40 To ilela ruumu ki Sakaria mi ikam aigule ambaiŋana pa Elisabet.
41 Indeeŋe Elisabet ileŋ Maria kalŋaana na, pikin imuzik lela kopoono mi Bubuŋana Potomŋana izeebe Elisabet.
42 To kalŋaana biibi ma iso: “O Maria, kampeŋana biibi ki Anutu ta isalakaalu ma lip pa moori ta boozomen. Mi kampeŋana kini ko imbotmbot se ki pikin tabe peebi na.
43 Nio pareiŋoŋ, ta Merere tio naana imar ma ilou yo?
44 Pa re. Indeeŋe ta aŋleŋ kalŋom na, pikin ta imbot kopoŋ leleene i, imuzik raama menmeeni.
45 Kampeŋana ki Merere ko ise ku. Pa nu urla kembei sua ta ni iso pu, inako iur ŋonoono.”
46 Tona Maria isu mi iso: “Merere, ni biibi ŋonoono ta ilip pa koroŋ ta boozomen. Tana nio leleŋ imap ipakuri. Nio menmeen yo pa Anutu. Pa ni ulaaŋa tio.
48 Pa nio mbesooŋo kini sorokŋoŋ tau. Tamen ni mataana iŋgal yo mi ipakur yo. Tana koozi mi ila na, tomtom boozomen ko tizzo pa kampeŋana ki Merere ta ise tio.
49 Pa ni mbura keskeezeŋana. Mi zaana na, potomŋana. Mi imbel uraata biibi kat pio.
50 Zin tomtom ta timototo i mi tileŋleŋ la kalŋaana na, muŋaiŋana kini imbotmbot se kizin, mi iseeŋge iseeŋge ma ila.
51 Ni iswe mburaana mi ikam uraata bibip. Pa zin tomtom ta tipakurkur zitun na, ni iyaŋgwiiri zin ma timbot leŋaleŋa.
52 Mi zin bibip ta tikamam peeze na, ni itatke zin pa murin peeze kana, mi tisu ma tiwe paŋaeŋae sorok. Tamen zin wal sorrokŋan ta tikototo zitun mi tipase pini na, ni ipakur zin.
53 Wal ta petel zin na, ni itunu ikam koroŋ ambaimbaiŋan boozomen pizin, mi tikan ma tirao. Mi zin ta len koroŋ boozo na, ni iser zin ma naman men mi tila len.
54 Muŋgu ikam sua mbukŋana pa tumbundu bizin ta kembei: Ni ko imuŋai Abaraam mi zin popoŋana kini, mi iseeŋge iseeŋge ma ila. Tanata mataana iŋgal zin mbesooŋo kini Israel, mi imuŋai zin mi iuulu zin.”
