ሉቃሳ 10:3-39 in Gamo

³ ሄሳ ጊሽ ቢቴ ዶርሳቲ ካና ሱይቴ ጊዶራ ቢዛ ማላ ታ ኢንቴና ዬዳይስ።

⁴ ኮሮጆ ዎይኮ ቃራፂቴ ዎይኮ ጫማ ኤኮፍቴ፤ ኦጌ ቦላ ኦናካ ሳሮ ጎፒቴ።

⁵ “ኢንቴ ኦና ኬꬂካ ጌሊዛ ጊዲኮ ኮይሮቲዲ ‘ኬꬃ ኣሶ ሳሮ!’ ጊቴ።

⁶ ሄ ኬꬃን ሳሮ ዶሲዛ ኣሲ ዲኮ ኢንቴ ሳሮታይ ሄ ኬꬃን ሼምፓና፤ ሳሮ ዶሲዛ ኣሲ ዶንታ ኣጊኮ ኢንቴ ሳሮታይ ኢንቴስ ሲማና።

⁷ ኢንቴስ ማና ሺሺዳ ካꬅ ዉርሲ ሚሼኔ ኡዪሼ ሄ ኢንቴ ጌሊዳ ኬꬃን ኡቲቴ፤ ኦꬂዛዴስ ባ ዎልቃ ዋጋ ኤካናስ ኢዛስ ቤሴስ። ሃ ኬꬃፌ ሄ ኬꬄ ዩዮፒቴ።

⁸ “ኢንቴ ኣይ ካታማካ ጋኪዛ ዎዴ ኣሳይ ኢንቴና ሞኪ ኤኪኮ ኢስቲ ኢንቴስ ኣꬂዳ ቁማ ሚቴ።

⁹ ሄ ካታማን ዲዛ ሃርጋንቻታ ፓꬂዲ ፆሳ ካዎቴꬂ ኢንቴኮ ማቲዴስ ጊዲ ዮቲቴ።

¹⁰ ጊዶ ኣቲን ኢንቴ ቢዲ ኢሲ ካታማ ጌሊሺን ሄ ካታማ ኣሳይ ኢንቴና ሞኪ ኤኮንታ ኢፂኮ ሄ ካታማ ኣሳይ ሺቂዛ ዱቡሻ ኬዚዲ፤

¹¹ ‘ኑ ቶሆ ቦላ ዲዛ ኢንቴ ካታማ ጉዱላ ኢንቴስ ማርካ ጊዳና ማላ ኑ ቶሆ ቦላፌ ፒቶስ ሺን ፆሳ ካዎቴꬃይ ኢንቴኮ ማቲዳይሳ ኤሪቴ’ ጊቴ።

¹² ታ ኢንቴስ ዮታይስ ፒርዳ ጋላስ ሄ ካታማ ፒርዳፌ ሶዶሜ ካታማ ፒርዳይ ካዉሼ ጊዳና።

¹³ “ኩራዚኔ ኔና ኣዬ-ኣና! ቤቴሳይዳ ኔና ኣዬ ኣና! ኢንቴናን ኦሴቲዳ ማላታቲ ፂሮሴኒኔ ሲዶናን ኦሴቲዳኮ ኢስቲካ ማይዖ ማይዒዲኔ ቢዲንꬅ ጎርፔቲዲ ሄ ዎዴ ቤኒ ማሬታናሺን።

¹⁴ ጊዶ ኣቲን ፒርዳ ዎዴ ኢንቴፌ ፂሮሴሲኔ ሲዶናስ ካዉያና።

¹⁵ ሃኔ ቂፊርናሆሜ ፑዴ ሳሎ ꬎቁ ꬎቁ ጋዲ? ኔኒ ዱጌ ሲዖሌ ዎꬋና፥

¹⁶ “ኢንቴ ጊዛይሳ ሲዪዛ ኣሲ ታና ሲዬስ፤ ኢንቴና ኤኮንታ ኣሲ ታናካ ኤኬና፤ ታና ኤኮንታይካ ታና ኪቲዳይሳ ኤኬና” ጊዴስ።

¹⁷ ላፑን ታማኔ ናምዓቲካ ኡፋዬቲሼ ሲሚዲ “ጎዶ! ሃራይ ኣቶ ሺን ዳይዳንꬃቲካ ኔ ሱንꬃን ኑስ ሃሬቲዳ” ጊዲ ዮቲዳ።

¹⁸ ኢዚካ ኢስታስ “ፃላዔይ ዎልቃንꬃ ማላ ሳሎፔ ኩንዲሺን ታ ቤያዲስ።

¹⁹ “ሂስቲኮ ሾሻኔ ማሲማሶ ኢንቴ ዬꬋና ማላ ሞርኬ ዎልቃ ኡባ ቦላ ኢንቴስ ጎዳቴꬅ ኢማዲስ፤ ኢንቴና ቆሂዛ ኢሲ ሚሺካ ዴና።

²⁰ ኢንቴ ሱንꬃይ ሳሎን ፃፌቲዳ ጊሽ ኡፋዬቲቴ ኣቲን ቱና ኣያናቲ ኢንቴስ ሃሬቲዳ ጊሽ ኡፋዬቶፍቴ” ጊዴስ።

²¹ ሄ ዎዴ ዬሱሲ ፂሎ ኣያናን ኡፋዬቲዲ “ሳሎሲኔ ሳዓስ ጎዳ ጊዲዳ ኣቦ ሃይሳ ዉርሳካ ኣꬎ ኤራንቻታፔኔ ኤራቻታፔ ቆታዳ ቄሪ ጉꬃ ናይታስ ኔ ቆንጪሲዳ ጊሽ ታኒ ኔና ጋላታይስ፤ ኤ፥ ታ ኣዋዉ! ሃይሲ ኔ ሎዖ ሼኔይ ሃኒዴስ።

²² “ዉሪ ታ ኣዋ ማታፔ ታስ ኢሜቲዴስ፤ ቃሴካ ኢዛ ናይ ኦናኮኔ ኣዋፔ ኣቲን ኤሪዛይ ባዋ። ኣዋይ ኦናኮኔ ናዛፔ ኣቲን ዎይኮ ናዚ ኢዛስ ቆንጪሳናስ ዶሲዳዴፔ ኣቲን ኤሪዛዴይ ባዋ” ጊዴስ።

²³ ባና ካሊዛይታኮ ሲሚዲ ኢስታስ ዱማ “ኢንቴ ቤዪዛይሳ ቤዪዛ ኣይፌቲ ኣንጄቲዳይታ።

²⁴ ታ ኢንቴስ ቱማ ጋይስ ዳሮ ናቤቲኔ ካዎቲ ኢንቴ ሃዒ ቤዪዛይሳ ቤያናስ ኮይዲ ቤይቤቴና፤ ኢንቴ ሃዒ ሲዪዛይሳካ ሲያናስ ኮይዲ ሲይቤቴና” ጊዴስ።

²⁵ ኢሲ ጋላስ ሙሴ ዎጋ ታማርሲዛ ኢሲ ኣሲ ዬሱሳ ፓጫናስ ኮይዲ “ታማሪሲዛይሶ ታኒ ሜርና ዴዖ ላታናስ ኣይ ኦꬆ?” ጊዲ ኦይቺዴስ።

²⁶ ዬሱሲካ ዛሪዲ “ዎጋ ማፃፋን ኣይ ጌቴቲ ፃፌቲዴ? ኢዛፔ ኔስ ጌሊዳይ ኣዜ?” ጊዲ ኦይቺዴስ።

²⁷ ኣዴዚ ዛሪዲ “ኔ ጎዳ ፆሳ ኔ ኩሜꬃ ዎዝናፔ፥ ኔ ኩሜꬃ ሼምፖፌ፥ ኔ ኩሜꬃ ዎልቃፌኔ፥ ኔ ኩሜꬃ ቆፋፔ ሲቃ፤ ኔ ላጌካ ኔ ሁዔ ማላ ሲቃ ጌስ” ጊዲ ዛሪዴስ።

²⁸ ዬሱሲካ “ሎዖ ዛራዳሳ። ኔኒካ ሄሳꬆ ኦꬂኮ ሜርና ዴዖ ዴማና” ጊዴስ።

²⁹ ኣዴዚ ባና ፂሊሳናስ ኮይዲ “ሂስቲን ታ ላጌይ ኦኔ?” ጊዲ ዬሱሳ ኦይቺዴስ

³⁰ ዬሱሲካ ዛሪዲ “ኢሲ ኣዴዚ ዬሩሳላሜፔ ኢያርኮ ዎꬊሺን ፓንጋቲ ዴሚዲ ኢዛ ማይዖ ቃሪ ኤኪዳ፤ ኬሂ ቆፄሬꬂዲ ሃይቆፔኔ ፓፃፔ ጊዶን ዬጊ ኣጊዲ ቢዳ።

³¹ ኢሲ ቄሴይ ሄ ኦጌራ ባሲ ዱጌ ዎꬊሼ ኣሙንሶንታ ሄ ቆፄቲዳ ኣዴዛ ዴሚዲ ፖቄꬃራ ዬጊ ኣꬊዴስ።

³² ቃሴካ ኢሲ ሌዌ ባጋ ኣሳፔ ኢሲ ኣዴዚ ሄ ኦጌራ ኣꬊሼ ቆፄቲዳ ኣዴዛ ቤዪዲ ሃዒካ ፖቂዲ ኣꬊዴስ።

³³ ኢሲ ሳማሪያ ቢታ ኣሲ ሄ ኦጌራ ኣꬊ ቢሼ ቆፄቲዳ ኣዴዛ ቦላ ጋኪ ዎꬊዴስ፤ ኣዴዛ ቤዪዲኔ ኬሂ ሚሼቲዴስ።

³⁴ ኣዴዛኮ ሺቂዲኔ ማዱንꬃ ꬋላና ማላ ዎጋራ ሚꬃ ዛይቴኔ ዎይኔ ጫጄ ማዱንꬃ ቦላ ጉሲዲ ቃቺዴስ፤ ኣዴዛ ባ ሃሬ ቶጊሲዲ ኢማꬂ ሼምፒዛሶ ኤፊዲ ሎዔꬂ ፄሊዴስ።

³⁵ ዎንቴꬃ ጋላስ ኢማꬂ ሼምፒዛ ኬꬃ ጎዳስ ናምዑ ዲናሬ ኢሚዲኔ ‘ኔና ሃራ ሚሻ ኬሲሲኮ ታ ሲማሼ ኔስ ኢማና፤ ኔፔ ኬሳዳ ሎዔꬃ ናጋ’ ጊዴስ።

³⁶ “ሂስቲኮ ሃ ሄꬑ ኣሳታፔ ፓንጋታን ቆፄቲዲ ሃይቆፔኔ ፓፃፔ ጊዶን ዬጌቲዳዴስ ኬሂ ማታ ላጌይ ኔስ ኣዋይሳ ሚሳቲዜ?” ጊዴስ።

³⁷ ሙሴ ዎጋ ታማርሲዛይሲካ “ሄሲ ኔ ሚቼቲዳይሳኔ ማዲዳይሳ!” ጊዴስ። ዬሱሲካ ኢዛስ “ኔካ ባዳ ኢዛይሳꬆ ኦꬃ” ጊዴስ።

³⁸ ዬሱሲኔ ኢዛ ካሊዛይቲ ኦጌ ቢሺን ዬሱሲ ኢሲ ጉታ ጌሊዴስ፤ ማርታ ጌቴቲዛ ኢሲ ማጫሲያ ባሶን ዬሱሳ ሞካ ኤካዱስ።

³⁹ ኢዚስ ማራሞ ጌቴቲዛ ኢሲ ሚቼያ ዳዉስ። ማራማካ ኢዛፔ ቃላ ሲያሼ ጎዳ ቶሆ ጋርሳን ኡታዱስ።

³ Hessa gish biite dorsati kana suyte giddora biza mala ta intena yeddays.

⁴ Korojo woykko qaraxite woykko caamma ekkofte; oge bolla oonakka saro gooppite.

⁵ “Inte oona keeththika geliza gidikko koyrottidi ‘Keeththa aso saro!’ giite.

⁶ He keeththan saro dosiza asi diikko inte sarotay he keeththan shempana; saro dosiza asi doonta aggikko inte sarotay intes simmana.

⁷ Intes maana shiishida kath wursi miishenne uyishe he inte gelida keeththan uttite; ooththizades ba wolqa waaga ekkanas izas bessees. Ha keeththafe he keeththe yuuyoppite.

⁸ “Inte ay katamakka gakkiza wode asay intena mokki ekkikko isti intes aaththida quma miite.

⁹ He kataman diza harganchata pathidi Xoossa Kawotethi inteko matides giidi yootite.

¹⁰ Gido attin inte biidi issi katama gelishin he katama asay intena mokki ekkonta ixikko he katama asay shiiqiza dubbushsha kezidi;

¹¹ ‘Nu toho bolla diza inte katama gudulla intes marka gidana mala nu toho bollafe pittoos shin Xoossa Kawoteththay inteko matidayssa erite’ giite.

¹² Ta intes yootays pirda gallas he katama pirdafe Soddome katama pirday kawushshe gidana.

¹³ “Kuraziine nena aayye-ana! Betesayda nena ayye ana! Intenan oosettida malatati Xirooseninne Sidoonan oosettidakko istika may7o may7idinne bidinth gorpettidi he wode beni maarettanashin.

¹⁴ Gido attin pirda wode intefe Xiroosessinne Sidoonas kawuyana.

¹⁵ Hanne Qifirnahoome pude salo dhoqu dhoqu gadii? Neni duge Si7oole wodhdhana,

¹⁶ “Inte gizayssa siyiza asi tana siyees; intena ekkonta asi tanakka ekkenna; tana ekkontaykka tana kiittidayssa ekkenna” gides.

¹⁷ Laapun tammanne nam7atikka ufayetishe simmidi “Godo! Haray atto shin daydanthatikka ne sunthan nuus haarettida” giidi yootida.

¹⁸ Izikka istas “Xala7ey wolqantha mala saloppe kundishin ta beyadis.

¹⁹ “Histikko shooshanne masimaso inte yedhana mala morke wolqa ubba bolla intes godateth immadis; intena qohiza issi miishika deenna.

²⁰ Inte sunthay salon xaafettida gish ufayettite attin tuna ayanati intes haarettida gish ufayettofte” gides.

²¹ He wode Yesusi Xillo Ayanan ufayettidi “Salossinne sa7as Goda gidida abbo hayssa wursaka aadhdho eranchatappenne erachatappe qottada qeeri guutha naytas ne qoncisida gish tani nena galatays; ee, ta Aawawu! Hayssi ne lo7o sheney hanides.

²² “Wuri ta Aawa matappe taas imettides; qasseka iza nay oonakkonne Aawappe attin erizay baawa. Aaway oonakkonne Naazappe attin woykko Naazi izas qoncisanas dosidadeppe attin erizadey baawa” gides.

²³ Bana kaallizaytakko simmidi istas dumma “Inte beyizayssa beyiza ayfeti anjettidayta.

²⁴ Ta intes tuma gays daro nabetinne kawoti inte ha7i beyizayssa beyanas koydi beybeetenna; inte ha7i siyizayssakka siyanas koydi siybeetenna” gides.

²⁵ Issi gallas Muse woga tamarsiza issi asi Yesusa paacanas koydi “Tamarisizaysso tani merna de7o laattanas ay ooththoo?” giidi oychides.

²⁶ Yesusikka zaaridi “Woga maxaafan ay geetetti xaafettidee? Izappe nees geliday aazee?” giidi oychides.

²⁷ Addezi zaaridi “Ne Goda Xoossa ne kumeththa woznappe, ne kumeththa shempofe, ne kumeththa wolqafenne, ne kumeththa qofappe siiqa; ne laggeka ne hu7e mala siiqa gees” giidi zaarides.

²⁸ Yesusikka “Lo7o zaaradasa. Nenikka hessatho ooththikko merna de7o demmana” gides.

²⁹ Addezi bana xillisanas koydi “Histin ta laggey oonee?” giidi Yesusa oychides

³⁰ Yesusikka zaaridi “Issi addezi Yerusalameppe Iyarko wodhdhishin pangati demmidi iza may7o qaari ekkida; keehi qoxerethidi hayqoppenne paxappe giddon yeggi aggidi bida.

³¹ Issi Qeesey he ogera baassi duge wodhdhishe aamunsonta he qoxettida addeza demmidi pooqethara yeggi aadhdhides.

³² Qasseka issi Lewe bagga asappe issi addezi he ogera aadhdhishe qoxetida addeza beyidi ha7ikka pooqidi aadhdhides.

³³ Issi Samaariya biitta asi he ogera aadhdhi bishe qoxettida addeza bolla gakki wodhdhides; Addeza beyidinne keehi mishettides.

³⁴ Addezakko shiiqidinne maduntha dhallana mala wogara mitha zaytenne woyne caje maduntha bolla gussidi qachchides; Addeza ba Hare togisidi imaththi shempizaso efidi lo7ethi xeellides.

³⁵ Wontetha gallas imaththi shempiza keeththa godas nam7u dinare immidinne ‘Nena hara miisha kessisikko ta simmashe nees immana; neeppe kessada lo7etha naaga’ gides.

³⁶ “Histikko ha heedzdzu asatappe pangatan qoxettidi hayqoppenne paxappe giddon yegettidades keehi mata laggey nees awayssa misatizee?” gides.

³⁷ Muse woga tamarsizaysikka “Heesi ne michetidayssanne maaddidayssa!” gides. Yesusikka izas “Nekka baada izayssatho ooththa” gides.

³⁸ Yesusinne iza kaallizayti oge bishin Yesusi issi guta gelides; Marta geetettiza issi macasiya bason Yesusa mokka ekkadus.

³⁹ Izis Maaramo geetettiza issi micheya dawus. Maaramakka izappe qaala siyashe Goda toho garsan uttadus.