5 À ye ó burii, àkũ mɛ́ à aduakɛkpɛ dↄ̀wɛrɛ.
6 Akũ Yesu gɛ̀ɛ kũńwo. Kũ à kà kãni kũ a bɛo, akũ gbɛ̃ zↄ̃kↄ̃ↄ pì a gbɛ̃nnanↄ zĩ̀ ò yã dí onɛ: Dikiri, ǹsun wari dↄ n zĩdaaro, mádi ká kũ ǹ gɛ̃ ma bɛaro.
7 A yã mɛ́ à tò ma dìtɛ kũ mádi ká mà su n kĩnaa ma zĩdaro. Ǹ yã o, ma zĩkɛri ni werekↄ̃a.
8 Zaakũ makũ se ò iko vĩmamɛ, má iko vĩ sozanↄa. Madì o ń gbɛ̃ donɛ à gɛ́, akũ àdi gɛ́. Madì o a pãndenɛ à mↄ́, akũ àdi su. Madì o ma zĩkɛriinɛ à adikũ kɛ, àdi kɛ.
9 Kũ Yesu yã pìi mà, à bò a sarɛ. Akũ à lìtɛ à pì gbɛ̃ kũ ò tɛ́ainↄnɛ: Matɛn oárɛ, mádi e gbɛ̃ke ma náani kɛ̀ lɛ bee Isarailanↄ tɛ́ro.
10 Kũ zĩ̀rii pìnↄ ɛ̀ra ò sù, ò è zĩkɛrii pìi wèrekↄ̃a.
11 Abire gbɛra Yesu gɛ̀ɛ wɛ̃tɛ kũ òdi pi Naini gũn. A ìbanↄ kũ gbɛ̃ pãndenↄ gɛ̀ɛ kãao dasidasi.
12 Kũ à kà kãni kũ wɛ̃tɛ pì bĩnilɛo, à è ò gɛ̀ sɛna òtɛn boo. Gyaanↄ nɛ́ mɛ̀n do légelegemɛ. Wɛ̃tɛpidenↄn kú kũ nↄgbɛ̃ pìio dasi.
13 Kũ Dikiri a è, akũ à kɛ̀nɛ wɛ̃nda, à pìnɛ: Ǹsun ↄ́ↄ dↄro.
14 Akũ à nà gɛ̀ɛ pìii, à ↄ nà a àkpatiia. Kũ gbɛ̃ kũ ò sɛnanↄ zɛ̀, akũ à pì: Kɛfɛnna, ma ònnɛ ǹ vu!
15 Akũ gɛ̀ɛ pìi vùtɛ à nà yã'onaaa. Akũ Yesu a kpà a daa.
16 Vĩna gbɛ̃nↄ kũ̀ ń pínki, ò Luda sáabu kpà ò pì: O annabi zↄ̃kↄ̃ↄ è ó tɛ́. Ò pì dↄ: Luda sù a gbɛ̃nↄ gwa.
17 Akũ Yesu baaruu dà Yudea bùsula kũ bùsu kũ ò likainↄ pínki.
18 Yahaya ìbanↄ yã pìnↄ bàbanɛ pínki. Akũ Yahaya ń gbɛ̃nↄn planↄ sìsi,
19 à ń zĩ Dikiria, ò a la, àkũmɛ gbɛ̃ kũ ani su ũ yá, ke ògↄ̃ wɛ́ dↄ gbɛ̃ pãndeimɛ?
20 Kũ gbɛ̃ pìnↄ kà Yesu kĩnaa, ò pìnɛ: Yahaya Da'itɛkɛri mɛ́ à ó zĩ ò n la, mↄkↄ̃mmɛ gbɛ̃ kũ ani su ũ yá, ke ògↄ̃ wɛ́ dↄ gbɛ̃ pãndeimɛ?
21 Zaa gwe gↄ̃̀nↄ Yesu gbɛ̃nↄ wèrekↄ̃a dasi kũ ń gyãnↄ kũ ń wãwãnↄ kũ ń tãnanↄ. À tò vĩ̀nanↄ gu è dasi dↄ.
22 Akũ à pì Yahaya zĩ̀rinↄnɛ: À gɛ́ à yã kũ a è, akũsↄ̃ a mànↄ gbãnɛ. À onɛ vĩ̀nanↄ tɛn gu e, ɛrɛnↄ tɛn táa o, kusunↄ tɛn werekↄ̃a, sãtonↄ tɛn yã ma, gɛ̀nↄ tɛn vu, takasidenↄ tɛn baaru nna waazi ma.
23 Arubarikaden gbɛ̃ kũ àdi fu ma yãaro ũ.
24 Kũ Yahaya zĩ̀rinↄ tà, Yesu Yahaya yã ò parinɛ à pì: Bↄ́n a gɛ gwa gbárannan? Kàpa kũ ĩa tɛn yĩgãn yá?
25 Bↄ́n a gɛ gwa sàa? Gbɛ̃ kũ à pↄ́kasa zãrɛ danan yá? Nnamari kũ òdi pↄ́kasa mana danↄ dìgↄ̃ kú kínabɛamɛ.
26 Bↄ́n a gɛ gwa sàa? Annabiin yá? Lɛmɛ! Matɛn oárɛ à de annabila se.
27 Zaakũ Yahayan ò a yã kɛ̃̀ Luda yãn ò pì: Mani ma zĩ̀ri gbarɛ n ã à zɛ́ kɛkɛnnɛ.
28 Matɛn oárɛ, nↄgbɛ̃ nɛ́'inaa gũn gbɛ̃ke dí ká Yahaya ũro. Bee kũ abireo gbɛ̃ kũ à de gbɛ̃ kpɛde ũ kpata kũ à bò Luda kĩnaa gũn deala.
29 Kũ gbɛ̃ sĩnda pínki a yã mà, ari kũ bɛ'ↄgↄsirinↄ sé, ò yã nna kpà Ludaa, zaakũ Yahaya ń da'itɛ kɛ̀.
