ሉቃሳ 19:9-20 in Gamo

⁹ ዬሱሲካ “ሃ ኣዴዚ ኣብራሃሜ ና ጊዲዳ ጊሽ ሃች ሃ ኬꬃስ ፓፃቴꬂ ዪዴስ” ጊዴስ።

¹⁰ ሃይሳስ ጋሶይካ ኣሳ ናይ ሃ ዪዳይ ꬋዪዳይሳ ኮያናሲኔ ኣሻናሳ።

¹¹ ኣሳይ ሃይሳ ሲዪሺን ሌሚሶራ ሃሳያ ኦይኪዴስ፤ ጋሶይካ ኢዚ ዬሩሳላሜ ጋካናስ ማቲዳ ጊሺኔ ኣሳታስ ፆሳ ካዎቴꬅ ቆንጫና ሃኒዛ ሚሳቲዳ ጊሻሳ።

¹² ሄሳ ጊሽ “ኢሲ ካዎ ናይ ባ ካዎቴꬃ ሹሜቴꬅ ኤኪ ያናስ ሃሆ ቢታ ቢዴስ።

¹³ ባ ኣሽካራታ ጊዶፌ ታማታ ፄይጊዲ ታሙ ሚናኔ ኢስታስ ኢሚዲ ‘ታ ሲማዳ ያና ጋካናስ ሃይሳ ሚሻን ዛልዒቴ’ ጊዴስ።

¹⁴ “ሄ ዴሬ ኣሳቲ ቃሴ ኢዛ ኢፂዳ ጊሽ ‘ሃይሲ ኣዴዚ ኑ ቦላ ካዎታና ማላ ኮዮኮ’ ጊዲ ኣስ ኢዛ ጌዶራ ኪታ ኣꬂ ዬዲዳ።

¹⁵ “ጊዶ ኣቲን ሃ ካዎ ናዚ ካዎ ጊዲዲ ጉዬ ባ ዴሬ ሲሚዴስ። ካሴ ቢሼ ታሙ ሚናኔ ኢሚዳ ታሙ ኣሽካራቲ ኢዚ ኢሚዳ ቢራን ዛልዒዲ ኣይ ኬና ቲርፊሲዳኮኔ ኤራናስ ኢስታ ፄይጊዴስ።

¹⁶ “ኢስታፌ ኮይሮይ ሺቂዲ ‘ጎዶ! ኔ ታስ ኢሚዳ ታሙ ሚናኔይ ሃራ ታሙ ዬሊዴስ’ ጊዴስ።

¹⁷ “ጎዳዚካ ኢዛ ‘ኔ ኣማኔቲዳ ኣሽካራ፤ ሎዖ ኦꬃዳሳ። ኔ ጉꬃ ሚሻን ኣማኔቲዳ ጊሽ ታሙ ካታማታ ኔ ሃራና ማላ ኔስ ኢማዲስ’ ጊዴስ።

¹⁸ “ናምዓንꬆዚካ ኢዛኮ ሺቂዲ ‘ጎዶ! ኔ ታስ ኢሚዳ ሚናኔፔ ሃራ ኢቻሹ ሚናኔይ ዎꬊዴስ’ ጊዴስ።

¹⁹ “ኢዛ ጎዳዚ ኢዛስ ዛሪዲ ‘ኔኒ ኣይሳና ማላ ታሙ ካታማቲ ኔስ ኢሜቲዳ’ ጊዴስ።

²⁰ “ቃሴካ ሃንኮ ኦሳንቻይ ሺቂዲ ‘ጎዶ! ኔኒ ዎꬆንታሶፔ ኤኪዛዴ፤ ዜሮንታሶፔ ማፂዛዴኔ ሜንፄ ኢታ ኣስ ጊዲዳ ጊሽ ታ ኔስ ባባዳ ጩርቃን ፃፃ ዎꬂዳ ኔ ሚናኔዮ ሄይ ኤካ’ ጊዴስ።

⁹ Yesusikka “Ha addezi Abrahaame naa gidida gish hach ha keeththas paxatethi yides” gides.

¹⁰ Hayssas gaasoyka Asa Nay haa yiday dhayidayssa koyanassinne ashshanassa.

¹¹ Asay hayssa siyishin leemisora haasaya oykkides; gaasoyka izi Yerusalame gakkanaas matida gishshinne asatas Xoossa Kawoteth qoncana haniza misatida gishassa.

¹² Hessa gish “Issi kawo nay ba kawoteththa shuumeteth ekki yaanas haaho biitta bides.

¹³ Ba ashkarata giddofe tammata xeygidi tammu minane istas immidi ‘Ta simmada yaana gakkanaas hayssa miishan zal7ite’ gides.

¹⁴ “He dere asati qasse iza ixida gish ‘Hayssi addezi nu bolla kawotana mala koyokko’ giidi as iza geedora kiita aaththi yeddida.

¹⁵ “Gido attin ha kawo naazi kawo gididi guye ba dere simmides. Kase bishe tammu minane immida tammu ashkarati izi immida biran zal7idi ay keena tirfisidakkonne eranas ista xeygides.

¹⁶ “Istafe koyroy shiiqidi ‘Godo! Ne taas immida tammu minaney hara tammu yelides’ gides.

¹⁷ “Godazikka iza ‘Ne ammanettida ashkara; lo7o ooththadasa. Ne guutha miishan amanettida gish tammu katamata ne haarana mala nees immadis’ gides.

¹⁸ “Nam7anthozikka izakko shiiqidi ‘Godo! Ne taas immida minaneppe hara ichashu minaney wodhdhides’ gides.

¹⁹ “Iza godazi izas zaaridi ‘Neni ayssana mala tammu katamati nees imettida’ gides.

²⁰ “Qasseka hanko oosanchay shiiqidi ‘Godo! Neni woothontasoppe ekkizadde; zerontasoppe maxizadenne menxe iita as gidida gish ta nees babbada curqan xaaxa woththida ne minaneyo hey ekka’ gides.