14 Paana tatao mo isi tausani haligigi. Ena heaheatayao i heribadi, i ene, “Au hebawabigabigaesegaidi, hari poru, hari poru, tatao‐labui‐se‐mate‐saudoudoi.”
15 Ena riba se abiwatai nei doha, gamagaridi se hebawabigabigadi.
16 Ia abo falawa haligigi, eo eama labui i abidi, i itasae galewa eai, i lautoi, abo i ihi, i mosei ena heaheatayao aridi eai, abo se toredi moutuadi wa matadi eai.
17 Isi se aiai, e bogadi se sese: aitoredi se tanogogoidi bosa saudoudoi‐labui.
18 Na, ia mo sora ma uurana, ena heaheata maenayao: i hesiolau aridi eai, i ene, “Tatao si ene eau ede eai, wa?”
19 Isi ia arinna se heuio, si ene, “Ioane Bapatiso; headi si ene, Elia; headi hinage si ene, mumuga perovetadi esau i torouioma.”
20 I ribalau aridi eai, i ene, “Na, omi au ene eau ede eai wa?” Petero ia arinana i heuio, i ene, “Eaubada ena Keriso.”
21 Awadi i tawaidi, i lauhesomdi, tabu tau esau wau riba wa se heriba.
22 I ene, “Tau Natuna amamna gamagamagari abo i hearodi, eo babadadi, eo kohena lailaidi, eo tauuriuri ia abo se laupalihibaei, abo se unuhemate, asubena hehaionana eai abo se hetorouioi.”
23 Ia abo i ribalau gamagaridi aridi eai, i ene, “Tau esau ena gadosisi bena i hemuriwataigu, taba iabom i nuagabaeuioi, asubena gamagamagari ena satauro i abiisini, eo i hemuriwataigu.
24 Na tau esau, eo esau, ia maurina i nuatuuioi ia mauri abo ie dabu: tau esau eo esau ia maurina i nuagabaei eau debagu eai, ia mauri abo i abi.
25 Saha lolona abo tau i abi, taba gogo gamagamagari tanoubu eai ta i abiheohidi, ia maurina abo i gabaei?
26 Tau esau, eo esau, i taumaeamaeaegu, eo egu riba i taumaeamaeaedi, tau Natuna ia abo hinage i taumaeamaeaei, ena huia laoma ma namanamarina, eo Tamana namanamarina, eo aneru hetahetabudi namanamaridi hinage.
27 Riba mamohoina ede ea heribamiu ta, headi inai se totoro mate sora nige se hearo, Eaubada ena basileia abo se itabagunaei.”
28 Teina riba ta i ribaedi wa i lau e asubena haligigi‐haiona se ohi, Petero, eo Ioane, eo Iamesi i woeaidi, i dalasae oea tupina eai, bena i lau‐uura.
29 Ma uurana, ana ao ie ori, eo ana lulu se posiposi, eo se balebalelem.
30 Na ia maenayao tatao labui se ribariba, isi ede Mose eo Elia:
31 isi se taumasaraha ma namanamarina, ia matena se ribaribaei, ia Ierusalema eai abo i hearo.
32 Na Petero, ma ana sasaguyao, matadi se enoeno: isi se siliata ena namanamari se ita, eo taudi labui wa maenayao se totoro, edi namanamari hinage se ita.
33 Taudi labui wa Iesu bena se laugabaei. Petero i ribalau Iesu arinai, i ene, “Tanuagagu e, i lolo inai mo ta mia: apa haiona ta abidi: esau enam, eo esau Mose enana, eo esau Elia enana:” na i ribariba gaibu.
34 Ma ribaribana eada esau i laoma i poitawaidi: isi se lulau eada wa boeana eai se matausi.
35 Na arina esau eada boeana eai i laoma, i ene, “Natuyogoyogoigu ede teina: ia au ataiei.”
36 Arina wa i lautom, Iesu se ita iabom ie mia. Isi se monomonouei, nei asubenadi eai ne ginauri se itadi wa nige tau esau se heriba.
37 Maraietom, oea tupina eai wa se letamao, tatao gamagaridi ia se laubagibagiei.
38 Tau esau, boeadi eai, i eogalau, i ene, “Tanuagagu e, ea awanorim ta, u italau natugu tau arinai, paana natueseesegagu mo.
39 Earua gama wa i toai, eo ma esega i eabayaba; eo tauna i abigogoi awana i gosagosapuro, eo i heamamna, i abigabaei, abo hinage i laubodauio.
40 Em heaheatayao ea awanoridi bena se aiduiei; isi nige abina se ata.”
41 Iesu ia arinana i heuio, i ene, “Omi isi ta nige emi sunuma, eo ma awaeagaramiu, huia lohaloha eau maemiu, eo ea taubigaimiu wa? Hage natum wa u woeaima.”
42 Ia i laoma, ma launa, na demoni gama wa i helubiei, eo i abigogoi, Iesu earua biibiina wa i ribamataei, gama wa abo i hemauri, ia abo i moseuio tamana arinai.
43 Isi gamagaridi Eaubada ena gigibori lailai se noonooei. Ginauri gamagamagari Iesu i ginauridi wa, isi gamagaridi ma noonoodi, ie ribalau ena heaheata aridi eai, i ene,
44 “Teina ribadi ta taba se ludobi beamiu gudadi eai: paana Tau Natuna abo se moselaei tatao nimadi eai.”
45 Ena riba wa nige se nuatui, riba wa se ribayamui arinai nige se ita: riba wa hinage bena se oimuriei se matausi.
