48 Ngansa gau edag kapei mao, be ei imata nanan gau ele taine paeaeanga. Ega, labone ga muriai ga ilalala ga ila, gid panua toa ngada oa ga tikeo ga Deo ikado kemi tau ngan gau,
49 ngansa Deo matua soke tau ikado danga kapei ngan luanga gau. Ei ieda itutui tau.
50 Ele kadonga lolo isat aea iparangrang gid panua toa tilolon ngan ei, labone ga muriai ga ilalala ga ila.
51 Ngan ibage, ikado naurata kapeipei. Gid panua toa tiuangga gid kekelegid edad kapeipei, ei isere gid.
52 Gid mamaron kapeipei toa timamado ngan led mul madonga aea kapeipei, ei isek gid ga tisulug gadio, be gid panua toa edad mao, ei isoa gid ga tidae.
53 Gid panua toa pitoreagid, ei iparangrang gid ngan danga kemikemi, be gid panua toa led pat kapei, ei isere gid ga tila sapaean.
54 Ei ilua gid ele paeaeanga Israel ad, be imata sapian ele kadonga lolo isat aea ngan gid oa mao.
55 Eine ele kadonga lolo isat aea toa ikado ngan Abraam ga itubtub toa mugaeai ga inam, lalaede mambe ikeo pagid tibutibuda.”
56 Be Maria idio pan Elisabet irangrang ngan taiko tol, ga kus ta iluai mulian ele tuangai.
57 Idio ta Elisabet imata poponga aea inam boloma, ta ipopo gergeu aranga.
58 Aea tuanga ipu ga isobosobo tilongo mambe Maron ilolo isat kapei ngan ei, ta tinid igelgel toman ngan ei.
59 Be ngan ado lima ga tol aea, tinam ngan gergeu aea palunga ta tiuangga tidol itama ieda Sekaraia idae ngan ei.
60 Be itna ikeo, “Mao, be taoato ieda Ioanes.”
61 Ta tikeo pan bedane, “Eao sobom eta ieda toa bedana mao.”
62 Tota tiposa ngan baged ga ila pan itama ngansa tiuangga tiuatai, ei ikim ieda sai.
63 Ta ibeta ngan pat bodenga aea ta ibode posanga bedane, “Ei ieda Ioanes.” Ta panua toa ngada oa timatala.
64 Be mole mao, iaoa ikakai ta imae imalamalan ta iposaposa be isoa Deo ieda.
65 Panua toa tuangai oa timataud, be panua ngan tuanga ga tuanga bereoeai ngan tibur kapei Iudea tiposaposa ngan gid danga toa ngada ne.
66 Be panua toa ngada oa tilongo bedaoa, matad nanan posanga toa ne lolodeai ta tibetabeta pol ngan gid bedane, “Gergeu toa ne, muriai ga iuot eaba madongan?” Ngansa Maron idol ibage ga idae ngan ei.
67 Idio ta gergeu itama Sekaraia iuon ngan Itautau Tutui ta ibada Deo iaoa ta ikeo,
68 “Tasoa Maron ieda, ei Deo togita Israel, ngansa ei inama ngan luanga gita ele panua, ta ipola gita ta tatnan leda madonga paeamao.
69 Ei isula eaba ede iura kapei, ta iuot ngan iaoa kelede pan ele paeaeanga Devit. Ta eaba toa ne inama ngan badanga gita mulian.
70 Eine mambe ikeo pagid ele panua tututui toa tibabada iaoa mugaeai.
71 Isula eaba toa oa ngan badanga gita mulian pagid ada miri itamatama bagedeai ga pagid panua toa ngada oa lolod paeamao ngan gita.
72 Ikado bedaoa ngan pasolannga ele kadonga lolo isat aea pagid tibutibuda, ta labone imata nanan ele posanga tutui toa irau toman ngan gid mugaeai.
73 Eine ele posanga tautaunga toa ikado pan tibuda Abraam
74 ngan badanga gita mulian pagid ada miri itamatama bagedeai, ta tarangrang ngan tamataud mao, be takakado ele naurata
75 ga tapasolan mambe Deo ele ul ienono ngan gita ga tamamado tutui imatai somisomi ado ga ado.
76 “Be eao leg gergeu, gid ga tiuato eao eaba toa ibada Deo Gadae Tau iaoa, ngansa eao ga muga ngan Maron ta patutui edap ngan ei.
77 Eao ga paoatai ele panua ngan saoa danga ei iuangga ikado ngan samumnga led kadonga sasat ga saoa danga iuangga ikado ngan badanga gid mulian.
