Luke 24:13-19

¹³Arlta ikwerel artwa atherr alhenh tawen akely-warl Emmaus-warl, Jerusalem-they arrerenty. Ratherrap Jesus apentenh.

¹⁴Alpenharl ratherr angkerreynenh Jesus-ew, ipma anaynt ayntey-angenh intey-itwew.

¹⁵Ratherrarl angkeynenh-antey, Jesus rantey-anem anteng-they alpenh ikwer-atherr-warl, rap alpenh-anem ikwer-atherrel-arleng.

¹⁶Ratherran renh alhengk-arey-angenh, arrangkw. Ingwerew-athen arenh.

¹⁷Rap renh-atherr ayernenh, “Nthakenh mpwelanth angkerrenh?” Ratherr rtneyelpew, amperrngerremel ayternenh.

¹⁸Artwa anyent itnan Cleopas ra angkew, “Ingkerrelan iterl-areyel, Jerusalem-itwewarl apmwa ayntew. Ntwan anyentelant iterl-arey-angenh?”

¹⁹Rap ayernew, “Apmwa ilek-apenyarlap ran?” Ratherrap tyernew, “Artwa weth Jesus Nazareth-areny, ranap angkakert Akngey-wenharl. Arawerrng rlterrkel ra arntety-rnem mwerrelenh, angkethen akalty-anthenh Akngey-wenh arraty-angkwarr. Akngerran ikwer inkwerelhenh. Akngeyan ikwer inkwerelhenh arrpemarl.