Luke 1:18-30

¹⁸Zechariah-el antyerl ayernew, “Inngang angka ngkwenh arraty? Aylanthan ampwatherr-anem! Nthakenh aylanth awey akelyan atnyenem?”

¹⁹Antyerlel renh tyernew, “Ayengan Gabriel. Ayeng Akngey-itwew rtneyel irrwerl-itwew. Ra ayenh thwenew, angka mwerr-angker ngkweng ileyew. Nganap atyeng awelhey-angenharl!

²⁰Ranap inngarl aynteyenh! Nhepenh-anyem nga angkey-angenh-anem, ngap akerter-anem arlengew-alenty aneyenh, ngarl atyeng irrpeltherrew. Alerengkwarl ngkwenh atnyeneyenhel, Akngeyelap ngenh angkiparreleyenh arrpemarl.” Alakenh-anyem antyerlan ikwer angkew.

²¹Zechariah-an antyerlew tyaty ilkwitwew awelhenh, ingwer-rneman akethel-antey rtnenherrenh. Rernem ikwer mpwelhenh, aketh-warl tyerrelheyew. Rernemap iterrenh, “Nthakenh irrew, kwenan arleng-alenty ywerrew?”

²²Rarl kwen-they tyerrelhenhey-alpew, ranap nthakenh iley-angenharl, rarl antyerl arew. Rap akerter-theyant iltyerrenh, ikwer-rnem angkeyew-arrpantey. Rerneman iterl-arew-anem, rarl altyerr mwerr-angker warl kwen-itwew arew.

²³Zechariah rap tyaty ilkwitwew arlta 7-ew-atety anenh. Rarl warrk irrenh-penh, rap apmer-warl-anem alpew.

²⁴Ikwer-penhan akelty ikwerenh Elizabeth alerl-antey mpwelhenh. Rap warl kwen-itwew alkent 5-ew-atety anenh, rarl nyerrerrenh, ingwer-rnemel renh arewerr.

²⁵Rap angkenh ament-antey, “Ayengan ampeweny anenh. Akngerrel ayenh kwanthenh, rernemap ayenh nyerrel anthenh. Aleyan Akngeyel ampa atyeng anthew-anem. Kel-anem, ayeng aketh-warl tyerrelhem. Ayenharl akngerrel areyenh, rernem atyeng inkwerelheyenh, Akngeyelan ayenh arntarnt-arayntemarl!”

²⁶Elizabeth warl ikwerenh-they tyerrelheweng-arey, Akngeyel antyerl Gabriel thwenew tawen anyent-warl, itnan Nazareth, apmer Galilee-ampeny-itwew.

²⁷Rap antyerl thwenew, kwey aleyak Mary-ew angkeyew. Mary-anap Joseph-ewant mpwelhenh, ranap artwitwewan ayntey-angenh, arrangkw-antey. Joseph ran atyetyart David-wenh-antey anew.

²⁸Antyerlan Mary-warl apetyew, rap ikwer angkew, “Ya, Mary! Ingkart ngkwengel-arleng aneyel, ngkweng inkwerelhemel!”

²⁹Mary-an apatew. “Ilek-athek wenh ra alakenh atyeng angkew?”

³⁰Antyerlan ikwer angkew, “Mary, Akngeyan ngkwengarl inkwerelheyel. Atererrey-angenh.