4 Evi ndi kamba vyavyandikiwe nkitabu ca nabii Izaya javi: “Munu mmojawapo kawankukuwa nlanga, kankwamba: ‘Tengezani njira mumpokerere Mwenye Nvushi, olosani barabara yake.
5 Mirati piya ikwijala, myango na makinga piya vyandaziwe, mwa kupombonyoka molosiwe, muri mawe mubambadiwe.
6 Na wanu piya wakuja kuwona kuvusha ka Mwenyezimungu.’ ”
7 Wanu wákuka kwake wakóziwe, Yahaya akiwambira javi: “Kabila ya mirába sumwe! Nani akukumbuseni kutira hukumu ya Mwenyezimungu suku zambere?
8 Lavyani visumo vyema vyakolóta kutubiya kwenu. Wala musambe mmyoyo yenu: ‘Tiwa nawo wawa yetu, ndi Iburahima.’ Kamana nukwambirani kuwa anta na eya mawe‑ya, Mwenyezimungu akidiri kutadula kuwa ujukulu wa nabii Iburahima!
9 Epa sambi‑pa, soka riwa panzipe wa muti, tayari kutupula. Kwa javyo, kila muti saupa visumo vyema usinjiwa, ukwefiwa pamoto.”
10 Wanu ware wakindairi, wakamba: “Sambi, catijuzi kutenda kinani?”
11 Yahaya akiwajibu, akisema javi: “Ári na zubãu mbiri alavye mmoja, ampe mwenziwe saana. Ári nawo cakurya, kwa namuna moja, alavye ammere mwenziwe.”
12 Na waja novyo warípisi nsoko wamojawapo kusakula koziwa. Ewo wakindairi Yahaya: “Mwanlimu, ofwe tijuzi titende kinani?”
13 Iye akiwajibu: “Musiripise kinu tena kupundisa vyamwamuriwe.”
14 Masurudadu newo novyo wakindairi javi: “Sambi ofwe, tíjuzi titende kinani?” Yahaya akiwajibu, akamba: “Musinyang'anye munu nzuruku, wala musinlongopere kinu. Muwe radi na nshahara wenu.”
