16 Mosese kasegene, kasnampa vahe'mofo kea huama huno Joni knare eme atre'ne, ananteti e'neana Anumzamofo kumamofo musenke huama nehigeno, hakare vahemo'za hanaveti'za ana kumapi vanagura kazigazi hu'za nevaze.
17 Hu'neanagi amane fru huno monane, mopanena fanane hugahianagi, osi avone kasegemo'a vaga oregahie.
18 Iza'o a'ma netreno ru a'ma erinuno'a, anamo'a monko'za hugahie. Hagi mago ne'mo'ma, ve'a atre'nesi'a a' erisanimo'a, monkoza hugahie huno hu'ne.
19 Jisasi'a amanage hu'ne, Mago ne'mo afufenoma'a hakare me'negeno tusi'a zgo atreno, koranke kukena nehuno, asanema nehia ne'za knane knane erino neneno, so'e huno mani'ne.
20 Ana nehigeno noma'a kasante mago ne', fenoma'a omane'nea fugo namune ne' antazageno manitere nehiane. Ana ne'mofo agi'a Lasarusi'e.
21 Lasarusi' maseno mani'neno, feno ne'mo ne'za nenesigeno ankra heramisiama'a erina nesue huno nehuno emani'negeno, kramo'za namuma'areti zamagnefu'nanu hu'ne hane hu'naze.
22 Anante amunte omane nera frige'za, ankero vahe'mo'za eri'za Abrahamu nemnia kumate vu'naze. Vutageno afufeno nera anante frige'za eri'za ome asentageno,
23 hagi tevefi manineno tusiza huno ata negrigeno kenagamuteno Abrahamuke Lasarusikea, afete magopi mani'nakeno zanage'ne.
