22 Dopa leamopa baanya pii tende pipae dupa soo mona andapala baanya iki lakamaiyoo, “Akali dake Josepenyaka ikiningi daa kandamuape?” leami-pyaa.
23 Dokopa baame dokaita lamaiyoo, “Nyakamame namba kandao pii mana dapa lao kapa pao laapimino: ‘Dokosaa, embame emba tangenya yaina doko mee injisepe,’ laapimino. Dee nyakamame Kapaneame yuu dokonya kalai tata wamba sakateamo dupanya atome pii dupa sepala namba kandao, ‘Dopaka pyoo embanya yuu tenge dakenya pipi!’ latamina,” lea-pyaa.
24 Dopa latala baame lao pituu, “Nambame nyakama kiningi langilyona, potopesa mendeme baanya yuu tenge dokonya katao pii lao panelyamopa dokaitame baa lanyala naengema.
25 Nambame kiningi etete nyakama langilyona, wamba akali Ilainja kateamo gii dokopa Isataele yuu dupa pitakanya ee kana tepoma-kisa dee kana tokange dupanya aiyuu naipao painaka piamopa lopo andake mende sia-pyaa. Yuu dokonya enda walyakae longo peteami-pyaa.
26 Peteaminoaka doko, Goteme akali Ilainja doko enda dupanya mendaipi mende-kisa pena laa naya-pyaa. Goteme baa Saitone yuu yakane Satepata yuu dokonya enda walyakae mende peteamo dokonya pena lea-pyaa.
27 Dee potopesa Ilaisa kateamo gii dokopaka Isataele yuu dokonya endakali kopetali longo kateamino dupanya mendaipi mendenya kopetali doko mee nanjiamopa, Sitia tange akali Nemane lenge dokonya yonge doko iki Goteme mee injisia-pyaana,” Jisasame dopa lea-pyaa.
28 Dopa leamopa losuu anda dokonya endakali peteamino dupa pitakame pii dutupa sepala moname imbumi kumiami-pyaa.
29 Imbu kayao, sakatatala yuu taono dokonya Jisasa watao netesa nepalanya soo tuu lao peami-pyaa. Yuu taono doko yuu manda mendenya siamopa dokonya nete papatale menda-kaita laminao pao soo pyale lamana lao masiami-pyaa.
30 Dopa lao masiaminoaka doko, Jisasame dupanya kainanya langate petala pea-pyaa.
31 Jisasa Galili yuu dokonya taono Kapaneame lenge dokonya pupala, Sambasa gii dupanya baame endakali dupa mana lamaiyoo katea-pyaa.
32 Jisasame mana lamaiyamo dupa endakali dupame sepala, baanya pii doko pupu lapae joo leamosa walu lao paka kayami-pyaa.
33 Dokopa akali enjele koo paleta mende losuu andaka peteamo dokome puu lao ae lao dapa lea-pyaa:
34 “Kanau, Nasatete tange Jisasa, emba Gotenya akali epe etete doko kalyeno nambame kandengena, embame naima aipa pyaa epepe? Embame naima minao koyasala epepe?” lea-pyaa.
35 Dokopa Jisasame baa pyalanya lao, “Embame embanya nengekaita lyokatala akali dake yakinatala puu!” lea-pyaa. Dopa leamopa enjele koo dokome endakali kateamino kaina dokonya akali doko lombanya setapala baa pateamopa akali doko koyala naya-pyaa.
36 Dokopa endakali pitakame mona andapala mende lamai lamai pyoo, “Baame enjele koo palenge dupa isoo pii pupu lao pena lamailyamoli pyoo dokaitame endakali dupa yakinatala pengema lamo doko baanya pii dake aipale mende laa kanjemape?” leami-pyaa.
37 Baame dopa piamo dokonya atome pii doko yuu dosa tange dupa pitakame siami-pyaa.
38 Dokopa Jisasame losuu anda doko yakinatala akali Saimonenya andaka pea-pyaa. Saimonenya enda imange doko yaina nyepala yonge etete itaita koo piamo siamopa, “Jisasa, embame enda doko nisetepe?” lao endakali dupame pisiami-pyaa.
39 Dokopa Jisasame enda doko siamo tengesa dosa ipao katapala, yaina itaita piamo doko kandao pii puu lao, “Mee jaa!” leamopa enda dokonya yaina doko mee jia-pyaa. Gii dokopaka enda dokome yapa sakatatala dokaitanya nee yangakamaiya-pyaa.
40 Niki landa pyalanya piamopa endakali dupa pitakame nyakamanya palu dupanya yaina tata wakale wakale paleta dupa laminao epeaminopa baame baanya kingi doko endakali dokaita pitaka-kisa setapa piamopa dokaita pitaka auu pipae jeta piami-pyaa.
41 Dopaka pyoo enjele koo endakali longo mendapua-kisa palenge dupame endakali dupa yakinatala pao pituu, ae lalya lana pyoo, “Emba Gote Ikiningina,” leami-pyaa. Enjele koo dokaitame baa Kataisa dokona lao masetala panala naena lao baame kyoto joo dokaita lamaiyoo, “Pii kayalapa!” lea-pyaa.
