22 Iesu arinadi i heuioidi, i ene, “Taiede au lau, ginauri au itadi eo au ataiedi Ioane au heriba, ia ede taumatagibugibu matadi se lala, taulaulaudae se lautoditodi, lepera se uruosi, taubeadoodoo se ataiei, taumatemate se toro, tatao gogogesagesa aridi eai evanelia se lauguguiaei.
23 Taba tau esa eo esa nige i nuabaaea arigu eai, nuana abo i woiwoina.”
24 Ioane ena riba taulaena se lauo, abo Iesu Ioane ribana tatao aridi eai i ribahetubu, i ene, “Aue lau barabara eai wa saha bena au ita? Didiari mana i iuhiheeoeo wa?
25 Aue lau nei eai saha bena au ita? Tau esau ana lulu bigabigana ie lui? Isi lulu paspasadi tauluidi, eo aiai lolodi tauaidi se bawa wasawasa edi numa eai.
26 Aue lau nei eai saha bena au ita? Peroveta wa? E, ea heribamiu ta, ea ’ne, ia peroveta gamagamagari i saetawatawaidi.
27 Ia ede ia, se uriyao, si ene, ‘Egu tauwasa ea hetamarimugaiem, em eda abo i sepanonohai.’
28 Ea heribamiu ta, ea ’ne, tatao sisine se labasidi wa aridi eai Ioane Bapatiso mo peroveta saesaena; taiede Eaubada ena basileia eai tau gagiri aririna ia Ioane i saetawatawai.”
29 Tatao gamagaridi ia se ataiei, eo takisi tautano tataodi hinage, Eaubada se awamamohoiei, paana isi Ioane ena bapatiso eai se hebapatisoidi wa.
30 Parisea tataodi eo laugagaeo tauheatana tataodi isi nuaboeadi eai Eaubada ena riba se tauotaotaei, paana Ioane ena bapatiso nige se abi.
31 I ene, “Teina isi ta tataodi saha arinai ta heaheasoniedi? Isi doha abo aisana mo?
32 Isi doha ede merumeru se bawagogo abauneune eai, se haihaieogaidi, si ene, ‘Huelele aie iuhiawa arimiu eai na nige aue saga: aie dou nuanuadubuemiu, na nige au doudou.’
33 Na Ioane Bapatiso i laoma aiai nige i aidi eo waina nige ie nom: omi au ene, ‘Diabolo esau ia boeana eai.’
34 Tau Natuna i laoma aiai i aidi, eo waina ie nom, omi au ene, ‘Tauaiaisom, eo waina taunomnomsom, takisi tataodi eo tatao baabaaeadi edi heriam!’
35 Sonoga nanatunayao gamagaridi aridi eai, sonoga wa abo se hemamohoiei.”
36 Parisea tauna esau i henua bena Iesu maena se aiaiesega. Ia i awasae Parisea tauna ena numa eai, i bawabigabiga se aiai.
37 Eanua sinena esau, sine baaeana, wasana i ataiei Iesu Parisea tauna ena numa eai i bawabigabiga i aiai, nado, alabata ilena eai, ie abi leama.
38 Ia murina eai aena eai i totoro i doudou, ia aena matasulu eai i deuridi, eo uru maiawadi eai i saudi, ia aena i alagoiedi, eo nado wa arinai i heeausidi.
39 Parisea tauna, Iesu i eogai wa, wau wa ie ita, nuaboeana eai i nuatui, i ene. “Tau ta ena ia peroveta, sine ta i abilau ia arinai abo i nuatulobaiyao: paana ia sine baaeana.”
40 Iesu i heuio ia arinai, i ene, “Simona e, egu riba begana bena ea heribam.” Ia i ene, “Tanuagagu e, u riba.”
41 “Tatao labui tau esau ena gogo se abidi sora nige se hemaisadi: esau ana haga denari handere haligigi, esau denari tatao‐labui‐si‐mate‐saudoudoi.
42 Isi nige edi moni, ia taudi labui adi hagahaga i soegabaedi. U ene edoha, aitea tau wa ia abo i gadosisiaririei?”
43 Simona ia arinana i heuio, i ene, “Nuana ia wa ana haga ie lai wa, na i soegabaei.” I ribalau ia arinai, i ene, “U nuatui i dudurai.”
44 Ia abo i sinibui sine wa arinai, eo i ribalau Simona arinai, i ene, “Sine ta u ita? Ea awasaema em numa eai, goila nige u oiyama aegu ana deudeuri: na ia mo matasulu eai aegu i deuridi, eo uru maiawadi eai i saudi.
