Lukas 22:4-63 in Bola

⁴ E Iudas i vano, i ta turana e huriki a prister dagi, a nugumaheto ri tagari a roho na Vure. I ta turane ria na dala ge habia na limane ria e Isu.

⁵ E huriki nga ri vivi, lakea ri takia e Iudas ri gi habi a moni vona.

⁶ E Iudas i longo vona a ngava ne ria, lakea i matakanea tara dala kamumu ge maragisia. I davea a parava nahea e huriki ala kupo ri gi made turane Isu.

⁷ A Habu na Bret i Uka Is i bele ngane. Na parava iea a tuna sipsip bara ni rabalaki ne vona a nihabi na Habu na Nipagepolo.

⁸ Lakea e Isu i taki e Petrus e Ioanes i ta maea, “Muru muga, muru rata puru a kinani ne hita na Habu na Nipagepolo.”

⁹ Lakea ru nana, “I vai a hini o ngaru miri gi rata puru a maki vona?”

¹⁰ E Isu i koli, i ta maea, “Na tahuna muru dili na tanga, a bakovi i kaloho a ulo na naru bara i pugai marua. Muru ramaia, muru dili na ruma i dili vona.

¹¹ Muru takia a tahona ruma, muru ta maea, ‘A mari ni tovo i nana vona a tabeke na mosi ge kani turana e huriki a murimuri vona na habu.’

¹² Muri bara i vakasiri marua vona a tabekena ruma i ngavaka polomeli, i tahoka pali a gula ni made ni kado puru. Muru gutu puru vonga a maki ni kani ne hita.”

¹³ Muri ru vano, ru matai a maki lobo i manga a hini i taki muga e Isu. Lakea ru rata puru vonga a kinani na Habu na Nipagepolo.

¹⁴ Ngane ta ri gi kani, lakea e Isu turane huriki a apostolo vona ri vano, ri made haluia a dede.

¹⁵ Lakea i taki ria i ta maea, “A pasimata ni kani turane mua vona a kinani na Habu na Nipagepolo, muga ne iau ga bole a nimadihi.

¹⁶ A taki mua, i uka ma ga kani tabu vona a habu iea. Muri ma, na tahuna a pelegona habu iea ge bele muholi na harikianga na Vure, bara kani tabu vona.”

¹⁷ Muri e Isu i bole a kikei na vain, i kavurikea a Vure, i ta maea, “Mu bolea a kikei na vain iea mu vaveru,

¹⁸ a vuhuna a taki mua, i uka ma ga ninu tabu vona a kanena vain iea ge harena na tahuna a harikianga na Vure ge valai.”

¹⁹ Muri e Isu i bole rikea a bret, i kavu­rikea a Vure, i kevea, i veru ne huriki a apostolo vona, ri gi kani, i ta maea, “Ra bret iea a bobogu, a habia ge korimule mua. Mu rata mavonga vakaroro, mu luhoi mule iau.”

²⁰ Na tahuna ri kani lobo, e Isu i bole rikea a kikei na vain, i ta maea, “A vain iea a kilakila na ngava dagi karaba a Vure ge rata turana e huriki. A ngava dagi karaba iea ga vakatorea na daragu, ra daragu ge pori, ge korimule mua.

²¹ “Pali tara ne mua i made turagu koea na dede bara i habi iau na limane huriki a pile,

²² a vuhuna bara i bele nau, iau a Tuna Bakovi, ge manga a hini ni here puru hosi. Pali a Vure bara i ratapilea ra viri ge habi iau na limane huriki a pile.”

²³ Lakea ri vanana vona e rei ne ria ge ratea ra rabu iea.

²⁴ Muri ri vahehe lae ne e rei ne ria ge muga ne ria lobo.

²⁵ Lakea e Isu i taki ria i ta maea, “E huriki a bakovi i uka ma ria a Iuda, a hariki ne ria a bakovi hateka, ri taki ta ri kori e huriki.

²⁶ Pali mua, naha ni rata mavonga. E rei a viri i ngaru ni muga ne mua ge manga a viri kiroko ne mua. A viri i ngaru ni matakari ge manga a vora ne mua.

²⁷ E rei a viri i dagi? A viri i mamade na dede o a vora i habi a maki ni kani vona? A viri i mamade na dede i dagi. Pali iau a valai, a made turane mua ge iau a vora ne mua.

²⁸ “Mua kunana e huriki mu made turagu, i uka ma mu ha taro iau na tahuna a tahoka a nitoni.

²⁹ Lakea a habia ne mua a harikianga, i manga e Tata i habia nau a harikianga.

³⁰ Muri bara mu kani mu ninu turagu na harikianga nau, bara mu made na gula-hariki mu pelekado e huriki a kabu ne Israel ala ravulu a polona i rua.”

³¹ Lakea e Isu i ta maea, “Simon, Simon, o longo! E Satan i nana tora a Vure pali ge toni tora mua.

³² Pali iau a vasileki pali vomu nahea go lohopile iau. Muri, na tahuna o hamule valai tabu nau, o tuhori e huriki a turamu ri gi pesi tora tabu.”

³³ Lakea e Petrus i takia, “Bakovi Dagi, iau bara dili turamu na bavi, bara mate turamu!”

³⁴ Lakea e Isu i takia, “Petrus, muga na kureko ge tangi barama, bara o nana rovi iau balaka tolu.”

³⁵ Muri e Isu i nana e huriki a apostolo i ta maea, “Na tahuna a rudu tala mua, i uka ma mu laho turana holekopa, a kulopi, a vahapolo, pali mu bala ranga maki, o i uka?” Ri koli ria ri ta maea, “I uka.”

³⁶ Lakea e Isu i taki ria i ta maea, “Pali ngane, e rei a viri i tahoka a holekopa, a kulopi, ge bole. E rei a viri i uka bainat, ge habi a varakia vona, ni gi kona, ge vano ge kona a bainat,

³⁷ a vuhuna a ngava ni here puru na Hinere i ta maea, ‘Ri taki ia, ta ia a turana e huriki a bakovi hale.’ A maki lobo ni here virihi mai iau vona bara i bele muholi.”

³⁸ Lakea e huriki a murimuri vona ri ta maea, “Bakovi Dagi, mi tahoka a bainat i rua.” Lakea i taki ria, “Pali kamumu.”

³⁹ E Isu i pe a tanga, i sike na lolo e Oliva, i manga a hini i rata vakaroro. E huriki a murimuri vona ri vano turana.

⁴⁰ Na tahuna ri bele vona a hini nga, i taki ria, i ta maea, “Mu vasileki nahea mu gu dili na nitoni.”

⁴¹ Muri i pe ria, i laho tala popote, i turume puru, i vasileki maea,

⁴² “Tata, ioe bara o ngaru, o korimule iau vona a nimadihi dagi ta ga bolea. Pali naha ni muri mai a ningaru nau. O muri mai a ningaru vomu.”

⁴³ Muri a agelo tara i bele valai na hunu, i tuhoria.

⁴⁴ E Isu i hataki a nimadihi dagi, lakea i vasileki tora. A mavidia i pori na kulina i manga a dara, i sisi puru na malala.

⁴⁵ Na tahuna i vasileki lobo, i hamule mai a murimuri vona, i matai ria ri mahita, a vuhuna i malulu a tuhane ria ni dodo hateka.

⁴⁶ Lakea e Isu i taki ria, i ta maea, “I navai mu mahita? Mu hadongo, mu vasileki nahea mu gu boru na nitoni.”

⁴⁷ Na tahuna e Isu i tabana ni ta, e huriki a tara bulolo ri laho valai. E Iudas, ra turana e huriki a apostolo ala ravulu a polona i rua, i muga ne ria, i vakasiri a dala ne ria. I valai tabukoi ne Isu ta ge ngurua.

⁴⁸ Pali e Isu i takia, i ta maea, “Iudas, i navai o ngurua a Tuna Bakovi go habia na limane huriki a pile?”

⁴⁹ Na tahuna e huriki ri pesi haluia ri masia a maki ta ge bele, ri ta maea, “Bakovi Dagi, o ngaru mete ge rabalaki ria na bainat?”

⁵⁰ Muri a viri tara ne ria i palakudua a talingana vora na prister dagi, ra talingana na kanena.

⁵¹ Pali e Isu i ta maea, “Naha ni ratea a naro iea!” Muri i padoi a talingana bakovi, i kamumu mule tabu.

⁵² Muri e Isu i taki e huriki a prister dagi, a nugumaheto ri tagari na roho na Vure, a gare ra ri valai ri gi lakavua, i ta maea, “Mua mu rata manga iau a bakovi hale mu valai turana bainat, a lebo.

⁵³ A made turane mua na parava lobo na roho na Vure, pali i uka ma mu lakavu iau. Pali ngane a parava ne mua, a parava na nitora na uvo.

⁵⁴ Ri lakavu loboa e Isu, muri ri turari lakea na ruma na prister dagi. Pali e Petrus i muri gosi basi popote vona.

⁵⁵ Ri tunu lobo a kanono na matana ruma, lakea ri made puru. E Petrus tara i made turane ria.

⁵⁶ A vora ngatavine tara i valai i masia e Petrus i hua a kanono. I matanonoa, i ta maea, “Ra bakovi iea, ia tara i turane Isu.”

⁵⁷ Pali e Petrus i lavuni i ta maea, “Ngatavine, iau i uka ma lohoka vona a bakovi iea.”

⁵⁸ I uka ma i tabaka, a bakovi tara i masia e Petrus, lakea i ta maea, “Ioe tara o turane ria.” Pali e Petrus i lavuni tabu, i ta maea, “Bakovi, iau i uka ma a turane ria!”

⁵⁹ Muri i polo a kilala i taku, i valai tabu tara viri, i ta kinigao ma ia i ta maea, “Muholi hateka ra bakovi iea i turana, a vuhuna ia a bakovi o Galili.”

⁶⁰ Pali e Petrus i lavuni tabu, i ta maea, “Bakovi, iau i uka ma lohoka vona a maki o takikia!” E Petrus i uka ma i vakalobo ni ta ma, a kureko i tangi.

⁶¹ E Bakovi Dagi i matagege, i mata nonoa e Petrus. Lakea e Petrus i longovisia a ngava i takia e Bakovi Dagi baroko, i ta maea, “Muga na kureko ge tangi barama, bara o nana rovi iau balaka tolu.”

⁶² Muri e Petrus i ha tala, i tangi hateka.

⁶³ E huriki a bakovi ri tagaria e Isu ri vakatubu ni padikedea, ri ubia.