25 Awelheyel arrantherr atyeng? Arrantherr angka Elijah-akert iterl-areyel. Ranap angkakert Akngey-wenh Israel-areny awank-akerr anenh. Akngeyelan kwaty thweneyangarl aherrety irrpetyelan. Amern-weny ayntenh, ingkerrenh-anem angayakwan apmer ikwer-itwew. Kel akelty inpert Jew-rneman akngerrarl anenh Israel-itwew.
26 Akngeyelanap Elijah thweneyangarl akelty inpert Jew ikwer-rnem-warlan, renh-rnem alpemeleyew, arrangkwarl. Ra renh thwenew akelty inpert Sidon-areny-warl, tawen Zarephath-areny-warl.
27 Arrantherr angka Elisha-akert iterl-areyel. Ranap angkakert Akngey-wenh Israel-itwew awank-akerr anenh arrpemarl. Apmer ikwer-itwew arntety Jew-rnem akngerr anenh tywen-angketyarr. Elisha-elan ikwerenh-rnem mwerreley-angenh, arrangkw. Ranap artwa alethang Naaman mwerrelew, apmer ingwer-areny Syria-areny.” Alakenh-anyem Jesus-el akalty-anthenh.
28 Kel ingkerrenharl warl ikwerel anew-anenh awelherremel, rerneman Jew-rnemarl. Jesus rernem awew, rarl alakenh angkenh, rernemap ahelerrew ikwer.
29 Rernemap rtnerlarr-alhew, renh antwerrkemel, atnwenheynemel aketh-warl arleng. Tawen Nazareth ranap apwert-itwew irrwerl. Rernemap renh akngeynew apwert impalth-warl, renh twetiweyew irrwerl-they, ra aytneyew kwenel-athek ilweyel.
30 Rernem nthekwern renh antwerrkey-angenh, arrangkw. Ran alanty-alperl-alhew ikwer-rnem-wety.
31 Ikwer-penh Jesus tawen Capernaum-warl alhew, Galilee-ampeny-warl. Ran apmer ikwer-itwew aney-alhew Saturday-ew-atety. Arlta ikwerel-antey, arlta ltyerrey-angker Jew-rnem-wenh-angkwarr ikwerel, rap aylpew tyaty Jew-rnem-wenh ikwer-warl. Rap angka Akngey-wenh akalty-anthenh.
32 Angka ikwerenhant rap ilenh, angka ingwer-rnem-wenh iley-angenh, arrangkw. Rernemap apatewarl ikwer.
33 Artwa arrenty-akert anenh warl ikwer-itwew. Rarl akalty-anthenheng-arey, arrenty alakenh arlkew,
34 “Ay! Ngan Jesus Nazareth-areny! Nthakenh ileyenh ntwan anenhantherrenh? Ngang irrwerl-they apetyew, anenhantherrenh irrenteyew? Atha ngenh iterl-areyel. Ngan artwa mwerrarl, Akngeyelarl thwenew. Ngan inngarl ikwerenh!”
35 Jesus-el arrenty iltew, “Nga akeleyt anaynta! Tyerrelha ikwer-they!” Arrentyelan artwa renh ilatwew athenemel, rap ikwer-they tyerrelhew-anem. Artwa renhanap akep-akalthey-angenh-antey, mwerr-antey.
36 Ingkerrelap arew, rernemap apatew angkerremel-anem, “Angka ilek-apeny ran angkeyel? Artwa nhenhel angka rlterrk ingwer-lkwer ileyel. Ran arrenty-rnem ileyel, rernemap iylparethelarl awem! Rernem tyerrelherl-alhem, alpem-anem!”
37 Apmer yanh-areny-rnemel angka ikwer-akert ileynenh ingwer-rnemew Galilee-areny-rnemew.
38 Ikwer-penh Jesus warl ikwer-they anperl-alhew, apmer Simon-wenh-warl-anem alhew. Simon-ew apelty-rnemel renh ayernew, “Mwerikw Simon-wenh arntety aynteyel warl nhak-itwew, akapwert rwenp innga. Ntwa apek renh alpemelem?”
39 Ra rtney-alhew akelty arntety ikwer-itwel, rap angkew, “Ipmelha! Tyerrelha ikwer-they!” Arwapeny tyerrelherl-alhew arntety ran, rap ywerrerl-alhew-anem. Akelty rap akwentenhey-alpew, amern-anem ikwer-rnem anthew.
40 Arlta ikwerel-antey, itwernan aylperl-alhenhel, apmer ikwer-areny-rnemel arntety-rnem arrenty-akert-rnem-then akngetyenh Jesus-warl, ra mwerreleyew. Ra itep-anem arrernenh ikwer-rnem-warl, mwerrelemel.
