18 Sekataiyama꞉ mo enisolo pa꞉ta꞉ alota꞉ Do pita꞉ ota꞉ekie laa ekipa hone wionope laata꞉ Ya wanda꞉ diki telipina꞉ koke ya halopa꞉me leekeme.
19 Mo hande enisoloma꞉ ipika꞉ pi hombo peaaso alota꞉ I̱ta꞉ Keipitelee laata꞉ Koda꞉na꞉ leke popelekena꞉ hao halome. Kutupa Koda꞉ma꞉ta꞉ do pi seliapo neke pa꞉ta꞉ lonoyeke I̱ tapaeya꞉me.
20 Do I̱ma꞉ mea epolo pita꞉ ipika꞉ nate epea꞉ka꞉na꞉ ota꞉ yaalo pa꞉la꞉pate nakana꞉ma꞉ na opueleme laata꞉ Kota꞉ do alo pi na opiki handaa neketa꞉ pi na leke kake a꞉mba halipikie. Kutupa I̱ma꞉ neke pa꞉ta꞉ do la꞉ witolo pi ota꞉ yaeya꞉ka꞉na꞉ta꞉ naka꞉ kake paa lombaa pi lelipikie leekeme.
21 Koto pi alo haepekepate mo wanda꞉halima꞉ hama꞉ nane hata꞉ Sekataiya epena꞉ handeteke haemekepate a̱i̱ na epeeke handaata꞉ ikana꞉ma꞉ hone ta꞉ta꞉ ta꞉ta꞉ wimikime.
22 Kutupa Sekataiya opolu bao hama꞉ nane epeekepate mo wanda꞉hali pa꞉ta꞉ pi ma꞉nda꞉ lapeke na yeekeme. Koto ekina꞉ wanda꞉halima꞉ hone witolota꞉ ipikana꞉ma꞉ mo tembolo da tukiki pa꞉ta꞉ hata꞉ aleta꞉ ma꞉nda꞉ handolo pia꞉me la hone wimikime. Kutupa Sekataiyama꞉ pi lapeke na yaalo hata꞉ wanda꞉hali pa꞉ta꞉ ipika꞉ kiki homeke wankeaaso hata꞉ kikima꞉ kone waleekeme.
23 Sekataiyama꞉ mo hande tembolo da pa꞉ta꞉ ipika꞉ e poko hayeke natemanu paeyeketa꞉ ipika꞉ da paa la꞉ka꞉la peekeme.
24 Kutupa koto hoki naneta꞉ ipika꞉ wanda꞉ Elisa꞉bedima꞉ weki loke lombeeketa꞉ sumba꞉ yunki hata꞉ ipika꞉ da na mina꞉pa꞉lake pa pitiekeme.
25 Elisa꞉bedima꞉ alota꞉ Tekehalima꞉ ame do tupa꞉ tamba꞉ ma꞉la꞉me laata꞉ Wanda꞉hali pa꞉ta꞉ yaala꞉ma꞉ homoa꞉ ekita꞉ ipikana꞉ma꞉ yoka꞉ mea baala꞉me leekeme.
26 Kutupa Elisa꞉bedima꞉ weki loke lomba haena꞉ sumba꞉ yunki mindiki a꞉pa opeeke dina꞉ta꞉ Koda꞉ma꞉ hande enisolo Keipitele mo Ka꞉lili nane hayeke da Na꞉sa꞉tete da pa꞉ta꞉ tapaeyekeme.
27 Mo hande amba꞉ hayeke kini hali Deipidina꞉ tapake hali Diosepena꞉ da polo pieke wandiki pa꞉ta꞉ pi la꞉ ulu pena꞉ tapaeyekeme. Mo wandikina꞉ bikita꞉ Metie.
28 Mo hande enisoloma꞉ ipiki pa꞉ta꞉ pua alota꞉ Keiyae. Neketa꞉ Tekehalima꞉ ota꞉ amba꞉ epeaala꞉ wandikie. Neke yaapo hala꞉me leekeme.
29 Metima꞉ koto pi opiekepate Eki hau pulu polo ekina꞉ ala꞉pe laa ipika꞉ honema꞉ mo pi teke wotu weiyekeme.
30 Mo hande enisoloma꞉ ipiki pa꞉ta꞉ alota꞉ Metio. Koda꞉ma꞉ neke pa꞉ta꞉ hone wotu wita꞉la꞉ma꞉ paala꞉ma꞉ na homa꞉peke laata꞉
31 Neketa꞉ weki loke lombaata꞉ wetepena꞉ hali weki mendilipikima꞉ ipika꞉ bikita꞉ Yesu lapeke.
32 Kutupa ipiki daeyaata꞉ hali tieke halieke. Kutupa ipikita꞉ Ota꞉ Manda Hala꞉ Koda꞉na꞉ Eiyeke lelimikie leekeme. Kutupa mo hande Tekehali Koda꞉ma꞉ ipika꞉ amba꞉ titina꞉ kini hali Deipidina꞉ kilu tombuao hayekeeki ipikana꞉ma꞉ mina꞉ lelieke.
33 Kutupa ipikita꞉ Dieikope tapake wanda꞉halina꞉ kini hali hao hata꞉ ipika꞉ kilu tombuao halo pa꞉la꞉ ekita꞉ na paelieke leekeme.
34 Koto leeketa꞉ Metima꞉ mo enisolo pa꞉ta꞉ alota꞉ Kotoeki pulu pa꞉la꞉ ekita꞉ ekipape. I̱ta꞉ halina꞉ da a̱i̱ na polome leekeme.
35 Mo hande enisoloma꞉ ipika꞉ pi hombo peaaso alota꞉ Mo Holi Sipitidi neke pa꞉ta꞉ ipilieke. Kutupa make Ota꞉ Manda Hala꞉ Koda꞉ ipika꞉ wele pita꞉la꞉eki neke pa꞉ta꞉ a꞉pa pitilieke. Kutu pita꞉la꞉ ekima꞉ta꞉ mo hande nakana꞉ma꞉ mondulu pele yako piki weki ipikita꞉ Koda꞉na꞉ Eiyekee lelimikie.
36 Naka꞉ tapake wanda꞉ Elisa꞉bedi pa꞉ta꞉ hone wia꞉peke. Ipiki pa꞉ta꞉ Weki kenohali wanda꞉e lo halemepateta꞉ ame ipikita꞉ koke wanda꞉sikima꞉ kone ipika꞉ weki loke lombeeke sumba꞉ yunki mindiki hata꞉ amba꞉ opa꞉la꞉me laata꞉
37 Hau paeyao kone Koda꞉ma꞉ pea꞉peke ya꞉la꞉me leekeme.
38 Koto leeke handaa Metima꞉ alota꞉ I̱ta꞉ Tekehalina꞉ e pokao halo wandikie. Nakana꞉ma꞉ la꞉ witele tupa꞉ pina꞉e leekeme. Kutupa mo enisolota꞉ mo wandiki mina꞉pa꞉lao peekeme.
39 Koto pita꞉ kone Metita꞉ tiao Diuda nane peiyene wieke pa꞉ta꞉ hayeke da ma꞉nda꞉ pa꞉ta꞉ a̱i̱ya peekeme.
40 Puaata꞉ Sekataiyana꞉ da pa꞉ta꞉ honda꞉ pamba pua Elisa꞉bedi pa꞉ta꞉ keiyae pi pua leekeme.
41 Metima꞉ leeke pi Elisa꞉bedima꞉ opitolo haena꞉ kone mo ipika꞉ weleke pa꞉ta꞉ pitieke weki la꞉ma꞉ la꞉ma꞉ piekeme. Kutupa Elisa꞉bedima꞉ mo Holi Sipitidima꞉ tumba pitina꞉ pi
42 anekema꞉ alota꞉ Wanda꞉weki poluna꞉ kone Koda꞉ma꞉ neke mea epeaala꞉me laata꞉ Nakana꞉ma꞉ mondulu pele weki make Koda꞉ma꞉ amba꞉ epeaala꞉me.
43 Yaka Tekehalina꞉ ama꞉ma꞉ I̱ handolo epele ekita꞉ do hau tiekena꞉ pa ekipeke epelepe leekeme.
