Luku 1:27-76 in Boko (Benin)

Help us?

Luku 1:27-76 in Bibeli Luayãtaalá

²⁷À gɛ̀ nɛnↄɛ lɛ́so pↄ́ aà tↄ́n Maliama kĩ́i. A gↄ̃kpama vĩ Davidi bui ũ, aà tↄ́n Yosɛfu.

²⁸Kɛ́ malaikapi gɛ̃̀ aà kĩ́i, a òɛ̀: Fↄↄ báaade! Dii kunnↄɛ.

²⁹Maliama bílikɛ̀ yã́piwa, à làasookɛ̀ à mɛ̀: Fↄ bee mi dɛa ni?

³⁰Ɔ̃ malaikapi òɛ̀: Maliama, ńsu to vĩa n kũo, asa Lua báaadànguɛ.

³¹Ma! Ńyↄ̃ nↄsi, ní nɛ'i gↄ̃ɛ ũ, ní tↄ́kpaɛ̀ Yesu.

³²Aↄ dɛ gbɛ̃zↄ̃ↄ ũ, wàli oɛ̀ Musude Nɛ́. Dii Lua a aà kpa aà dezi Davidi kpalau,

³³iↄ dɛ Yakↄbu buiↄ kía ũ gↄↄpii, aà kpala aↄ láaa vĩo.

³⁴Ɔ̃ Maliama ò malaikapiɛ: Lá mi gↄ̃ɛ dↄ̃ yãao, bee a kɛ kpelewa ni?

³⁵Malaika wèwà à mɛ̀: Lua Nisĩna a dinɛ, Musude gbãa i mↄma. A yã́i nɛ́ pↄ́ ńyↄ̃ ipi kua aↄ adoa, wàli oɛ̀ Lua Nɛ́.

³⁶N daɛ Ɛlizabɛti nɛgↄ̃ɛ nↄsia sↄ̃ a zikũ guu. Nↄɛ pↄ́ wa dìlɛ fĩi ũpi kú ń nↄ̀ mↄ sooloo tia.

³⁷Asa Lua lí fu yãewao.

³⁸Ɔ̃ Maliama mɛ̀: Dii zↄ̀blenan ma ũ. Aà kɛmɛɛ lá ń òwa. Ɔ̃ malaikapi aà tò we.

³⁹Gↄↄ bee Maliama fɛ̀lɛ gɛ̀ wɛ̃́lɛ pↄ́ kú Yude bùsu gusĩsĩdeu gↄ̃̀ↄ.

⁴⁰À gɛ̀ Zakali bɛ, ↄ̃ à fↄkpà Ɛlizabɛtiwa.

⁴¹Kɛ́ Ɛlizabɛti Maliama fↄpi mà, aà nɛ́ vĩ̀vĩ aà gbɛɛ guu, ↄ̃ Lua Nisĩna dɛ̀dɛ Ɛlizabɛtiwa,

⁴²Ɛlizabɛti wii gbãa lɛ̀ à mɛ̀: Báaaden n ũ dɛ nↄɛ píila. Báaaden nɛ́ pↄ́ kú ń gbɛɛu ũ lↄ.

⁴³Bↄ́n ma ũ kɛ́ ma Dii da mↄ̀ ma gwaii?

⁴⁴Gↄↄ pↄ́ ma swã́lɛ̀ n fↄwa lé, nɛ́ pↄ́ kú ma gbɛɛu vĩ̀vĩ ń pↄnaoɛ.

⁴⁵Báaaden n ũ, asa ń sì yã́ pↄ́ Dii ònɛ a kɛ.

⁴⁶Ɔ̃ Maliama mɛ̀: Báaaden n ũ, asa Málɛ Dii tↄbↄ ma sↄ̃ guu,

⁴⁷ma nↄ̀sɛ lɛ́ yáalↄ Lua ma Suabanawa,

⁴⁸asa à ma yãdà, mapi aà zↄ̀blena pↄ́ mi ka pↄe ũo. Za tia e gↄↄpii wàli omɛɛ báaadeɛ,

⁴⁹asa Lua Gbãadepi yãzↄ̃ↄkɛ̀mɛɛ. Aà tↄ́ kua adoa.

⁵⁰Ì wɛ̃nadↄ̃ gbɛ̃́ pↄ́ aaì vĩakɛɛↄnɛ e ń buiwa.

⁵¹À a gã̀sĩ pòo à a gbãa ↄ̀lↄnɛ́, à waladeↄ fã̀aa ń ń làasooↄ.

⁵²À gbãadeↄ bↄ̀ kpalau, à táaaↄ kã̀fĩ.

⁵³À pↄmaaↄ kpà nↄandɛnaↄwa aa kã̀, à ↄdeↄ gbàɛ ↄgii.

⁵⁴À a zↄ̀blena Isailiↄ ĩ̀a, an yã́ i sãaàguo.

⁵⁵À wɛ̃nadↄ̃̀ Ablahaũ ń a buipiↄnɛ lá à a lɛgbɛ̃̀ wá deziↄnɛwa.

⁵⁶Maliama zↄ̃̀lɛ ń Ɛlizabɛtio lán mↄ àaↄ̃wa, ↄ̃ à gbàsa tà a bɛ.

⁵⁷Ɛlizabɛti nɛ'igↄↄ kà, ↄ̃ à nɛ'ì gↄ̃ɛ ũ.

⁵⁸Kɛ́ aà fã́anideↄ ń aà daɛↄ mà lá Dii wɛ̃nadↄ̃̀ɛ̀, aa pↄnakɛ̀aànↄ.

⁵⁹A gↄↄ swaaↄ̃de zĩ́ aa mↄ̀ tↄ̃zↄ̃i nɛ́piɛ, aai aà mae Zakali tↄ́kpaɛ̀,

⁶⁰ↄ̃ aà da mɛ̀: Aawo! Wàli oɛ̀ Zãa.

⁶¹Aa òɛ̀: Gbɛ̃e ku n daɛↄ guu, a tↄ́ bee vĩo.

⁶²Ɔ̃ aa yã'ò aà maeɛ ń ↄo, kɛ́ aa e dↄ̃ lá a ye wà tↄ́kpaɛ̀.

⁶³Zakalipi pↄ́ pↄ́ á e lákɛ̃wà gbɛ̀a, ↄ̃ a kɛ̃̀wà: Aà tↄ́n Zãa. Yã́pi bↄ̀ ń saɛ ḿpii.

⁶⁴Wegↄ̃ↄ aà lɛ́na gòlɛ, à lɛbↄ̀ lɛ́ yã'o, àlɛ Lua sáaukpa.

⁶⁵Ɔ̃ vĩa ń fã́anideↄ kũ̀ píi, ↄ̃ Yude bùsu gusĩsĩde gbɛ̃́ↄ lɛ́ yã́pi galikɛ píi.

⁶⁶Ɔ̃ gbɛ̃́ pↄ́ aa yã́pi màↄ kũa ń nↄ̀sɛ guu aa mɛ̀: Bↄ́ nɛ́pi aↄ dɛ a ũ ziai? Asa Dii ↄliaaaàziɛ.

⁶⁷Lua Nisĩna dɛ̀dɛ aà mae Zakaliwa, ↄ̃ à ãnabikɛkɛ̀ à mɛ̀:

⁶⁸Wà Dii Isailiↄ Lua sáaukpa! À mↄ̀ a gbɛ̃́ↄ bò.

⁶⁹À Suaban gbãade bↄ̀wɛ̃ɛ a zↄ̀blena Davidi bui guu,

⁷⁰lá a dà a ãnabiↄnɛ aa ò za ziwa.

⁷¹Aa mɛ̀ a wá sí wá ibɛɛↄwa, a wá bↄ gbɛ̃́ pↄ́ zawágupiↄ ↄzĩ.

⁷²Màa à wá deziↄ wɛ̃nagwà, aà bàa pↄ́ kúńnↄ yã́ i sãaàguo.

⁷³À lɛgbɛ̃̀ wá dezi Ablahaũɛ

⁷⁴à mɛ̀ á wá bↄ wá ibɛɛↄ ↄzĩ, í wá gba zɛ́ wà zↄbleɛ vĩasai,

⁷⁵wá kua iↄ adoaɛ̀ gbɛ̃maaↄ ũ e wá wɛ̃ni lɛ́u.

⁷⁶Mpi sↄ̃ ma nɛ́, wàli onɛ Musude ãnabi, asa ḿmɛ ńyↄ̃ dↄaa ǹ zɛkɛkɛ Diiɛ.

Luku 1 in Bibeli Luayãtaalá