21 Muri a Hanu Kiripiripi i ratea e Isu i vivi, lakea i ta maea, “O Tata, ioe a Bakovi Dagi na hunu a malala. A kavurike ioe, a vuhuna o vakasiri a nitamu ne huriki a bakovi tavula, pali o ruhuloloa ne huriki ri luhoi ta ri lohoka hateka. I muholi, o Tata, o muri mai a ningaru vomu o rata mavonga.”
22 Muri e Isu i ta maea, “E Tata i ru na limagu a maki lobo. I uka tara viri ge lohoka vona e Tuna. E Tata kunana i lohoka vona. E Tata tara i uka tara viri ge lohoka vona. E Tuna kunana i lohoka vona. Na tahuna e Tuna bara i vulaki e huriki ranga, ria ranga bara ri lohoka ne Tata.”
23 Muri, e Isu kunana i made turana e huriki a murimuri, lakea i taki ria, i ta maea, “I kamumu hateka mu matai a maka maki nga. Mu vivi,
24 a vuhuna e huriki a propet a hariki hosi ri ngaru hateka ni matai a maki mu matai ngane, pali i uka ma ri matai. Ri ngaru ni longo a maki mu longo ngane, pali i uka ma ri longo.”
25 Na parava tara a mari na vinara tara i pesi rike, i tonia e Isu, i nana maea, “Mari ni tovo, a ra maki ga ratea ga bole a nimahuri vakaroro?”
26 Pali e Isu i koli i nana tabua, “Ra ngava ni here puru na vinara, i ta navai?”
27 A mari na vinara i koli i ta maea, “A vinara i maea, ‘O ngarua e Bakovi Dagi a Vure vomu. O ngarua na hatemu lobo, na hanumu lobo, na nitora vomu lobo, na niluhoi vomu lobo. O ngarua e turamu i manga a hini o ngaru mule ioe.’”
28 E Isu i koli i ta maea, “O koli kamumu hateka. O rata mavonga bara o bole a nimahuri vakaroro.”
