54 Ana tulu-fali Ria lahenda Israel nara, ma natudu kokosen dale kasian Na neuꞌ asa.
55 Maꞌulu na Ana tao hekene-barataꞌ no ita bei-baꞌi nara, riꞌ baꞌi Abraham no basa tititi-nonosi nara. Besaꞌ ia hekene-barataꞌ ria mana hekeꞌ losa doo-doo na neu.”
56 Basa de Maria leo no Elisabet losa bulaꞌ telu. Boe ma ana fali leo uma na neu nai Nasaret.
57 Ledo-fain losa boe ma, Elisabet boki na ana touꞌ esa.
58 Kileoboboki nara ro koro isiꞌ ara ramanene tutuiꞌ ria rae, Manetualain natudu dale malole Na so, ma fee Elisabet anaꞌ esa. Boe ma basa si ramahoꞌo boe.
59 Anaꞌ ria faiꞌ falu, boe ma ara sunat ana, tuka lahenda Yahudi ra atoran na. Ara nau foi anaꞌ ria nade Sakaria, tuka papa na nade na.
60 Tehuu mama na ta nataa fa, ana nae, “Muste foin nade Yohanis!”
61 Tehuu ara sipoꞌ rae, “Ubeaꞌ taon de here nade Yohanis a? Ta hapu lahenda esa nai emi kileoboboki mara pake nadeꞌ ria!”
62 Boe ma ara tudu Sakaria, fo nau fee anaꞌ ria nade bea.
63 Sakaria tudu fo hule lei no garefe. Ara feen, boe ma ana duiꞌ nae, “Yohanis!” Boe ma basa lahenda ra roi ramakokoaꞌ a.
64 Kekeneu te Sakaria bisa dedea seluꞌ. Boe ma ana io-oa neuꞌ Manetualain.
65 Basa lahenda fo leo raneneaꞌ rai na, ara bii-ramataꞌu. Ma mana dadiꞌ ria tui-bekan nai sira talada, losaꞌ bisa lahenda rai propinsi Yudea lete malelepi nara boe, ratui hihii-nanauꞌ ia.
