Luku 1:33-75 in Tabo

³³ Ba꞉bema꞉ hibila, Ya꞉ikobokono eyoni gugudi ipuwalo ebete emedena emedena tetelo Ko Gawadalagima꞉ beda꞉namene, iyo, ebeno Ko Gawadalagima꞉ eda꞉ komote a꞉kawibonamene.”

³⁴ Ma꞉liti huiyatiya nopodawatamo na꞉goiya꞉, “Na bohelenomola ba꞉gala na awihinola. Ba꞉moe komote natamo keba ka꞉na na꞉kuluhukumini?”

³⁵ Nopodawate ebetamo na꞉huiyuya꞉, “Hido-talona Gobogobote ama꞉tamo kopema꞉ne, ba꞉gala Godokono helote ama꞉ hunamo kemedema꞉ne, ba꞉bema꞉ ama꞉le dalahimimina꞉ ba꞉be talona gudu tawakaluba꞉te Godokono Guduma꞉ ba꞉ka꞉minakomena꞉.

³⁶ Ama꞉ amia꞉no menokoeno naniko Elisabetikono komo nemalagidola. Dopamo tawakaluba꞉te na꞉ga꞉lanakuya꞉ ebe hogoha꞉ kamenala, huiyatiya ebete kabele tetelo lamituma꞉ eda꞉te sikisi manome ba꞉ a꞉wibui.

³⁷ Ba꞉ hibila, hiliyonomo komokomo ododilima꞉ Godogodolo helo bitana, eta ododiha꞉ komote ebegodolo kitanaha꞉.”

³⁸ Ba꞉bema꞉ Ma꞉liti na꞉goiya꞉, “Na Kodawa Godokono huiyaha꞉ oko bohelela. Wadiyala ama꞉le da꞉gaa꞉, ba꞉be komote nuluhukamene,” ba꞉bene Godokono nopodawate ebegodone ba꞉ dito tuya꞉.

³⁹ Ba꞉ba tetelo Ma꞉liti tiyonomo mahigate Yudiya hopoeno hunuhunu hakamo tote eta muhulu habamo dito nuluhukuya꞉.

⁴⁰ Ba꞉bene ebete Sekalayakono genamamo nodolote Elisabetiko ba na꞉pa꞉watameho ebetamo nolata tabo ba꞉bo nolamagiya꞉.

⁴¹ Ba꞉bema꞉ Elisabetiti Ma꞉likono nolata tabo duliya꞉, ba꞉ba tetenomolo ebeno tepo ipuwalo guduti ko kalakala lawete ba꞉bo midiwihuya꞉. Ba꞉bene Godokono Gobogobote Elisabetikono tepo ipuwa da꞉tabuimiya꞉,

⁴² ebete tabo hunamo adipatelo Ma꞉litamo na꞉goiya꞉, “Hiliyonomo kamenakamena ipuwalo Godote ama꞉ hunamo adipatelo hidonomamo bowalubinamena꞉ta, ba꞉gala ama꞉le dalahimimina꞉ Godote ba꞉be Kodawa atumu emedena tetelo bowalubinamene.

⁴³ Naeno Kodawoeno menoko, ama꞉le na unamema꞉ da꞉pa꞉ kalakala konomola, huiyatiya ba꞉moe hidonomo komote na kuba lumagitamo badama꞉ kuluhuku?

⁴⁴ Ba꞉ hibila, nale amia꞉no tabo dulimo, ba꞉ba tetelo naeno tepo ipuwalo guduti ko kalakala lawete ba꞉bo midiwiho,

⁴⁵ ba꞉bema꞉ ama꞉tamo kalakala bada konomola꞉ka꞉, mabu ama꞉le Godoko hibima꞉ a꞉midia꞉ta ebeno tabote ama꞉ ipuwado hibinomoma꞉ keda꞉ma꞉ne!”

⁴⁶ Ba꞉bene Ma꞉liti na꞉goiya꞉, “Naeno emalagidolote Godoko nawagaminuta,

⁴⁷ iyo, naeno tepo ipuwate naeno Ka꞉ka꞉ Mula꞉dawa Godotamo na꞉kalakaluta,

⁴⁸ mabu ebete na emalagidolonelo kalakala komo ododi na ebeno deha꞉poto huiyaha꞉ oko boheletamo! Ba꞉bema꞉ ba꞉ma tetene tupuimiti emedena emedena tetelo tawakalubi hiliyonomate na kalakala lumagima꞉ ba꞉ka꞉naminakomena꞉,

⁴⁹ mabu Helonomo Godote natamo koko hidohido komo ododili, iyo, ba꞉be Kodawoeno mahilo ba꞉ talonala!

⁵⁰ Ba꞉ hibila, puya꞉te ebe da꞉tolemena ebete iba꞉tamo malemale bihatenakomene, iyo, tawakaluba꞉te ba꞉moe hopolo tete ga꞉ga꞉nomolo ba emedehona, ebete iba꞉tamo ba꞉ ba꞉ma ka꞉na bewagelenakomene.

⁵¹ Ba꞉bema꞉ a tetelo ebete ebeno kokotamo koko komokomo ododili, ba꞉gala puya꞉te ibi ha꞉kiya awagahalo kokoma꞉ da꞉ga꞉lui, ebete ibino nopo kubahilamete ebeno heloamo ibi a꞉ta꞉malateli.

⁵² Ba꞉gala ebete koko gawadubu ibino helo habane tama꞉mo a꞉miya꞉ti, huiyatiya ebete ba꞉be atu tetelo hegehege tawakalubi a꞉wadiya꞉paa꞉lateli.

⁵³ Iyo, puya꞉te awaelo demedehonama꞉, ebete ibi hidohido ilinamo ba tabuilame, huiyatiya dogodogo ilinagopi ilinaheno dito oelami.

⁵⁴ Ba꞉bema꞉ hibila, ebete aeno iniwala꞉tamo hibinomolo da꞉goiya꞉, ba꞉be tabote a tetelo ba꞉ na꞉hawakala, iyo, tete tatalila ebeno owalubi komote kuluhukuma꞉ne ebeno huiyaha꞉ okodawa Isalaelatamo. Ba꞉moe ba꞉be mabuma꞉ Godote A꞉ibalahamatamo kebe malemale ka꞉hawakalimiya꞉, ba꞉be malemala꞉mo ebeno eyoni gugudi emedena tetelo bemalagidolenamene!”

⁵⁶ Ma꞉liti ba꞉moi tabo komokomo olamagi da꞉wibuya꞉, ebete netewa-kapiya manome Elisabetikoba꞉ emedete, ba꞉bene ebete ebeno habanomamo gala dito katuya꞉.

⁵⁷ Ba꞉bene Elisabetikono gudu alahimi tete da꞉piya꞉ ebete dubu gudu alahimiti,

⁵⁸ ebe tamelo demedehonama꞉ ba꞉gala ebeno mabu tawakalubi, iba꞉te Godokono hido owalubi komo Elisabetigodolo umiti eba꞉go na꞉kalakalahuya꞉.

⁵⁹ Ba꞉bene sa꞉ba꞉ni hegela da꞉petohuya꞉, a꞉iti hegela tetelo iba꞉te dubu guduino tama itamida kukala ododima꞉ ba꞉bo pelamiya꞉. Ba꞉ba tetelo komopa꞉te ubi bihatiya꞉ ba꞉be gudu ebeno nabiwi Sekalayakono mahilamo koka꞉mima꞉,

⁶⁰ huiyatiya ebeno menokote na꞉goiya꞉, “Ao, la꞉ ebeno mahilo Yonema꞉ na꞉ka꞉ma꞉la꞉.”

⁶¹ Ba꞉bene iba꞉te la꞉wa꞉hate ebetamo na꞉ga꞉luya꞉, “Numa꞉, la꞉eno tawakaluba꞉godolo ba꞉moe mahilo kitanaha꞉!”

⁶² Ba꞉bema꞉ iba꞉te ebeno nabiwitamo kokotamo ba ga꞉la ebe nalatediya꞉, ebeno ubi keba ka꞉na kitana gudutamo mahilo kikamema꞉.

⁶³ Ba꞉bene Sekalayate kokotamo olamagilo komopa꞉te tabo miya꞉teno ilina adahemema꞉ da꞉goelamiya꞉, ebete ba꞉be ilina lawete ba꞉ma ka꞉na miya꞉tiya꞉, “Ebeno mahilo Yonetela.” Ba꞉be mabuma꞉ iba꞉te konomamo hanohanohuya꞉,

⁶⁴ ba꞉bene ba꞉ba tetenomolo Sekalayakono tabo olamagi komote da꞉kahidomiya꞉, ebete Godoko milimiho ba꞉bo tupuimiya꞉.

⁶⁵ Ba꞉bema꞉ ebeno habanapa꞉te ba꞉bi hanohano komo dulamiya꞉ iba꞉te koamo toletolehuya꞉, ba꞉bene iba꞉te ba꞉bi komokomo tawakalubi da꞉nikiyahalamiya꞉, ba꞉be tabote Yudiya hopoeno hunuhunu hakoeno hiliyonomo habahabamo ba꞉bo tuya꞉.

⁶⁶ Ba꞉gala puya꞉te ba꞉be tabo duliya꞉ iba꞉te ba emalagidolo na꞉ga꞉luya꞉, “Ba꞉moe gudu ebete kebako dawama꞉ na꞉keda꞉mene?” Iba꞉te ba꞉moe tabo bega꞉luya꞉ mabu ibino umi ipuwalo Godokono helote ba꞉be gudugodolo hibinomolo itanuya꞉.

⁶⁷ Ba꞉bene Godokono Gobogobote Yonekono nabiwi Sekalayakono tepo ipuwa da꞉tabuya꞉, ebete Godokono ukui ba꞉ma ka꞉na hawakalilamiya꞉,

⁶⁸ “Godote Isalaela tawakalubi hidonomamo dowalubilinako, ale ebe ba꞉bema꞉ komilimihoma꞉nema꞉, mabu ebete ebeno tawakalubi owalubilima꞉ ba꞉ na꞉pe, tete tatalila ebete ibino kuba ododili ipuwane ibi kopuluhukulatelema꞉ne!

⁶⁹ Iyo, Godote a mabuma꞉ dadipati, ba꞉be Ko Ka꞉ka꞉ Mula꞉lea꞉medawate ba꞉ na꞉pe, ebe ba꞉ Godokono okodawa Da꞉ibidikono eyono gudu etala.

⁷⁰ Ba꞉ hibila, puya꞉te dopamo tetelo Godokono talona ipuwalo demedehonama꞉, ebete ba꞉bi okopi ipuwado ebeno ukui ba hawakalimi na꞉goiya꞉,

⁷¹ puya꞉te maubahalete atamo alaholoho komo dododinaka, ebete a ibino helo kokotone kuluhukua꞉tema꞉ne.

⁷² Iyo, ebete eta tabo ba꞉ma ka꞉na kagoiya꞉, ebete aeno iniwala꞉tamo ebeno malemale bihatenamene, ba꞉gala ebete iba꞉tamo kebe nopo hibinomolo da꞉tamotiya꞉, ba꞉be hido-talona tabo ba emalagidolona emedena tetelo ebete bododinakomene.

⁷³ Ba꞉gala ebete aeno iniwa A꞉ibalahamatamo hibinomolo na꞉kagoiya꞉,

⁷⁴ puya꞉te ago dalaholohonaka, ebete a ibino kokoto ipuwane kuwatema꞉ne, ba꞉bene ale ibi tolelameheno ebe kapiyatamo oko bowatihonakoma꞉.

⁷⁵ Iyo, ale ebeno holoholo hapulu talona tawakalubima꞉ ba eda꞉hana, ale emedena tetelo ebeno tuputupu gabodo ba꞉wapata꞉lamenama꞉.”

³³ Ebema꞉ nanitabola, Ya꞉ikobokono walone gudi magumulo ebete uwomua꞉ tetelo Kawo Elawodubuma꞉ beda꞉namene, iyo, ebeno Kawo Elawodawama꞉ eda꞉ tanalote a꞉kolopoligonamene.”

³⁴ Ma꞉lite wiyasiya nopodawatamo negiya, “Na buwelenomola ega꞉walo na awia꞉nola. Me tanalote natamo keba kunu na꞉kemaigamene?”

³⁵ Nopodawate ebetamo nowamiya, “Wade-talena Uliyanate a꞉ma꞉tamo ka꞉pemene, ega꞉walo Godokono elawote a꞉ma꞉ unamo kokolimene, ebema꞉ a꞉ma꞉le dalaima꞉emene ebe talena gudu epate Godokono Guduma꞉ beka꞉minakoma꞉na꞉.

³⁶ A꞉ma꞉ a꞉imano menokono naniko Elisabetikono tanalo nemalagidila. Dopamo epate negelanakiya ebe ta꞉li kamiyalela, wiyasiya ebete abele tetelo lamituma꞉ eda꞉te sikisi saganate olopoligi.

³⁷ Nanitabola, tanalo bilibilinomo osiyodilolema꞉ Godogodolo elawo bitana, osiyodiloa꞉ tanalo idite ebegodolo kitana꞉.”

³⁸ Ebema꞉ Ma꞉lite negiya, “Na Kawodawa Godokono wiya꞉ woko buwelela. Modobola a꞉ma꞉le degeawa꞉, ebe tanalote nemaigamene,” ebene Godokono nopodawate ebegodone gito tiya.

³⁹ Ebe tetelo Ma꞉lite samonomamo maigate Yudiya opono unuunu damelamo tote mulu duliyomolo ida꞉mo gito nemaigiya.

⁴⁰ Ebene ebete Sekalayakono motamo nodolote Elisabetiko eba na꞉wiyamidalo ebetamo nilakapo tabo ebo na꞉kiyawaiya.

⁴¹ Ebema꞉ Elisabetite Ma꞉likono nilakapo tabo dolowiya, ebe tetenomolo ebeno tepo magumulo gudute kawo kalakala lawete ebo igiligaiya. Ebene Godokono Uliyanate Elisabetikono tepo magumu detabokaimiya,

⁴² ebete tabo unamo adipatelo Ma꞉litamo negiya, “Kamiyale bilibilinomo magumulo Godote a꞉ma꞉ unamo adipatelo wadenomamo bowalubinama꞉ta, ega꞉walo a꞉ma꞉le dalaima꞉emene Godote ebe Kawodawa atumu uwomua꞉ tetelo bowalubinamene.

⁴³ Naimano Kawodawano menoko, a꞉ma꞉le na unaema꞉ da꞉pa꞉wa꞉ kalakala kawonomola, wiyasiya me wade tanalonomote na kuba lumagitamo beda꞉ma꞉ ka꞉pemaigale?

⁴⁴ Nanitabola, nale a꞉imano tabo dolowimo, ebe tetelo naimano tepo magumulo gudute kawo kalakala lawete ebo igiligao,

⁴⁵ ebema꞉ a꞉ma꞉tamo kalakala beda꞉ kawonomola꞉ka꞉, mabu a꞉ma꞉le Godoko nanitaboma꞉ a꞉midiata ebeno tabote a꞉ma꞉do nanitabonomoma꞉ keda꞉mene!”

⁴⁶ Ebene Ma꞉lite negiya, “Naimano kimalagidilote Godoko nowaloguta,

⁴⁷ iyo, naimano tepo magumute naimano Igilo Mula꞉dawa Godotamo nekalakalita,

⁴⁸ mabu ebete na malagidilonelo kalakala tanalo osiyodili na ebeno da꞉peso wiya꞉ woko buweletamo! Ebema꞉ me tetene wagilimite uwomua꞉ tetelo epo bilibilinomate na kalakala lumagima꞉ beka꞉na꞉minakoma꞉na꞉,

⁴⁹ mabu Elawonomo Godote natamo wadewade tanalo kawokawo osiyodiloli, iyo, ebe Kawodawano mailo talenala!

⁵⁰ Nanitabola, piyate ebe da꞉tolemena ebete iba꞉tamo nilakapo biyatinakomene, iyo, epate me opolo tete geyageyanomolo eba ilukulinalo, ebete iba꞉tamo ma kunu bowagelenakomene.

⁵¹ Ebema꞉ a tetelo ebete ebeno kotamo kawokawo tanalo osiyodiloli, ega꞉walo piyate ibi a꞉ka꞉tuwa꞉ amamaolo kawokawoma꞉ degeliya, ebete ibino nopo kubailamete ebeno elawamo ibi a꞉na꞉ma꞉lateli.

⁵² Ega꞉walo ebete kawokawo elawodubu ibino gobebobone iyabaiamo alomi, wiyasiya ebete ebe atu tetelo dologala epo owadipalateli.

⁵³ Iyo, piyate nigologololo dilukulinamiya, ebete ibi wadewade inamabuamo eba tabokailamelo, wiyasiya inamabu bilibilinomagopi inamabua꞉no gito aliboli.

⁵⁴ Ebema꞉ nanitabola, ebete aimano ewoniatamo nanitabonomolo degiya, ebe tabote a tetelo nawokala, iyo, tete tatalila ebeno walubi tanalote ka꞉pemaigamene ebeno wiya꞉ wokodawa Isalaelatamo. Me ebe mabuma꞉ Godote A꞉ibalayamatamo kebe nilakapo kawokalimiyale, ebe nilakapamo ebeno walone gudi uwomua꞉ tetelo bemalagidilolenamene!”

⁵⁶ Ma꞉lite me iyaiya tabono tanalo kiyawao dolopoligiya, ebete netewa-kapiya sagana Elisabetiago okolite, ebene ebete ebeno duliyomolonomamo walo gito ka꞉tiya.

⁵⁷ Ebene Elisabetikono gudu alaimi tete da꞉piya ebete dubu gudu alaimite,

⁵⁸ ebe niyakabolo dilukulinamiya ega꞉walo ebeno mabu epo, iba꞉te Godokono wade walubi tanalo Elisabetigodolo umite eba꞉go nekalakalaiya.

⁵⁹ Ebene sebeni egela da꞉petoiya, a꞉iti egela tetelo iba꞉te dubu guduno tama itamida pukala osiyodiloma꞉ ebo pelamiya. Ebe tetelo epetapiate ubi iyatiya ebe gudu ebeno nabiwi Sekalayakono mailamo keka꞉ima꞉,

⁶⁰ wiyasiya ebeno menokote negiya, “Ao, la꞉ ebeno mailo Yonema꞉ neka꞉miala꞉.”

⁶¹ Ebene iba꞉te la꞉wa꞉ote ebetamo negeliya, “Numa꞉, a꞉imano epagodolo me mailo kitana꞉!”

⁶² Ebema꞉ iba꞉te ebeno nabiwitamo kotamo eba gelalo ebe nalatediya, ebeno ubi keba kunu kitanale gudutamo mailo kikaema꞉.

⁶³ Ebene Sekalayate kotamo kiyawaolo epetapiate tabo akuloleno inamabu adaema꞉ danaliya, ebete ebe inamabu lawete ma kunu akuloliya, “Ebeno mailo Yonetela.” Ebe mabuma꞉ iba꞉te kawonomamo anoanoiya,

⁶⁴ ebene ebe tetenomolo Sekalayakono tabo kiyawao tanalote wadekobi da꞉kolowimiya, ebete Godoko moio ebo wagilimiya.

⁶⁵ Ebema꞉ ebeno duliyomolo epate ebe anoano tanalo dulamiya iba꞉te kawonomamo toletoleiya, ebene iba꞉te ebe iyaiya tanalo epo epetapi da꞉nikiyawaolamiya, ebe tabote Yudiya opono unuunu damelano duliyomolo bilibilinomamo ebo tiya.

⁶⁶ Ega꞉walo piyate ebe tabo dolowiya iba꞉te eba malagidilolo negeliya, “Me gudu ebete kebako dawama꞉ na꞉keda꞉mene?” Iba꞉te me tabo negeliya mabu ibino umi magumulo Godokono elawote ebe gudugodolo nanitabonomolo itani.

⁶⁷ Ebene Godokono Uliyanate Yonekono nabiwi Sekalayakono tepo magumu detabokiya, ebete Godokono woki ma kunu awokalilamiya,

⁶⁸ “Godote Isalaela epo wadenomamo dowalubilinako, ale ebe ebema꞉ kemoiomalema꞉, mabu ebete ebeno epo walubilima꞉ na꞉pe, tete tatalila ebete ibino kuba osiyodilole magumune ibi ka꞉powagailimene!

⁶⁹ Iyo, Godote a mabuma꞉ dadipati, ebe Kawo Igilo Mula꞉leamedawate na꞉pe, ebe Godokono wokodawa Da꞉ibidikono walone gudu idila.

⁷⁰ Nanitabola, piyate dopamo tetelo Godokono talena magumulo dilukulionamiya, ebete ebe wokopido ebeno woki eba awokalimilo negiya,

⁷¹ piyate dowaote atamo gowela tanalo dosiyodilonaka, ebete a ibino elawo kotone kowagaimene.

⁷² Iyo, ebete tabo idi ma kunu kegiya, ebete aimano ewoniatamo ebeno nilakapo biyatinamene, ega꞉walo ebete iba꞉tamo kebe nopo nanitabonomolo kiyatiyale, ebe wade-talena tabo eba malagidilonalo uwomua꞉ tetelo ebete bosiyodilonakomene.

⁷³ Ega꞉walo ebete aimano ewono A꞉ibalayamatamo nanitabonomolo na꞉kegiya,

⁷⁴ piyate ago da꞉gowelaonaka, ebete a ibino koto magumune kuwatemene, ebene ale ibi tolelamea꞉no ebe kapiyatamo woko bosiyodilonakoma꞉.

⁷⁵ Iyo, ale ebeno ololo apulo talena epoma꞉ eba eda꞉onalo, ale uwomua꞉ tetelo ebeno tuputupu gabodo bowapata꞉lamenama꞉.”