Lukas 13:8-26 in Bola

⁸ “Lakea a vora i koli i ta maea, ‘Bakovi Dagi, ge pesi taro na pida ge taku. Ga kado haluia, ga mugo rikea a malala vakuloi vona.

⁹ Ge vua, bara i kamumu hateka! I uka ma ge vua, bara tolo vurokia.’”

¹⁰ Na Parava Nimalo e Isu i vara na roho na vaponga tara.

¹¹ A ngatavine tara vonga i ratapilea a hanitu na pida i ravulu a polona i polotolu, i keri ni laho kamumu. I poku a bitona, i keri ni pesi tavaga rike.

¹² Na tahuna e Isu i masia, i gale lokomugea vona, i takia, “Ngatavine, ngane i lobo a gilanga vomu.”

¹³ Muri i padoia. I malaviriri kunana i tavaga rike, i vakatubu ni kavurikea a Vure.

¹⁴ Pali a matakari na roho na vaponga i madihi a hatena, a vuhuna e Isu i koria a ngatavine na Parava Nimalo. Lakea i taki e huriki i ta maea, “A parava i polotara a parava na leho. Mu valai koea ni gi kori mua na gilanga na parava nga. Pali na Parava Nimalo mu made kunana.”

¹⁵ Lakea e Bakovi Dagi i koli i ta maea, “Mua o huriki a bakovi na taminga! Ra mua, na Parava Nimalo mu puga vuroki kilala a mota ni kolotata a bulmakau vona, muri mu vakaninu.

¹⁶ Ra ngatavine iea, ia a hamone Abraham. I ratapilea e Satan na pida i ravulu a polona i polotolu. Pali ge navai, i uka ma ni gi kori na Parava Nimalo?”

¹⁷ Na tahuna i taki loboa a ngava iea, e huriki a gimana ri rare. Pali e huriki lobo ri vivi vona a maka maki kamumu hateka e Isu i rata.

¹⁸ Muri e Isu i taki e huriki, “A hari­kianga na Vure i manga a ra? Ga toni virihi a ra maki vona?

¹⁹ I manga a vutuna a mastad i varoa a bakovi na hania vona. I koru rike dagi, i manga a kai. A maka kadirovo ri bebe valai, ri hae a nune ria na rahana.”

²⁰ Muri i nana tabu, “Ga toni virihi a ra maki tabu vona a harikianga na Vure?

²¹ I manga a is i bolea a ngatavine, i pulo turana kabukuna plaoa, muri i pugaga.”

²² E Isu i tabana ni laho sike o Ierusalem, i laho dili na maka tanga, i vara e huriki.

²³ A bakovi tara i nanea, “Go korimule e huriki a bakovi a ngatavine ala riva? Ri gi ala popote kunana?” E Isu i koli, i ta maea,

²⁴ “Mu toni a bulune mua ni dili vona a logo bala holoholo. A taki muholi mua, i kupo e huriki ri gi toni ni dili, pali bara ri keri.

²⁵ Na tahuna a tahona roho i pesi rike, i tukaria a logo, bara mu pesi rare polovavo mu gale gale, bara mu ta maea, ‘Bakovi Dagi, mi gi dili.’ “Pali ia bara i koli i ta maea, ‘Iau i uka ma lohoka ne mua, mua a viri vai?’

²⁶ “Muri bara mu ta maea, ‘Hosi o vara na mada na tanga ne mia, mi kani, mi ninu turamu.’