ሉቃሳ 11:27-52 in Gamo

²⁷ ዬሱሲ ሄሳ ሃሳዪዛ ዎዴ ኣሳ ጊዶፌ ኢሲ ማጫስ ዲዛራ ባ ቃላ ꬎቁ ኦꬃዳ “ኔና ቶኪዳ ቃንꬂኔ ኔ ꬋሚዳ ꬋንꬃቲ ኣንጄቲዳይታ” ጋዱስ።

²⁸ ጊዶ ኣቲን ኢዚ “ኣንጄቲዳይቲ ፆሳ ቃላ ሲይዲ ኣዛዜቲዛይታ” ጊዴስ።

²⁹ ዳሮ ዴሬይ ዬሱሳኮ ሺቂዳ ዎዴ ዬሱሲ “ሃይሲ ዬሌታይ ኢታ ዬሌታ፤ ጊታ ማላታ ቤያናስ ኮዬስ። ጊዶ ኣቲን ዮናሳ ማላታፔ ሃራ ዱማ ማላታይ ኢሜቴና።

³⁰ ጋሶይካ ዮናሲ ናናዌ ኣሳስ ማላታ ጊዲዳ ማላ ኣሳ ናይ ታኒ ሃ ዬሌታስ ማላታ ጊዳና።

³¹ ዱጌሃ ዴሬ ማጫ ካዎያ ሶሎሞኔ ኤራቴꬅ ቤያናስ ቢታ ጋፃፔ ዴንዳዳ ዪዳ ጊሽ ፒርዳ ዎዴ ኢዛ ሃ ዬሌታራ ዴንዳዳ ፒርዳና፤ ሄኮ ሶሎሞኔፔ ኣꬊዛዴይ ሃን ዴስ።

³² ዮናሲ ሳባኪሺን ሲይዲ ናናዌ ኣሳይ ባ ናጋራፔ ማሮቲዳ ጊሽ ሃ ዬሌታራ ኢሲፌ ዴንዲዲ ፒርዳና። ጊዶ ኣቲን ዮናሳፔ ኣꬊዛይ ሃን ዴስ።

³³ “ፆምፔ ኦይꬂዲ ካሬፔ ጌሊዛ ኣሳስ ፖዓና ማላ ቆንጬሶን ዎꬄቴስ ኣቲን ጌማሶን ዎꬂዛ ኣሲ ዴና።

³⁴ ኔ ኣሳቴꬃስ ፖዖይ ኔ ኣይፌ፤ ኔ ኣይፌይ ፓፃ ጊዲኮ ኔ ኩሜꬃ ኣሳቴꬃይ ፖዖ ጊዳና። ኔ ኣይፌይ ሳኬቲኮ ኔ ኩሜꬃ ኣሳቴꬃይ ꬉማ ጊዳና።

³⁵ ሄሳ ጊሽ ኔናን ዲዛ ፖዖይ ꬉሞንታ ማላ ናጌታ።

³⁶ ሂስቲኮ ኔ ኣሳቴꬃይ ፖዖ ጊዲኮ ꬉሚዳ ኣሳቴꬂ ዴና ኣጊኮ ኔ ኩሜꬃ ኣሳቴꬃይ ፆምፔ ሎዔꬂ ፖዒዛ ማላ ሎዒ ቤታና” ጊዴስ።

³⁷ ዬሱሲ ሃሳያ ዉርሲዳ ማላ ኢሲ ፋርሳዌይ ባናራ ቁማ ማናስ ዬሱሳ ፄይጊዴስ።

³⁸ ዬሱሲ ቁማ ማና ኩሼ ሜጬቶንታ ኣጊዳይሳ ቤዪዲ ማላሌቲዳ።

³⁹ ጎዳይ ኢዛስ “ሃዒ ኢንቴ ፋርሳዌቲ ፁዓሲኔ ኬሬስ ቦላ ባጋ ሜጪ ጌሼታ፤ ኢንቴ ጊዶ ባጋዚ ኡዜቴꬃኒኔ ኢታቴꬃን ኩሚዴስ።

⁴⁰ ኢንቴኖ ኤያቶ! ካሬ ባጋ ሜꬊዳይ ጊዶ ባጋ ሜꬊቤኔ?

⁴¹ ዮዖን ጊዲኮ ጊዶን ዲዛይሳ ሙፁዋታ ኢሚቴ፤ ሄ ዎዴ ዉሪካ ኢንቴስ ጌሽ ጊዳና።

⁴² “ኢንቴኖ ፋርሳዌቶ! ኢንቴስ ኣዬ ኣና! ኣኑጋፔኔ ፃሎታፔ ቃሴካ ዱማ ዱማ ካꬃፌ ታማፌ ኢሲኖ ኬሴታ፤ ጊዶ ኣቲን ቱማ ፒርዳኔ ፆሳ ዶሳናይሳ ኣጊ ኣꬌታ። ዮዖን ጊዲኮ ኢንቴ ኣጊ ኣꬋናስ ቤሴና። ሃንኮይሳ ኣጎንታ ኢንቴ ኦꬃና ቤሲዛይቲካ ሃይታ።

⁴³ “ኢንቴኖ ፋርሳዌቶ! ኢንቴስ ኣዬ-ኣና! ኣይሁዳ ዎሳ ኬꬃን ኡታናስ ቦንቾ ኦይዴ ኮዬታ፤ ጊያ ጊዶንካ ኣሳይ ኢንቴ ሲንꬃን ሆካና ማላ ዶሴታ።

⁴⁴ ኣሲ ኤሮንታ ኢዛ ቦላራ ቢዛ ቆቴቲ ዲዛ ዱፎ ኢንቴ ሚሳቲዛ ጊሽ ኢንቴና ኣዬ-ኣና!” ጊዳ።

⁴⁵ ሙሴ ዎጋ ኤሪዛይታፔ ኢሶይ ዛሪዲ “ኣስታማሬ! ኔ ሄሳꬆ ሃሳዪዛ ዎዴ ኑናካ ጫያሳ” ጊዴስ።

⁴⁶ ዬሱሲካ ዛሪዲ “ኢንቴኖ ሙሴ ዎጋ ኤሪዛይቶ ኢንቴስካ ኣዬ-ኣና! ኣሲ ቶካናስ ዳንዳዮንታ ዴፆ ቶሆ ኣሳ ቶሴታ። ኢንቴ ጊዲኮ ኢንቴስ ቢራꬌ ፄራኒካ ቦቼኬታ።

⁴⁷ “ኢንቴ ኣዋቲ ዎꬊዳ ናቤታ ዱፎ ኢንቴ ሎዔꬂዛ ጊሽ ኢንቴስ ኣዬ ኣና።

⁴⁸ ሂስቲኮ ኢንቴ ኢንቴ ኣዋታ ኦሶ ሚንꬂዛ ማርካታ፤ ኢስቲ ናቤታ ዎꬊዳ፤ ኢንቴካ ኢስታ ዱፎ ሎዔꬄታ።

⁴⁹ “ሄሳ ጊሽ ፆሳ ኤራቴꬅ ሂዝጋዱስ ‘ናቤታኔ ሃዋሬታ ታ ኢስታስ ዬዳና፤ ኢስቲካ ኢስታፌ ኢሳ ኢሳ ዎꬋና፤ ሃራታካ ጎዳና።

⁵⁰ ሄሳ ጊሽ ሃ ዬሌታይ ቢታይ ሜꬌቶሶፔ ሃዒ ጋካናስ ጉኪዳ ናቤታ ኡባ ሱꬃ ጊሽ ኦይሼታና።

⁵¹ ኣቤሌ ሱꬃፌ ኦይኪዲ ያርሺዛሶፔኔ ፆሳ ኬꬃ ጊዶን ጉኪዳ ዛካራሳ ሱꬃ ጋካናስ ኮዬቴስ።’ ኤ ታ ኢንቴስ ጊዛይ ሃ ዬሌታይ ሃይሳስ ኦይሼታና።

⁵² “ኢንቴኖ ዎጋ ኤሪዛይቶ! ኢንቴስ ኣዬ-ኣና! ኤራቴꬃ ፔንጌ ቁልፌ ዎልቃራ ዎꬂ ኤኪዲ ኢንቴስካ ጌሊቤኬታ፤ ጌላናይታካ ዲጌታ” ጊዴስ።

²⁷ Yesusi hessa haasayiza wode asa giddofe issi macas dizaara ba qaala dhoqu ooththada “Nena tookkida qanthinne ne dhammida dhanthati anjettidayta” gadus.

²⁸ Gido attin izi “Anjettidayti Xoossa qaala siydi azazettizayta” gides.

²⁹ Daro derey Yesusakko shiiqida wode Yesusi “Hayssi yelettay iita yeletta; gita malata beyanas koyees. Gido attin Yoonaasa malatappe hara dumma malatay imettenna.

³⁰ Gaasoyka Yoonaassi Nanawe asas malata gidida mala asa nay tani ha yelettas malata gidana.

³¹ Dugeha dere maca kawoya Solomoone erateth beyanas biitta gaxappe dendada yida gish pirda wode iza ha yelettara dendada pirdana; hekko Solomooneppe aadhdhizaddey haan dees.

³² Yoonaassi sabakishin siydi Nanawe asay ba nagarappe maarottida gish ha yelettara issife dendidi pirdana. Gido attin Yonaasappe aadhdhizay haan dees.

³³ “Xompe oythidi kareppe geliza asas poo7ana mala qonceson wothetes attin geemason woththiza asi deenna.

³⁴ Ne asatethas poo7oy ne ayfe; ne ayfey paxa gidikko ne kumeththa asatethay po7o gidana. Ne ayfey saketikko ne kumeththa asatethay dhuma gidana.

³⁵ Hessa gish nenan diza poo7oy dhumonta mala naagetta.

³⁶ Histikko ne asatethay poo7o gidikko dhumida asatethi deenna aggikko ne kumeththa asatethay xompe lo7ethi poo7iza mala lo7i beettanna” gides.

³⁷ Yesusi haasaya wursida mala issi Farsaawey banara quma maanas Yesusa xeygides.

³⁸ Yesusi quma maana kushe mecetonta aggidayssa beyidi malalettida.

³⁹ Goday izas “Ha7i inte Farsaaweeti xu7assinne keres bolla bagga meeci geeshsheta; inte gido baggazi uzetethaninne iitatethan kumides.

⁴⁰ Inteno eeyato! Kare bagga medhdhiday gido bagga medhibenee?

⁴¹ Yo7on gidikko giddon dizayssa muxuwata immite; he wode wurikka intes geesh gidana.

⁴² “Inteno Farsaaweeto! Intes ayye ana! Anugappenne xalotappe qasseka dumma dumma kathafe tammafe issino kesseeta; gido attin tuma pirdanne Xoossa dosanayssa aggi aadhdheta. Yo7on gidikko inte aggi aadhdhanas bessenna. Hankoyssa aggonta inte ooththana bessizaytikka hayta.

⁴³ “Inteno Farsaaweeto! Intes aayye-ana! Ayhuda Woosa Keeththan uttanas boncho oyde koyeeta; giya giddonka asay inte sinthan hokkana mala doseeta.

⁴⁴ Asi eronta iza bollara biza qotetti diza duufo inte misattiza gish intena aayye-ana!” gida.

⁴⁵ Muse woga erizaytappe issoy zaaridi “Astamaare! Ne hessatho haasayiza wode nunakka cayaassa” gides.

⁴⁶ Yesusikka zaaridi “Inteno Muse woga erizaytto inteska aayye-ana! Asi tookkanas dandayonta deexo tooho asa toosseta. Inte gidikko intes biradhdhe xeeranikka bochchekketa.

⁴⁷ “Inte Aawati wodhida nabeta duufo inte lo7ethiza gish intes ayye ana.

⁴⁸ Histikko inte inte aawata ooso minthiza markata; isti nabeta wodhida; inteka ista duufo lo7etheeta.

⁴⁹ “Hessa gish Xoossa erateth hizgadus ‘Nabetanne Hawaareta ta istas yeddana; istika istafe issa issa wodhana; haratakka gooddana.

⁵⁰ Hessa gish ha yelettay biittay medhettosoppe ha7i gakkanaas gukkida nabeta ubba suutha gish oyshettana.

⁵¹ Aabeele suuthafe oykkidi yarshizasoppenne Xoossa Keeththa giddon gukkida Zakaraasa suutha gakkanaas koyeettes.’ Ee ta intes gizay ha yelettay hayssas oyshettana.

⁵² “Inteno woga erizayto! Intes aayye-ana! Eratetha penge qulfe wolqara woththi ekkidi inteska gelibeekketa; gelanaytaka diggeeta” gides.