2 Mafalisayo baingi ngabaalaluya, “Mboni mupanga makowe gagakanilwa na Salya Lisu'ba lya Sabato ya Ayahudi?”
3 Yesu ngaayangwa, “Munasomali mwaapangite Daudi na aine pabaabile na njala?
4 Ywembe aayingi mu Nyumba ya Nnu'ngu', no tola galu' makati gagabi'kilwe nnu'ngi' ya Nnu'ngu', lya na kwapeya aine. Yatekanilwa mundu lya makati galu' ila api'ndo ba dini bai.”
5 Apo ngaabakia, “Mwana wa Mundu nga Bwana wa Sabato.”
6 Lisu'ba li'ngi' lya Sabato ya Ayahudi, Yesu aayingi munyumba ya kunnu'ba Nnu'ngu' no yi'gana. Mu'lu', mwaabile na mundu ywaalemile luboko lwa mmalyo.
7 Balimu ba Salya na Mafalisayo bapalage kitumbu sakunsitakya Yesu, kwa nyo baatikumpekeseni bannole mana alu'a kuntepwa mundu Lisu'ba lya Sabato ya Ayahudi.
8 Lakini Yesu aatangite mwabaganiage, ngammakia yu'lu' mwene luboko lutomboloka, “Kakatuka uyi'me pakatikati yabe.” Ngayenda no yi'ma.
9 Yesu ngaabakia, “Ninnaluya mwenga, lisu'ba lya Sabato ya Ayahudi, nantali panga makowe manogau au ganannyata, tepwa au bulaga?”
10 Paaloi boti bababile palu' ngammakia yu'lu' mundu, “Goloya luboko lwako.” Naywembe papangite nnyo, luboko lwake lwapangite lukoti kai'.
11 Lakini bembe baatiusika muno ngabalaluyana, lyakau lyaku' lyakumpangya Yesu.
12 Lisu'ba limo Yesu aayi'i lu'ba Nnu'ngu' kukitu'mbi', aakelike sekesekembe.
13 Pamalau' ngaakema banamasi' bake, na nkati yabe ngabawa bandu ku'mi na abi'li' abo ngaakema atumilwe,
14 Simoni (ywaatinilwe na Yesu lina lya Petili) na Andelea nnunawe, Yakobi na Yoani, Pilipi na Batolomayo,
15 Matei, Tomasi, Yakobi wa Alupwayo na Simoni wa Selote,
16 Yuda ywa Yakobi na Yuda Isikalioti ywabile nsongi.
17 Yesu aalongwaniye na banamasi' bake kaelya bu'ka kukitu'mbi', aayi'mi pandu pankanya. Apo pai na lipi'nga liku'lu' lya banamasi' bake na bandu baingi bababu'i lwingo lwoti lwa Yudea, Yelusalemu, kumbwani ya Tilo na Sidoni. Boti baisi kumpi'kania Yesu no tepulwa matamwe gabe.
18 Aatepwi boti, kai' aatepwi na babaauyilwage na moka.
19 Bandu boti bapalage bankunywe, kwa mwanjaa nkati yake gapitage makakala ga kwatepwa boti.
20 Yesu ngaagalambukya banamasi' bake ngabaya, “Nantali mwenga mwamile mwaki'ba, kwa mwanjaa Ukulungwa wa Nnu'ngu' winu.
21 Nantali mwenga mwamuminya njala nambi'yambi' kwa mwanjaa mwalu'a yukuta. Nantali mwenga mwamuli'la nambi'yambi' kwa mwanjaa mwalu'a eka.
22 “Nantali mwenga mwamusukilwa na bandu, mwamubaulwa, mwamui'mbu'lwa, no linyatia lina linu kwa mwanjaa ya Mwana wa Mundu.
23 Pagaapita ago goti mwaanapusike no u'mbau'mba, kwa mwanjaa upo yinu ngu'lu' ibile kunani. Kwa mwanjaa api'ndo babe baapangile alondoli ba Nnu'ngu' nyinyonyo.
24 Lakini mwakibona mwenga mwamatayili kwa mwanjaa mupatike upo yinu.
25 Mwakibona mwenga mwamuyukuta nambi'yambi' kwa mwanjaa mwalu'a minya njala palu'ngi'. Mwakibona mwenga mwamweka kwo napusika nambi'yambi' kwa mwanjaa mwalu'a li'la no lombola.
26 Mwakibona mwenga mwamulumbilwa na bandu boti kwa mwanjaa api'ndo babe baapangi alondoli ba ubu'su' nyinyonyo.”
27 “Lakini nimmakianga mwenga mwamunipi'kania, mwapende andumu binu, na mwapangi manogau babansukwanga.
28 Mwalu'bi makowe manogau balu' babannosa na mwalu'bi balu' babampangya ulau.
29 Mundu mana akuku'mbwi ligomo limo ung'alambukiye na linebi'li'. Mundu mana akupokonywi likoti lyako unneki na kiyampani sako.
30 Ywoywoti ywakulu'ba wampei na mundu mana akupokonywi kili'be sako kaneunnonge kuki'li'bu'ki'ya.
31 Mwamupala bandu bampangi mwenga, na bembe mwapangi nyinyonyo.
32 “Mana mwaalu'a kwapenda babampendile mwenga mwalu'a pata upo yaku'? Ntu'pu' kwa mwanjaa ata bene sambi baapenda babaapendile.
