LUK 23:38-49 in Pohnpeian

³⁸A pil intin eu, me intinidier ponanen i ni lokaia en Krik, o Latain, o Ipru: Iet Nanmarki en Juj akan.

³⁹A amen ren lolap oko, me lanadar, lalaue i indada: Kaidin koe Krijtuj Kapiti jan pein uk o kit!

⁴⁰Me teio ap japen, kapun on i indada: Koe pil jota majak Kot ni om ian kadeik wet?

⁴¹Pwe ata kalokolok me pun, pwe iduen ata wiawia kan, a ol men et jota wiadar meakot me jued.

⁴²Ap potoan on Iejuj: Main, re kotin kupura ia, lao re kotida nan wei ar.

⁴³Iejuj ap kotin majani on i: Melel I indai on uk, ran wet koe pan ian ia mi nan paradij.

⁴⁴Ni auer kawonu ap rotorotala nan jap karoj lao lel auer kaduau,

⁴⁵O katipin rotorotala, o likau en pera en im en kaudok o dei pajan jan poa lel pa.

⁴⁶Iejuj ap kotin kapitie laudeda majani: Jam (ai), i mueidalan nen i nan lim omui kan. A lao kotin majanier met, ap kotin poular.

⁴⁷A jaumaj en jaunpei o, ni a kilaner me wiauier, ap kapikapina Kot indada: Melel, aramaj men et me pun.

⁴⁸O aramaj karoj me pokon penaer pwen ian kilan, lao kilaner me wiauier, ap pikir maramar arail o pure pajan.

⁴⁹A kompokepa kan karoj o li akan, me idauendo i jan Kaliläa, u kailawei, kilekilan mepukat.

³⁸A pil inting eu, me intingidier ponangen i ni lokaia en Krik, o Latain, o Ipru: Iet Nanmarki en Sus akan.

³⁹A amen ren lolap oko, me langadar, lalaue i indada: Kaidin koe Kristus Kapiti sang pein uk o kit!

⁴⁰Me teio ap sapeng, kapung ong i indada: Koe pil sota masak Kot ni om iang kadeik wet?

⁴¹Pwe ata kalokolok me pung, pwe iduen ata wiawia kan, a ol men et sota wiadar meakot me sued.

⁴²Ap potoan ong Iesus: Maing, re kotin kupura ia, lao re kotida nan wei ar.

⁴³Iesus ap kotin masani ong i: Melel I indai ong uk, ran wet koe pan iang ia mi nan paradis.

⁴⁴Ni auer kawonu ap rotorotala nan sap karos lao lel auer kaduau,

⁴⁵O katipin rotorotala, o likau en pera en im en kaudok o dei pasang sang poa lel pa.

⁴⁶Iesus ap kotin kapitie laudeda masani: Sam (ai), i mueidalang ngen i nan lim omui kan. A lao kotin masanier met, ap kotin poular.

⁴⁷A saumas en saunpei o, ni a kilanger me wiauier, ap kapikapinga Kot indada: Melel, aramas men et me pung.

⁴⁸O aramas karos me pokon penaer pwen iang kilang, lao kilanger me wiauier, ap pikir maramar arail o pure pasang.

⁴⁹A kompokepa kan karos o li akan, me idauendo i sang Kaliläa, u kailawei, kilekilang mepukat.

³⁸Pohnangin kadokenmaien Sises nin lohpwuwo mahsen pwukat ntingdier ie: “Iei met Nanmwarkien mehn Suhs akan.”

³⁹Emen loallap suwed ko me iang kalohpwuwala ahpw lahlahwe Sises, ndinda, “Ma komwi Mesaiao, a komw kepitkomwihla oh pil kiht!”

⁴⁰A meteio ahpw kapwungohng, nda, “Ke sohte masak Koht? Kita koaros mihmi nan soangen kadeikteieu.

⁴¹Ahpw ata kadeik me pwung, pwe kita konehng ale kalokolok wet, pwehki ata wiewia kan me kahrehda; a ohl menet sohte suwed ehu e ketin wiahda.”

⁴²Ih eri patohwanohng Sises, “Maing Sises, komw ketin kupwure ie, ni omwi pahn ket nan sapwellimomwi wehi duwen nanmwarki men!”

⁴³A Sises ketin mahsanihong, “I men ke en ese pwe rahnwette ke pahn iang ie mi nan Paradais.”

⁴⁴Kolahng nin souwas limwahn kulok eisek riau, ketipin ahpw rotala oh rotorot kipehdi wasa koaros nan sahpwo lel kulok siluh mwurin souwas.

⁴⁵Oh kahdeng me pereh mwoahl sarawien nan Tehnpas Sarawio teipeseng nanwerenge sang powe lel pah.

⁴⁶Sises ahpw ketin kapitie laudida, mahsanih, “Semei, I mweidalahr ngeniet nin limomwi kan!” Ni eh mahsanih met, e ahpw ketin kadarala ngene.

⁴⁷Kaunen sounpei men lao kilangada me wiawiero, e ahpw kapinga Koht, patopatohwan, “Mehlelete me ohl menet ohl pwung men!”

⁴⁸Aramas koaros me pokonpene wasao pwe re en iang udiahl, re ahpw pikipikir nan mwaremwararail kan pwurala ni imwarail ko, uwen ar nsensuwed.

⁴⁹Oh kompoakepahn Sises koaros, iangahki lih ako me idawehndo sang Kalili, re pil iang kesihnen wasao, ahpw ekis dohsang, uduhdiahl mepwukat koaros.