2 Ana knafina Anasike, Kaiafasikea mono nonte ugagota rakva mani'na'e. Higeno Anumzamofo kemo, vahe omani hagege kokampi Sekaraia ne'mofo Joninte e'ne.
3 Joni'a mika Jodani rantima me'nea kaziga vano nehuno, tamagu'a rukrahe nehutma mono ti nefrenkeno, kumi tamia atreramteno huno mono ke hu'ne.
4 Kasnampa ne' Aisaia avontafepina amanage huno krente'ne, mago vahe'mofo agerumo'a, vahe omani ka'ma kopinti kezatino, Ramo'ma esia kana retro nehuta, Agri kana azeri ante fatgo hunteho hu'ne.
5 Mika keri'a antevineteta, mika agona eri agupo nehutma, kazaki nesia zantamina eri fatgo nehutma, haviza huno knare osu'nesia kantamina erintefatgo, nehinkeno,
6 ana mika vahe'moza Anumzamo'ma tahokema heazana kegahaze. (Aisa 40:3-5)
7 Higeno Joni'a, agrite'ma mono ti frerantesie hu'za e'naza vahe krerfa, anage huno zamasmi'ne, tamagra ha' osifave'mofo mofavre nagare! Aza hanigetma Anumzamofo rimpa hezampintira korera fregahaze?
8 E'ina hu'negu, tamagrama tamagu'ama rukrehema hu'nenutma knare tamavutmava hinkeno hago zmagu'a rukrehe hu'naze hu'za hugahaze. Tamagra agafa hutma Abrahamu'a tagri nerageho mani'ne huta osutfa hiho. Na'ankure tamagri'ma neramasmuana, Anumzamo'a amne ama haveramintetira Abrahamuna mofavrea erifore humigahie.
9 Menina hago sasumemo'a zafa antaginaku agafafi kriri'ne, hagino anampintima knare ragama reontesia zafa antagino tevefi asaga huno kregahie.
10 Hige'za ana vahe kevumo'za Jonina anage hu'za antahige'naze. Hagi tagra na'a hugahu'ne?
11 Hu'za antahi'gageno, Joni'a, zamagari kenona anage huno zamasmi'ne, azagama tare kenama ante'nesamoka, magora onte'nesimofo ome fako humio, hagi azagama ne'zama ante'nesamoka, anazanke hunka fako huzamio.
12 Takisi zago zonegiza vahe'mo'zane, ti frerantegahie hu'za enamoza'nena, Jonina anage hu'za antahige'naze. Rempi huzami nemoke, tagranena nankna hugahune?
13 Agra anage huno zamasmi'ne, kvamo'ma eriho hu'nesia kana arugateretma mago'ene zgoa zo'onkiho.
14 Anante mago'a Sondia vahemo'za antahige'naze, Hagi tagaranena na'a hugahune? Hzageno Joni'a anage huno zamagrira zamasmi'ne, Vahe'mokizami zagoa tutu huzamanteta havigereti rezmataga hutma e'oriho. Hagi tmarimpa fru hutma mizantami erifatgo hiho.
15 Anagema hianke vahe'mo'za nentahi'za, Joninkura Kraisi hago ama e'nefi nehu'za, tare tagufa zamagesa antahi'naze.
16 Joni'a mika'mokizmi kenona anage hu'ne, nagra amane tintafanteti fre'neramantoe. Hianagi magoma ne'emo'a nagrira nagatereno tusi hihamu'ane ne' egahie. Nagra amuha osu'noankina Agari aganomofo nofira katu ofegahue. Agra mono tina Ruotage Avamuteti'ene, tevereti'ene freramantegahie.
17 Agra witi eri herahehu fokua azampi eri'no, witi hona'a hare kuma harafi nehuno, nena'a witi ante nompi eri'nenteno, hona'a vga ore tevefi kre fanene hugahie.
18 Ana huno amanahu kante, Joni'a rama'a knare antahintahi erinteno, vahera knare musenkea zamasmi'ne.
19 Hianagi Joni'a ra kva ne', Herotina haviza hu'nane huno hanavetino asmi'ne, na'ankure nefu nenaro rehanereno Herodiasina a' erinte'neazanku'ene, havi avu'avazama hiazanku anagea hunte'ne.
20 Heroti'a mago'ene ana agofetu kefozama hu'neana, Jonina kina hunte'ne.
