14 Èle èèna ka, Yesus lèpa hari asa propensi Galilea, te Roh Lamatua dhu Mola-Mèci hia Ne koasa. Nèbhu boe ka dhèu-dhèu ètu dꞌara rai èèna, mulai tadhe kolongara Na.
15 Na ajꞌa-nori dhèu ètu dꞌara èmu manèngi-mangajꞌi dhèu Yahudi ètu mia-mia. Ka dhèu koa-kio Ne, peka na, “Yesus ne dhu ele madha, nga!”
16 Ca tèka, Yesus mai asa rae Na Nasaret. Lèke dènge lodꞌo manèngi-mangajꞌi dhèu Yahudi, dhu ra pangare na ‘sabat’, hèia laꞌe asa dꞌara èmu sabajꞌa sèmi dhu tema Na tao. Ka Na kèdꞌi titu ho neo baca nèti Sasuri Ama Lamatua.
17 Ka ra jꞌole hia Ne sasuri nèti baki Yesaya. Hèia Na bhoke tenge ayat, ka Na baca, peka na,
18 “Koasa Roh Ama Lamatua abhu ètu Jaꞌa. Nèti èèna ka, Na pajꞌujꞌu Jaꞌa, ho peka-padhai Lii Lolo Beꞌa Ama Lamatua mi dhèu-dhèu dhu unu aadꞌo. Nèngu pua le Jaꞌa mai, ho lole, na, dhu ana bèdho, èèna na patalala si; dhu bèdhu, èèna na bisa rèdhi hari; dhu lèke ènyi nèti dhèu, èèna na patabuli eele.
19 Te limuri ne dꞌai le lodꞌo Lamatua, sèna ka pala mamuri mi dhèu unu Na.”
20 Baca nare sasuri ne, ka Yesus lulu hari, hèia Na jꞌole asa ama dhu nèdꞌu kasasi, ka Na madhèdi. Dhèu aaꞌi-aaꞌi ètu dꞌara èmu sabajꞌa èèna ladhe patae Ne.
21 Hèia Na peka dènge ra, “Dhu miu tadèngi nèti Sasuri Ama Lamatua deo na, neꞌe ne, jꞌajꞌi le!”
