza ta naaza yeddidakko iza bonchandettoshaa?’ gides.

¹⁴ “Gido attin biitta goyizayti naaza beyida mala ba giddon ‘Hayssi iza laattana naaza gidennee? Haa yiite iza wodhidi biitta laattoos’ giidi zoretida.