LUKU 17:20-35 - Luda yã takada kↄ̃n Bokobaru yão

²⁰Farisinↄ Yesu là kpata kɛ̀ bↄ̀ Luda kiia bↄna gupuraaazi, ben à wèńla à bè: Kpata kɛ̀ bↄ̀ Luda kiia è bↄ gupuraaa wà e kↄ̃n wɛ́ɛoro.

²¹Weé be à kú kɛ̀ ke à kú kãaro. Kpata kɛ̀ bↄ̀ Luda kiia pì kú a tɛ́ kɛ̀mɛ.

²²Ben à bè a ìbanↄnɛ: À gurↄↄ e mↄↄ kɛ̀ é Gbɛ̃ntee Nɛ́ sugurↄↄ pìnↄ doke ena ni dɛ, é ero.

²³Weé beare à kú kãa ke à kú kɛ̀, mↄde àton gáro, àton tɛ́ńziro.

²⁴Lán loupina è guu pu ludambɛ lɛ́ gura kɛ̀ kↄ̃n à lɛ́ kãao nà, lɛn eégↄ̃ dɛ lɛ Gbɛ̃ntee Nɛ́ sugurↄↄa.

²⁵Séto à wɛ́ɛtãmma è maamaa gĩa, tↄ̃ↄrigbɛ̃nↄ é gízi.

²⁶Lán à dɛ nà Nuu gurↄ, lɛn eégↄ̃ dɛ lɛ se Gbɛ̃ntee Nɛ́ sugurↄ.

²⁷Gbɛ̃nↄↄ e pↄ́ blee wèe í mii, wèe nↄↄ sɛɛ wèe zã kɛɛ ai Nuu gàa à gɛ̃̀ góro'itɛ guu, ben í dà andunala, wà gàga píngi.

²⁸Lɛmɛ dↄ Lutu gurↄ, wèe pↄ́ blee wèe í mii, wèe pↄ́ luu wèe pↄ́ yaa, wèe pↄ́ tↄ̃ↄ wèe kpɛ́ boboo.

²⁹Gurↄↄ kɛ̀ Lutu bↄ̀ Sↄdↄmu, tɛ́ kↄ̃n ↄfãntɛ̃gbↄ̃o kwɛ̀ bↄna ludambɛ, ben wà gàga píngi.

³⁰Lɛn eégↄ̃ dɛ lɛ gurↄↄ kɛ̀ Gbɛ̃ntee Nɛ́ é bↄ gupuraaa.

³¹Gurↄ beeea gbɛ̃ kɛ̀ kú a kpɛ́ musu tón pita à gɛ̃ kpɛ́ guu à pↄ́nↄ sɛ́ɛ à bↄoro. Lɛmɛ dↄ gbɛ̃ kɛ̀ kpɛ́ buraa tón liara à pↄ́ sɛ́ bɛro.

³²À tó Lutu naↄ̃ yã dↄagu.

³³Gbɛ̃ kɛ̀ yezi àgↄ̃ a wɛ̃̀ndi kũna é korazi. Gbɛ̃ kɛ̀ gì a wɛ̃̀ndizi sↄ̃, adee égↄ̃ wɛ̃̀ndi vĩ.

³⁴Mɛ́ɛ ooare, gwãavĩ beeea gↄ̃ↄn plaaanↄ égↄ̃ daɛna kↄ̃ saɛ, weé gbɛ̃ doo sɛ́ wà gbɛ̃ doo tón.

³⁵Nↄgbɛ̃ gↄ̃ↄn plaaanↄ égↄ̃ pↄ́ lↄlↄↄ gu dↄ̃nkↄ̃n, weé gbɛ̃ doo sɛ́ wà gbɛ̃ doo tó.