1 Mago mni fruhu kna (Sabat) zupa Jisasi'a witi hozafi ufreno nevige'za, amage nentaza disaipol naga'amo'za mago'a witi rga eritaniza, zamazampi arekasegasufe'za ne'naze.
2 Ana nehazage'za mago'a Farisi vahe'mo'za anage hu'naze, nahigetma osihoma hu'neazana mni fruhu kna (Sabat) zupa nehaze?
3 Jisasi'a kenona zamire anage hu'ne, Tamagra hampritma ontahi'nazo, Deviti'ene, naga'anema, zamagatege'za hu'naza zana?
4 Anumzamofo seli mono nompina mrerino, nagru hu'nea breti erino ne'neana, kasegemo'a o'e huno magomo'a onegahianki, prisi vahe'moke'za negahie hu'nea bretiagi, Deviti'a neneno naga'a zami'ne?
5 Nehuno zamagriku anage hu'ne. Vahemofo Mofavremo'a, Agranena mni fruhu knamofona (Sabat) Ra manine.
6 Hagi ru mani fruhu kna zupa (sabat) Jisasi'a osi mono nompi (sinagok) mrerino mono naneke rempi hu'nezamigeno, mago nera tamaga kaziga azamo'a sti'nea ne' mani'ne.
7 Kasegere ugagota hu'naza vahe'ene, Farisi vahe'mo'zanena, zamua ante'soe hu'za kete'za mani'naze. Jisasima mni fru knarema ana nera azeri'soe hanige'za, hagi zamagra kegafa erifore hu'za Agrira azerinaku, kete'za mani'naze.
8 Hianagi inakna antahintahima hu'nazana, Agra ko antahino keno nehuno, azama haviza hu'nea neku huno, ama maka vahe zamavure otinka eno! Higeno ana ne'mo otino e'ne.
9 Jisasi'a zamagriku anage hu'ne, Nagra tmantahinegoe, mni fruhu kna (Sabat) zupa knare zama hanuna zamo kasegefina knarera hunefi, havi tavutavama hanuna zamo knarera hu'ne? Vahera zamaza hugahumpi, vahera zamazeri haviza hugahune?
10 Arukrahe huno ome zamagege, eme zamagema huteno Jisasi'a azamo'ma stinea ne'ku anage huno asami'ne, Kzana arusuto! Higeno agra ana hu'ne. Anama higeno'a, azamo'a eteno so'e hu'ne.
11 Hianagi kasegere ugagota hu'naza vahe'ene, Farisi vahera zamarimpamo'a aka hege'za, Jisasina naza huntegahune hu'za zamagra zamagra kehugantu hugama hu'naze.
12 Anaknafina Jisasi'a nunamu hunaku agonarega marerino, Anumzamofontega ana kenegera nunamu ome nehigeno ko atune.
13 Ko'ma netigeno'a amagema nentaza disaipol naga'a kehige'za ageno, anampinti 12fu'a aposolo nagare huno huhamprino, zmagi'a zami'ne.
14 Saimoninku Pita'e huno mago agi'a nenteno, nefunku Endru'e hu'ne. Hagi Jemisi'e, Joni'e, Filipi'e, Bataromio'e.
15 Matiu'e Tomasi'e, Alfiasi nemofo Jemisi'e, Saimoni Zealeti nagapinti nere.
16 Hanki Jemisi nemofo agi'a Judasi'e. Hagi mago ne'mofo agi'a Judas Isakarioti'e, ha' vahe'mokizami zmazampi Jisasina komoru huno avarentesia nere.
17 Jisasi'a amage'ma nentaza disaipol naga'ane agonaregati erami'za agupofi eme otinege'za, anante amage'ma nentaza tusi'a disaipol veamo'za eritru nehazageno, maka Judia kazigatiki Jerusaletiki, Saitonitiki, Taia hageri ankena regati'enena,
18 ana vea'mo'za Jisasi naneke nentahisageno krizimi zmazeri knamresiegu emeri atru nehazageno, agru osu havi avamumo'za zmazeri haviza hu'naza vahera zmazeri knamare'ne.
19 Tusi veamo'za avako hunaku hu'naze. Na'ankure tusi'a hihamumo Agripinti ne-egeno, avakoma hia vahera maka krizmimo'a atrezmante'ne.
20 Jisasi'a amage'ma nentaza disaipol naga'a zamufi nezmageno, amanage huno zmasami'ne. Tamamunte omane vahe'mota muse hiho. Na'ankure Anumzamofo Kumara tamagrire.
21 Tamagaku'ma menina nehanamota, muse hiho. Na'ankure tamagrira Anumzamo'a tamaminigetma neramu hugahaze. Zavi'ma menima netenamota muse hiho. Na'ankure tamagra kiza regahaze.
22 Vahe'moza antahi haviza hunermante'za, tamahenati'za, kema neramasu'za, Vahe'mofo Mofavre'reku huza havi tamagima tamisazana! Anumzamo'a asomu huramantegahie.
23 Ana knazupa musenkase hugahaze. Na'ankure mizantimimo'a rama'a monafina me'ne. Na'ankure korapa zmagehe'za anahukna kasnampa vahera huzmante'naze.
24 Hianagi fenone vahe'mota tmasunku hutma ranknazampi manigahaze. Na'ankure tamagra ko tamazeri so'e hu'zana erivite'naze.
25 Menima tamagrama knare hutma ne'za neramu nehaza vahe'motma ranknazampi manigahaze. Na'ankure tmagaku hugahaze. Menima kizama neraza vahe'mota, tamagra ranknazampi manigahaze. Na'ankure tusi zavi krafa hugahaze.
26 Mika vahe'mo'za knare vahe mani'naze hu'za tmagriku'ma nehza vahe'mota ranknazampi manigahaze. Na'ankure zamagri nezmageho'za havige kasnampa vahetera anahukna huzmante'naze.
27 Hianagi anage hu'na neramasamue, izagato kema hugeta nentahimota, ha' vahetamia zamamesi nezmanteta, antahi haviza huneramantesaza vahera, knare tmavutmava huzmanteho.
28 Tamazeri havizahu ke huramantesaza vahera, asomu ke hunezmanteta, havi zmavu'zmava huramantesaza vahera nunamu huzmanteho.
29 Kameragente kahesimofona, rukrahe hugeno mago kazigane kaheno. Nakre kuka'a erisimofona, atregeno sioti ka'ane erino.
30 Mago'a zanku kantahi'gesagenka zami'nenana vahe'mokizmia, ete ome hanavege huzmantenka e'orio.
31 Kagri'ma rumo'zama so'e zmuzma hugantesazegu'ma kave'nesiankna hunka rumokizmia, kagra so'e kavukva huzmanto.
32 Tamagri'ma tamesintesia vahe'ma, zmesi zmantesuta, nankna knare'za erigahaze? Na'ankure kumi' vahe'mo'zanena, zmesizmantaza vahera zamagri'enena anahukna hu'za zmesi nezmantaze.
33 Tamagrama, knare zamavuzmava huramantesaza vahe'ma, knare tamavutmava huzmentesuta, nankna knare'za erigahaze? Na'ankure kumi vahe'mo'za anahukna zmavuzmava zamagranena nehze.
34 Nofi'ma hu'za erite'za, ete anama'a eme namigahaze hunka antahi nezaminka zamisanana, nankna knare'za erigahaze? Kumi' vahe'mo'zanena anahukna hu'za kumi vahe'mofozana erite'za, ete nofima hu'nazana ana maka eme apanesaze.
35 Hianagi ha' vahe tamia tamavesinezmanteta knare tamavutmava hunezmanteta nofi'ma hu'za erisazana mago'zana ete nona'a erigahune huta ontahiho. E'i'nama hanuta mizantamimo'a rama'a me'nena, tamagra Mrerisa Anumzamofo mofavrerami manigahaze. Na'ankure susu hunontaza vahe'ene, havi vahe'mokizmi'a so'e hunezmantaze.
36 Nafatmimo'ma asunku hunermanteaza hutma, tamagranena tmasunku huzmanteho.
37 Rumokizmi maniza refako'ma huozmantesankeno'a, kagri mni'zanena Anumzamo'a refako huogantegahie. Vahe'mofo kumi'zmi atrezmantesnage'za Anumzamo'a tamagri'enena kumitamia atreramantegahie. Haviza huramantesia vahe'mokizmi kumizmi atrezmante'nage'za tamagri'enena atreramantegahaze.
38 Vahe'ma kagrama zaminankeno'a kagri'enena anazanke huno negamino, knare'za huno rentrako traku huno kamina, aviteno herafiramino evugahie. Na'ankure kagrama vahe'ma zamisana avamente, kagri enena anazanke huno kamigahie.
39 Jisasi'a anage huno fronka kea zmasami'ne. Avu asuhu ne'mo'a, ete mago avu asuhu nera avazu huno vugahifi? I'o znagra ana taregamoke kerifi uoramigaha'e.
40 Mago avo noma nehimo'a, rempima humi nera agateore'ne. Hianagi iza'o rempima humia antahiza eri vgareteno rempima huzami vahekna nehie.
41 Na'a higenka kugusopa negafu avufima me'neana negenka, tusi'a zafa kofa kavufima me'neana ke'so'e nosane?
42 Nankna hunka negafunkura, nenafuo osasi'za kavufi me'neana natregena eri atraneno nehunka, tusi'a zafa kofa kavufi me'neana ke so'e nosano? Kagra tavre vahe mni'nane! Ese'zana tusi'a zafa kofa kavufi me'neana eri atrenka, kavua ke so'e nehunka, osi kugusopa negafu avufi me'neana eritregahane.
43 Na'ankure knare zafamo'a havi raga'a renonte. Hagi havi zafamo'a knare rga renonte.
44 Na'ankure magoke magoke zafamo'a agra'a gna rgama rentenire kegahane. Ave'ave trazampintira vahe'moza fiki rga noragize. Ave'ave trazampintira vahe'mo'za krepi rga noragize.
45 Knare vahe'mofona agu'afima knare'zama antegeno me'neazamo, knare'zana efore nehie. Hanki havi vahe'mofona agu'afina haviza antegeno aviteno me'neazamo, haviza efore nehie. Na'ankure nanknazama agu'afima me'neazana, agi'mo hufore nehie.
46 Nahigeta Nagrikura, Ramo'e Ramo'e nehutma, kema tmasamuazana nosaze?
