14 Naž wnná Jesusen': —Neda' žapa' ḻe'e: beyéj benne' wechiẕjwn' liže', na' ba beyake' chawe' ḻaw Dios, kege ka benne' fariseon'. No benne' ẕka'n ẕen kwine', gon Dios ga yex̱jwe', san no benne' zoe' gax̱jw ḻaže', gon Dios ga gake' benne' zaka'.
15 Naž bžingak benne' byo ka' ḻen no'le ka' gan zoa Jesusen', zej noe'e x̱kwíde'do' ka' chégake' nich x̱oa na' Jesusen' ḻégakbe'. Kate' benne' wsedle ka' che Jesusen' bḻé'egeklen', bdíḻegake' ḻégake'.
16 Naž Jesusen' bḻiže' benne' ka' žónḻengake' Ḻe' tẕen, na' wnné': —Le we' x̱kwíde'do' ki latje yídgakbe' gan zoa', na' bi wséjwle x̱nézgakbe', dan' gata' latje chegak benne' ka' zej nake' ka x̱kwíde'do' ki gan ẕnna bia' Dios.
17 Da' li žapa' ḻe'e: no benne' bi si' ḻo ne'e da' ẕnna bia' Dios, kan žon to x̱kwíde'do', bi cho'o bennen' gan ẕnna bi'e.
18 To benne' wnná bia' wnnable' Jesusen', na' wnné': —Benne' wsedle dot chawe'. ¿Biẕe žaḻa' gona' nich gata' yeḻa' nban da' zejlí kanne chia'?
19 Jesusen' gože' ḻe': —¿Biẕ chen' ži'o neda': “Dot chawe'”? Bi zoa no benne' nake' dot chawe'. Toze Dios nake' dot chawe'.
20 Nnézkzelo' da' ka' bchi'le Dios ḻe'e: Bi gono' doḻa' da' ẕka'n ditjen yeḻa' ẕchag na'. Bi goto' benách ka'. Bi kwano'. Bi nnio' che lježo' da' wen ḻaže'. Wdape x̱a x̱no'o ba la'ne.
21 Bennen' gože' Jesusen', na' wnné': —Yógo'te da' ki žona' kate' wzó ḻaw naka' x̱kwide'.
22 Kate' benle Jesusen' da' ni, gože' ḻe': —Yetó da' žiažje gono'. Bete' yógo'te da' den chio', na' dan' si'o bneẕjwn chegak benách yache' ka', na' gata' yeḻa' wnni'a chio' ya'abá che Dios. Naž da, benḻen neda' tẕen.
23 Kate' benle bennen' da' ni, gok nyache' ḻaže'e, dan' deḻe'e yeḻa' wnni'a chie'.
24 Kate' bḻe'el Jesusen' kan gok bennen' nyache' ḻaže', wnné': —Zédeḻe'e gaken cho'ogak benne' ka' deḻe'e yeḻa' wnni'a chégake' gan ẕnna bia' Dios.
25 Gakže zede cho'o to benne' deḻe'e yeḻa' wnni'a chie' gan ẕnna bia' Dios, ka te to bia ẕbiagak benne' ka' to ḻo nag yeche'.
26 Naž benne' ka' béngekle' da' ni wnnágake': —¿Noẕkze benne' gak yelé', cha'?
27 Jesusen' gože' ḻégake': —Dios gak gone' da' bi gak gongak benne' ka'.
28 Naž Bedw gože' Jesusen': —Bwia nga, neto' bka'nto' yógo'te da' den cheto', na' žónḻento' Le' tẕen.
29 Naž Jesusen' gože' ḻégake': —Da' li žapa' ḻe'e, no benne' wka'ne' liže', o x̱a x̱ne'e, o biche' lježe' ka', o ẕo'le', o ẕi'ne' ka', dan' že' ḻaže'e nna bia' Dios gáte'teze,
30 si'že bennen' da' ka' ža ni zoažo na'a, na' ža da' za' gata' yeḻa' nban da' zejlí kanne chie'.
31 Jesusen' bchi'e benne' chežinno, benne' wsedle chie' ka', cheze, na' gože' ḻégake': —Le wia nga, zejžo ḻo yež Jerusalén, gan gak yógo'te da' nyejw ḻe'e yich la'y, da' wnnagak benne' ka' bcháḻjgake' ḻo wláz Dios, kan žaḻa' gak chia' neda', Benne' Golje' Benách.
32 Benne' Jerusalén ka' wdégake' neda' ḻo na'gak benne' zi'to' ka', na' gon dítjgekle' neda', na' wḻíž zí'gake' neda', na' wžé'egake' neda' ẕene'.
33 Chíngake' neda', na' te na' gótgake' neda', na' kate' gak chonne ža, yebana' ḻo yeḻa' got.
34 Bi wyejní'igekle benne' wsedle chie' ka' da' ni, na' bi wnnézgekle' bi da' ẕcháḻjḻene' ḻégake' chen, dan' naken da' bi na' gak chejní'igekle'.
35 Kate' za' žin Jesusen' ḻo yež Jerikó, zoa to benne' ḻo choḻe ga na'. Ži'e žoa'a nez, ẕnnable' no benne' bi da' wneẕjwe' chie'.
36 Bennen' benle' želdé benne' zan ga na', na' wnnabe' biẕen' žaken.
37 Benne' ka' góžgake' ḻe': —Jesús, benne' Nasaret, ẕdie' nga.
38 Naž benne' ḻo choḻen' wnníe' zižje, na' wnné': —Jesús, ẕa'só Dabí, beyache' ḻaže'l neda'.
39 Benne' ka' zjake' ḻaw Jesusen' bdíḻegake' benne' ḻo choḻen' nich kwi'e žize, san ḻe' wnníe' zížježe, na' wnné': —Ẕa'só Dabí, beyache' ḻaže'l neda'.
40 Naž wzé Jesusen' žize, ẕbeze', na' bseḻe'e to benne' chejḻiže' benne' ḻo choḻen' nich žine' ḻawe'. Kate' bžine' ḻawe', Jesusen' wnnable' ḻe',
41 na' wnné': —¿Biẕe žénelo' gona' chio'? Benne' ḻo choḻen' wnné': —Žénela' yeyaljw yej ḻawa'.
42 Jesusen' gože' ḻe': —Ba beyaljw yej ḻawo'. Ba beyako' dan' žejḻi'o chia'.
