ሉቃሳ 1:8-42 in Gamo

⁸ ዛካራሲ ፆሳ ሲንꬃን ቄሴቴꬃ ኦሶ ታራይ ኢዛ ጋኪን ኢዚ ኦꬂሺን

⁹ ቄሴታስ ዲዛ ዎጋ ማላ ፆሳ ኬꬃን ጌሊዲ ኤፃኔ ጩዋሳና ማላ ኤፃይ ኢዛ ጋኪዴስ።

¹⁰ ኤፃኔይ ጩዋቲሺን ኣሳይ ዉሪካ ካሬን ዲዲ ዎሴስ።

¹¹ ጎዳ ኪታንቻይ ኤፃኔይ ጩዋቲዛ ሶፔ ኡሻቻ ባጋራ ኤቂዲ ዛካራሳስ ቤቲዴስ።

¹² ዛካራሲካ ኢዛ ቤዪዲ ኬሂ ዳጋሚዲ ባቢዴስ።

¹³ ኪታንቻይ ዛካራሳስ “ባቦፋ! ኔ ዎሳይ ሴቴቲዴስ፥ ኔ ማቼያ ኤሊሳቤፃ ኔስ ኣቱማ ና ዬላና ኢዛ ሱንꬃካ ኔ ዮሃኒሳ ጋዳ ሱንꬃና።

¹⁴ ኢዛ ዬሌታን ኔኒ ዳሮ ኡፋዬታና፤ ዳሮ ኣሳይካ ኡፋዬታና።

¹⁵ ጎዳ ሲንꬃን ኢዚ ጊታ ጊዳና። ዎይኔፔ ኦሴቲዳ ጫጄ ጊዲንካ ሃራ ማꬆሲዛ ኡሻ ጊዲንካ ኢዚ ኡዬና፤ ኢዚ ቡሮ ባ ኣዬይ ቃንꬃን ዲሼ ፂሎ ኣያናን ኩማና።

¹⁶ ኢስራዔሌ ኣሳፔ ዳሮታ ኢስታ ፆሳኮ ዛራና።

¹⁷ ኣዋታ ዎዝና ኢስታ ናይታኮ፥ ኣዛዜቶንታይቲካ ጌዴ ፂሎታ ጪንጫቴꬃኮ ዛራና ማላኔ ጎዳስ ቤሲዛ ዴሬ ጊጊሳና ማላ ኤላሳ ኣያናኔ ኢዛ ዎልቃን ጎዳፔ ሲንꬃራ ኢዚ ባና” ጊዴስ።

¹⁸ ዛካራሲ ኪታንቻስ፥ “ታኒ ጪማ፤ ታ ማቼያካ ጪማዱስ፤ ታኒ ሃይሳ ኣዛን ኤራኔ?” ጊዲ ኦይቺዴስ።

¹⁹ ኪታንቻይካ ዛሪዲ “ታኒ ፆሳ ሲንꬃን ኤቂዛ ጋብሬሌ። ታኒካ ሃ ሚሺራቾዛ ኔስ ጋꬃናስ ኪቴታዳ ያዲስ።

²⁰ ሄኮ ኔኒ ባ ዎዴን ፖሌታና ታ ቃላ ኣማኖንታ ኢፂዳ ጊሽ ኔ ዱናይ ዱዳና፥ ኔኒካ ሃሳያና ዳንዳያካ” ጊዴስ።

²¹ ሄ ዎዴ ዴሬይ ዛካራሲ “ፆሳ ኬꬃፌ ኬዞንታ ኣዛስ ጋምዒዳኮ” ጊዲ ሞꬌቲሼ ናጊዴስ።

²² ኢዚ ፆሳ ኬꬃፌ ኬዚዲ ኣሳ ሃሳዪሳናስ ዳንዳይቤና። ማላቲ ማላቲ ቤሶፔ ኣቲን ሃሳያናስ ዳንዳዮንታ ኣጊን ኣሳይ ኢዚ ፆሳ ኬꬃን ፆሳፌ ኦራꬃ ሚሽ ቤዪዳይሳ ኤሪዴስ።

²³ ዛካራሲካ ባ ኦሶ ታራይ ፖሌቲዳፔ ጉዬን ባሶ ሲሚዴስ።

²⁴ ሄሳፌ ካሊን ኢዛ ማቼያ ኤሊሳቤፃ ና ቃንꬃታዱስ፥ ኢቻሻንꬆ ኣጊናይ ጋካናስ ኣሲ ባና ቤዮንታ ማላ ቆቴታዱስ።

²⁵ ኢዛካ ጎዳይ ባ ማሮታን ታ ሌቄቲዳይሳ ኣሳ ጊዶፌ ዲጋናስ ሃ ዎዴዛን ሃይሳ ታስ ኦꬂዴስ ጋዱስ።

²⁶ ኤልሳቤፃ ቃንꬃቲዳ ኡሱፑንꬃ ኣጊናን፥ ፆሲ ባ ኪታንቻ ጋብሬሌ፥ ጋሊላ ቢታን ዲዛ፥ ናዚሬቴ ጊዛ ካታማ ዬዲዴስ።

²⁷ ኢዚካ ካዎ ዳዉቴ ዜሬꬅ ጊዲዳ ዮሴፌ ጌቴቲዛ ኣሳስ ጊጋ ኡቲዳ ማራሞ ጌቴቲዛ ጌላዖይኮ ኪቴቲዴስ።

²⁸ ዪዲኔ ኢዛ ዲዛሶ ጌሊዲ “ሃኔ ፆሲ ኔና ኣንጂዳሬ ሳሮ ፆሲ ጎዳይ ኔናራ ዴስ ኔንካ ኣንጄቲዳሮ” ጊዴስ።

²⁹ ማራማ ኪታንቻ ሃሳያን ኬሃ ዳጋማዳ፥ “ሃይሲ ኣይ ጊዛ ሳሮታ?” ጋዳ ዮዖዛ ኬሃ ቆፓዱስ።

³⁰ ኪታንቻይካ ማራሞ “ፆሲ ኔናን ኡፋዬቲዛ ጊሽ ባቦፋ!

³¹ ኔኒ ቃንꬃታና፤ ኣቱማ ናካ ዬላና፥ ሱንꬃካ ዬሱሳ ጋዳ ሱንꬃና፤

³² ኢዚካ ጊታ ጊዳና፤ ኡባፌ ቦላ ፆሳ ና ጌቴታና፥ ጎዳ ፆሲ ኢዛ ኣዋ ዳዉቴ ካዎቴꬃ ኢዛስ ኢማና።

³³ ኢዚ ኢስራዔሌ ናይታ ቦላን ሜርናስ ካዎታና፤ ኢዛ ካዎቴꬃሲካ ዉርሴꬂ ዴና” ጊዴስ።

³⁴ ማራማካ ኪታንቻስ “ታኒ ኣዴ ጌላቤኬ፥ ሺን ሃይሲ ዋኒ ሃናኔ?” ጋዳ ኦይቻዱስ።

³⁵ ኪታንቻይካ ማራሚሲ “ፂሎ ኣያናይ ኔ ቦላ ዎꬋና ዉርሶፌ ቦላ ፆሳ ዎልቃይ ኔ ቦላ ኩዋሳና፤ ሄሳ ጊሽ ዬሌታና ናዚ ጌሻ ፆሳ ና ጌቴታና።

³⁶ ኣሲ ዬሉኩ ኢዛ ማካራ ጊዲ ሃሳዪዛ ኔ ዳቦያ ኤሊሳቤፃ ጪማቴꬃን ኣቱማ ና ቃንꬃታዳ ዬላናስ ኡሱፑንꬆ ኣጊና ኦይካዱስ።

³⁷ ፆሳሲ ሃኖንታ ሚሺ ባዋ”

³⁸ ማራማካ ዛራዳ “ሄኮ ታኒ ፆሳ ኣይሌ ዲኪና፤ ኔ ጊዳ ማላ ታስ ሃኖ” ጊን ኪታንቻይ ኢዚፔ ሻካቲዲ ቢዴስ። ማራማ ኤሊሳቤፆ ቤያና ባዱስ።

³⁹ ማራማካ ሄ ዎዴ ማታራ ኤሶታ ዴንዳዳ ፑዴ ጌዜ ዴሬን ዲዛ ኢሲ ዩሁዳ ካታማ ባዱስ።

⁴⁰ ዛካራሳ ኬꬄ ጌላዳ ኤሊሳቤፆ ሳሮታዱስ።

⁴¹ ኤሊሳቤፃ ማራሚ ሳሮꬃ ሲዪዳ ማላ ቃንꬃን ዲዛ ናዚ ኢዚ ቃንꬃን ጉፒዴስ፥ ኤሊሳቤፂንካ ፂሎ ኣያናይ ኩሚዴስ።

⁴² ኢዛካ ባ ቃላ ꬎቁ ኦꬃዳ “ማጫሳ ኡባፌ ኔ ኣንጄቲዳሮ፤ ኔ ቃንꬃን ዲዛ ናዚካ ኣንጄቲዳይሳ።

⁸ Zakaraassi Xoossa sinthan Qeesetetha ooso taray iza gakkin izi ooththishin

⁹ Qeesetas diza woga mala Xoossa Keeththan gelidi exane cuwassana mala exay iza gakkides.

¹⁰ Exaney cuwattishin asay wurikka karen diidi woosses.

¹¹ Goda kiitanchay exaney cuwattiza soppe ushachcha baggara eqqidi Zakaraasas beettides.

¹² Zakaraasikka iza beyidi keehi daggammidi babbides.

¹³ Kiitanchay Zakaraasas “Babbofa! Ne woossay seetettides, ne macheya Elisabeexa nees attuma naa yelana iza sunthaka ne Yohannisa gaada sunthana.

¹⁴ Iza yelettan neni daro ufayettana; Daro asaykka ufayettana.

¹⁵ Goda sinthan izi gita gidana. Woyneppe oosettida cajje gidinka hara mathosiza ushsha gidinka izi uyenna; izi buro ba aayey qanthan dishe Xillo Ayanan kumana.

¹⁶ Isra7eele asappe darota ista Xoossako zaarana.

¹⁷ Aawata wozna ista naytaakko, azazetontaytikka gede Xillota cincateththakko zaarana malanne Godas bessiza dere giigissana mala Elaasa Ayananne iza wolqan Godappe sinthara izi baana” gides.

¹⁸ Zakaraassi kiitanchas, “Tani cima; ta macheyakka cimmadus; tani hayssa aazan eranee?” giidi oychides.

¹⁹ Kiitanchaykka zaaridi “Tani Xoossa sinthan eqqiza Gabrelle. Tanikka ha Mishiraachchoza nees gaththanas kiitetada yadis.

²⁰ Hekko neni ba woden polettana ta qaala ammanonta ixida gish ne duunay duudana, nenikka haasayana dandayakka” gides.

²¹ He wode derey Zakaraassi “Xoossa Keeththafe kezonta aazas gam7idakko” giidi modhetishe naagides.

²² Izi Xoossa Keeththafe kezidi asa haasayissanas dandaybenna. Malati malati besoppe attin haasayanas dandayonta aggin asay izi Xoossa Keeththan Xoossafe ooratha miish beyidayssa erides.

²³ Zakaraasikka ba ooso taray poletidappe guyen baso simmides.

²⁴ Hessafe kaallin iza macheya Elisabeexa naa qanthatadus, ichashantho aginay gakkanaas asi bana beyonta mala qotetadus.

²⁵ Izakka Goday ba maarotan ta leqettidayssa asa giddofe digganas ha wodezan hayssa taas ooththides gadus.

²⁶ Elsabeexa qanthatida usuppuntha aginan, Xoossi ba kiitancha Gabrelle, Galila biittan diza, Naazirete giza katama yeddides.

²⁷ Izikka kawo Dawute zereth gidida Yoosefe geetettiza asas giiga uttida Maaramo geetettiza geela7oykko kiitettides.

²⁸ Yiidinne iza dizaaso gelidi “Hanne Xoossi nena anjidare saro Xoossi Goday nenara dees nenka anjettidaaro” gides.

²⁹ Maarama kiitancha haasayan keeha daggammada, “Hayssi ay giza sarotaa?” gaada yo7oza keeha qoppadus.

³⁰ Kiitanchaykka Maaramo “Xoossi nenan ufayetiza gish babbofa!

³¹ Neni qanthatana; attuma naaka yelana, sunthaka Yesusa gaada sunthana;

³² Izikka gita gidana; ubbafe bolla Xoossa naa geetettana, Goda Xoossi iza aawa Dawute kawoteththa izas immana.

³³ Izi Isra7eele nayta bollan mernas kawotana; iza Kawotethasikka wursethi deenna” gides.

³⁴ Maaramakka kiitanchas “Tani adde gelabeekke, shin hayssi waani hananee?” gaada oychadus.

³⁵ Kiitanchaykka Maaramisi “Xillo Ayanay ne bolla wodhana wursofe bolla Xoossa wolqay ne bolla kuwasana; Hessa gish yelettana naazi Geeshsha Xoossa naa geetettana.

³⁶ Asi yeluku iza makkara giidi haasayiza ne dabboya Elisabeexa cimateththan attuma naa qanthatada yelanas usuppuntho agina oykkadus.

³⁷ Xoossassi hanonta miishi baawa”

³⁸ Maaramakka zaarada “Hekko tani Xoossa aylle diikkina; ne gida mala taas hano” giin kiitanchay izippe shaakatidi bides. Maarama Elisabeexo beyana badus.

³⁹ Maaramakka he wode matara eesota dendada pude gezze deren diza issi Yuhuda katama badus.

⁴⁰ Zakaraasa keeththe gelada Elisabeexo sarotadus.

⁴¹ Elisabeexa Maarami sarotha siyida mala qanthan diza naazi izi qanthan guppides, Elisabeexinka Xillo Ayanay kumides.

⁴² Izakka ba qaala dhoqu ooththada “Macasa ubbafe ne anjettidaaro; Ne qanthan diza naazikka anjettidayssa.