1 Sabata hombaŋ mocko Jesu â motecfâc‐ticne jaŋe padi gie ŋondeŋko rambiŋ. Rahuc motec jaŋe fârine moc moc bâtâcnerâ mezi ʒâmurâ nâmbiŋ.
2 Iŋuc epie farisaio jaŋe honerâ mumbiŋ: “Ŋoŋe wemocte sabata hombaŋko wiac mi eene eŋgopieŋ?”
3 Mupie Jesuzi ʒiŋuc jazawec: “Dawidi â ŋicfâcne nânâre hâmohuc wiac embiŋ, i ŋoŋe wose manac mi eeŋgopieŋ me?
4 Dawidi e Anuture ufuŋko ferâ poroŋ Anuture biŋe râekicne i rorâ nâhuc ŋicfâcne jareme mâmâc nâmbiŋ. Poroŋ i ŋic omane bâtâc bajarekicne, bâzi ririke ŋic micbuc‐jeŋic. Eme i sifu nâmbiŋ.”
5 Iŋuc murâ muwec: “Ŋic Fâri Wâtuŋne e sabata hombaŋ irec rune jukac wâc.”
6 Eme sabata hombaŋ mocko mitificko ferâ miti jaza qazuc ewec. Ehame ira ŋic moc ŋewec, e me fârene ɋaŋakicne.
7 Eme miti qaqazu â farisaio jaŋe hombaŋko ŋic bâpiaŋkeme honerâ dâŋko râeniŋte ruc bahuc ŋembiŋ.
8 Eme Jesuzi maŋjeŋicko hone tararâ ŋic mene ɋaŋakicne e ʒiŋuc âzâcnewec: “Go fahare mai domac.” Mume fahare domawec.
9 Ehame Jesuzi ʒiŋuc jazawec: “No wio‐ŋarepe muniŋ: Sabata hombaŋko wiac biaŋne me wiac sâqocne ezo, ŋic bâpiaŋ‐jopazo me sipiric‐jopazo?”
10 Iŋuc murâ risic forisic honec‐joparâ ŋic ʒiŋuc âzâcnewec: “Mege fâretiŋnec.” Eme ŋic e iŋuc eme meticne sanaŋkewec.
11 Eme jaŋe i hone manac erâ aariczi maŋjeŋic fusucmame Jesu iŋuc me iŋuc ecneniŋte muc manac embiŋ.
12 Dameŋ ira Jesuzi tikio numuocte fewec. Ferâ ŋafe ʒora Anutu numucnehec juhame hae furewec.
13 Hae fureme kikefuŋfâc‐ticne hefârec‐joparâ jaŋeraonec 12 bâwosâec‐joparâ motec bacjopawec, ehuc ʒâŋe sâko‐jeŋic aposolo muwec.
14 Ʒâŋe buchuc‐jeŋic ine ʒiŋuc: Simoŋ, ʒâŋe‐ticne moc Petoro â ɋaticne Anderea, erâ Jakobo â Johane, erâ Filipo â Batolomaio,
15 erâ Mataio â Toma, erâ Jakobo Alifaiore ŋokâ â Simoŋ Ʒelote,
16 erâ Juda Jakobore ŋokâ â Juda Karioto haeonec, e juku Jesu doc bawec.
17 Eme rocjopame tikionec waharâ wâneŋko fisirâ juhapie kikefuŋfâc‐ticne bocjaha â ŋic guru sâko erao tumaŋnembiŋ. Jaŋe Judaia mâreŋkonec â Jerusalem haeonec â Tiro Sidoŋ hâwec moŋgeŋkonec fisipie miti jazawec â huchec ɋiɋicne bacjopawec.
18 Erâ demoŋzi areŋ ejarewec jaŋe wâc bâpiaŋ‐jopawec.
19 Eme bâuapie tâpiri‐ticne jaŋerao fotâcneme ɋiɋic qambiŋte bâuaniŋte kime iriac mâretec ecnembiŋ.
20 Eme Jesuzi motecfâc‐ticne jaŋerao ʒâŋe fihuc ʒiŋuc muwec: “Hapetac jueŋgopieŋ ŋoŋere manape ʒerine ekac, ŋoŋe hâcne Anuture uucmaŋ biŋe qaŋarekicne.
21 Dameŋ ʒiŋuczia nâ hâmoc ehuc jueŋgopieŋ ŋoŋere manape ʒerine ekac, ŋoŋe hâcne juku nâ gapec enʒoŋgopieŋ. Dameŋ ʒi ki busâqoc ehuc jueŋgopieŋ ŋoŋere manape ʒerine ekac, ŋoŋe hâcne juku bubiaŋ bâfuanʒoŋgopieŋ.
22 Ŋic jaŋe Ŋic Fâri Wâtuŋne ere erâ qaisoc‐ŋopârâ jâpe bâsuec eŋarerâ musâqorec‐ŋoparâ ʒâŋe‐ŋeŋic musoriŋkeniŋmu, ŋoŋe manariŋ‐ŋopakopac.
23 Wiac iŋucne fuame dameŋ ira ʒeri bari enʒepieŋ. Manaŋgopieŋ, sambâŋko furine afecne mi foŋarekac. Mimiŋnefâc‐jeŋic jaŋe porofete sâc ijaha ejare jumbieŋ.
24 “Moneŋ mafa sâkohec, jei, ŋoŋe juku wemo wiaczi bâmiriŋ‐ŋopazokac?
25 Dameŋ ʒiŋuczia nânâ qowi mâririhec jueŋgopieŋ, jei, ŋoŋe juku nânâ basanʒoŋgopieŋ. Dameŋ ʒiŋuczia gâgâwi faio jueŋgopieŋ, jei, ŋoŋe juku ki busâqoc bâfuanʒoŋgopieŋ.
26 Muteŋ bâteŋ eŋareeŋgopieŋ, jei, ŋoŋe juku weniŋuc enʒoŋgopieŋ? Mimiŋnefâc‐jeŋic jaŋe porofete burecne iŋuc jaha muteŋ bâteŋ ejare jumbieŋ.
27 “Dâŋnane manahuc juŋgopieŋ ŋoŋe ŋazape: Ŋoŋe râsifâc‐ŋeŋic âgo jauŋ ejarenʒepieŋ, qaisoc‐ŋopaeŋgopieŋ jaŋe jauŋ bacjopanʒepieŋ,
28 sâwec‐ŋopaeŋgopieŋ jaŋe jambuŋ‐jopanʒepieŋ, musâqorec‐ŋopaeŋgopieŋ jaŋere erâ numunʒepieŋ.
29 Moczi maucge ŋicfecne qame ŋifecne wâc sicnecnezemec â moczi ŋaqige faine gowac rome e maŋne mâmâc qikiŋnecnezemec.
30 Â moczi wiac mocte numu‐gareme râcnezemec â moczi wiac moc gowac rome bârisie‐gareocte mi fotariezemec.
31 Ŋoŋe ŋic jaŋe wiac eŋareniŋte manasueŋgopieŋ, sâc ijaha wâc jaŋe ejarenʒepieŋ.
32 Ŋoŋe maŋjauŋ eŋareeŋgopieŋ jaŋe sawa maŋjauŋ ejareniŋmu, ine wemocko tofane fome juku bazu‐ŋarezo? Miti tâmiriczi âgofâc‐jeŋic maŋjauŋ ejareeŋgopieŋ wâc.
33 Â âgo eŋareeŋgopieŋ jaŋe sawa âgo ejareniŋmu, ine wemocko tofane fome juku bazu‐ŋarezo? I miti tâmiriczi eeŋgopieŋ wâc.
34 Okacne bârisie‐ŋareniŋmu jaŋe sawa wiac ejarepie wemocko tofane fome juku bazu‐ŋarezo? Miti tâmiriczi âgofâc‐jeŋic ʒiŋuc muhuc wiac ejareeŋgopieŋ wâc: Juku sâc ijaha bârisie‐nârenʒepieŋ.
35 “Aricne, iŋuc mi ezo, ŋoŋe râsifâc‐ŋeŋic âgo jauŋ ejarenʒepieŋ. Okacne mi mecne bazu‐ŋareniŋmu jaŋe sifu ehâmo‐jarehuc wiac qikiŋne‐jarenʒepieŋ. Iŋuc erâ juku furine ŋemâcne ronʒoŋgopieŋ, erâ femicne sâko ere naru motecfâc erâ juniŋmu. Eki hâcne ŋic qâomane â râŋgeŋne jaŋe sifu bâmec bajareekac.
36 Mamac‐ŋeŋiczi buuruc juekacte ŋoŋe iŋuc jaha buuruc junʒepieŋ.
37 Ŋoŋe ŋic okacne dâŋ mi mutara‐jarenʒepieŋ, eme Anutuzi ŋoŋe iŋuc jaha okacne dâŋ mi mutara‐ŋareocmu. Ŋoŋe ŋic kiŋko mi râec‐jopanʒepieŋ, eme Anutuzi ŋoŋe iŋuc jaha kiŋko mi râec‐ŋopaocmu. Ŋoŋe tofa‐ŋeŋic ŋic qikiŋne‐jarepie Anutuzi tofa‐ticne ŋoŋe iŋuc jaha qikiŋne‐ŋareocmu.
38 Ŋoŋe ŋic bâmec bajarepie Anutuzi ŋoŋe iŋuc jaha bâmec baŋareocmu. Ehuc irec sâc jâuruhuc siric‐ŋoparâ baʒihuc guru fufusuc heŋareocmu. Ŋoŋe sâc bajuhuc ŋic wiac ejareniŋmu, sâc ijaha Anutuzi bajuhuc ŋoŋe eŋareocmu.”
39 Iŋuc murâ dâŋ suŋsuŋne moc ʒiŋuc ʒuhuckerâ jazawec: “Tiŋtuŋ jajaheczi jojowac erâ mi qâsorierâ mâmâc jaha hârâcko hunicmu me?
40 Moteczi qaqazu‐ticne sisiricke i mi fokac, motec e wiac mana‐hâmorâ qaqazu‐ticnere sâc eme taraocmu.
41 Go wemocte âgogere ʒâŋeo gâc i honehuc go gahacne ʒâŋeo jâcdâkâ fokac ine mi hone tarakomec?
42 Jâcdâkâ go gahacne ʒâŋeo foipiehame go weniŋuc âgoge ʒiŋuc âzâcnetec sâckeocmu: ‘Âgo, manahaŋ, ʒâŋegao gâc fokac rogarepe.’ Burecŋic, gahacne ʒâŋeo jâcdâkâ fokac i qanaŋ rorâ ie âgogere ʒâŋeo gâc rotec sâckeocmu.
43 “Jâc biaŋnao wemocko fârine sâqocne fuaocmu, me jâc sâqocnao wemocko fârine biaŋne fuaocmu?
44 Jâcte fuŋne fârinezi bataniŋkeekac. Safeo suc fârine fuame rozo me? Me ʒaqeŋko saŋ fârine fuame rozo me?
45 Ŋic biaŋnezi maŋrowaŋ‐ticne biaŋnaonec wiac biaŋne utuocmu, ŋic sâqocnezi maŋrowaŋ‐ticne sâqocnaonec wiac sâqocne utuocmu. Maŋko wiac fusucmarâ foekac, ijaha micko wefuekac.
46 “Wemocte mâc micbipiczi Wofuŋ‐nâŋec, Wofuŋ‐nâŋec i sawa munarehuc dâŋ ŋazaekopac i mi reŋkeeŋgopieŋ?
