6 Fisirâ juhapire Maria motec roro dameŋ‐ticne maickewec.
7 Eme mârâc motec‐ticne rorâ qoruczi foŋkerâ bulimakao otoo râeme hurâ fowec. Ŋic jaŋe tomafic fusucmambiŋte ŋeŋe fofo basarâ bulimakao ficko ferâ ŋepic hâcne.
8 Eme hae mâreŋ ijaha ŋic tucne jaŋe ŋafe ira kecɋaŋ gieo lama jaŋere soŋaŋ ŋembiŋ.
9 Ŋehapie Wofuŋte aŋelo moczi jaŋerao fuame Wofuŋte oŋararaczi batamaec‐jopame mâretec hâwic‐jopawec.
10 Eme aŋelozi ʒiŋuc jazawec: “Ŋoŋe mi hâwic‐ŋopaoc, manaŋgopieŋ, no aŋac ʒeridâŋ bajukopac, irec fârine ŋic mâmâc sasawa fua‐ŋareocmu.
11 Miŋecgac Bâbâpiaŋ rune Wofuŋ Kristo hâcne, Dawidire haefuŋko fua‐ŋarekac.
12 Eme mutâcne‐ŋarepe mananiŋ: Ŋoŋe motec geune jâmbâŋ qoruczi foŋkekicne bulimakao otoo foha ra bâfuaniŋmu.”
13 Dâŋ iŋuc muhame izia sambâŋ momori gurune fufusuc jaha ututuŋ ŋelo âgo‐jeŋictao tumaŋnerâ ʒiŋuc muhuc Anutu muteŋkembiŋ:
14 “Ʒeri mumuteŋ Anutu faic sambâŋko, mâreŋko ŋic âgo jauŋ ejarekac jaŋerao wama fuakac.”
15 Aŋelo jaŋe sambâŋko risie fepie soŋaŋŋic jaŋe ʒiŋuc muhuc nazaŋ gazaŋ embiŋ: “Nâŋâc Betelehem haeo ferâ Wofuŋzi dâŋ nâzâkac irec fârine honenaŋ.”
16 Iŋuc murâ bâruŋ jaha ferâ Maria â Josefe bâfuac‐jofarâ motec geune bulimakao otoo fohame honembiŋ.
17 Honerâ motecte dâŋ biŋe manambiŋ i mufuambiŋ.
18 Eme soŋaŋ jaŋere mickonec binaŋ manambiŋ jaŋe warecke‐fârembiŋ.
19 Maria eki ine dâŋ i maŋkerâ manatâc qâtâc ehuc juwec.
20 Eme soŋaŋ jaŋe risierâ wiac hone manac embiŋ sâc manasurâ Anutu daŋge mumuteŋ ecnembiŋ.
21 Jesu motec fuarâ fohame ʒoaŋ gie bapa 8 eme motec sahacnao Wofuŋte ma bahuc ʒâŋene Jesu mumbiŋ. Ʒâŋe i motec e mi fuahame aŋelozi qanaŋ mufuawec.
22 Eme Mosere sâcmutâc dâŋ fowec, i reŋkehuc Mariazi bâtâcko juku sahac herâ Josefehec motec Jerusalem haeo baferâ Wofuŋte biŋe qapic.
23 Wofuŋte sâcmutâc dâŋ kecʒiŋuc fowec i hâcne sâsehuc epic: “Mârâc motec fuapie i Wofuŋte biŋe qafârezo.”
24 Erâ Wofuŋte sâcmutâc dâŋko hapâ jajahec me buni jajahec bâzi ririkere mukicne i wâc barâ rapic.
25 Jerusalem haeo ŋic moc juwec ʒâŋene Simeoŋ. E tiŋne â mitihec juhuc Israe ŋic jaŋerao bâbâmiriŋ fuaocte woŋec juwec. Ehame Tiri Mârozi maŋticnao ŋeŋe juju ehuc
26 dâŋ ʒiŋuc mufuacnewec: “Go mi hâmohaŋtecne Wofuŋ Kristo fuame honecmu.”
27 Ŋic e Mârozi ecneme taha ufuŋko fewec. Eme Maria â Josefe jahe sâcmutâc dâŋ reŋkehuc Jesu motec ijaha bafepire
28 Simeoŋzi motec hâporâ ʒiŋuc muhuc Anutu muafeckewec:
29 “O Wofuŋ sâko, ʒine hâcne ʒâŋe fâri‐nanezi goraonec bâbâpiaŋ honekopacte
30 go kiŋaŋŋicge no micdâŋgere sâcko râecnutec bumâteŋ fuaha rakopac.
31 Go bâbâpiaŋ i mâreŋ sâc ŋicne ŋicne jaŋe honeniŋte bâfuakomec.
32 Izi qâpuc jaŋere maŋ âke tamaekac â Israe ŋicfâcge jaŋere ʒâŋe biŋe bafaharekac.”
33 Motecte dâŋ iŋuc mume neŋgoc mamac jahecne manapire bipinehec ewec.
34 Eme Simeoŋzi jambuŋ‐jopahuc motec neŋgoc‐ticne Maria ʒiŋuc âzâcnewec: “Manakic, motec kecʒi erao Israe ŋic fâuckeniŋte mukicne, gâcne jaŋe erao hetakirerâ rândiŋke qa eniŋmu â gâcne jaŋe erao hesiŋnerâ fahareniŋmu, erâ aka‐jeŋic râekicnere ro waha âte boc ecneniŋmu.
35 Erâ gahacne wâc ʒikare busâqoc hâtânezi buheric bâfua‐garezokac. Waic iŋucne fuame ŋic bocjaha maŋjeŋicte fuŋne taniŋkeocmu.”
36 Eme miti ŋokac moc juwec ʒâŋene Hana. E Fanuere otâ, Ase ere tucne tofane. Naru‐ticnao ŋic barâ ehec juhame jara 7 eme hâmome
37 hozec erâ jufeku jara 84 bazurâ ŋokac qizec jâmbâŋ ewec. Ŋokac eki hâcne taha ufuŋko hati jurâ ju ehuc Anuture erâ sowa â nunumu gie bajujec.
38 Eme eki hâcne dameŋ ijaha taha ufuŋko fisirâ Anutu mumbiaŋkewec, â Jerusalem rune jaŋere fifirue dameŋte woŋec jumbiŋ, jaŋe Jesu motecte biŋedâŋ jazawec.
39 Maria â Josefe jahe Wofuŋte sâcmutâc dâŋ mukicne i efârerâ Galilaia mâreŋko Nazarete haeo risie rapic.
40 Ira juhapire motec e Anutuzi hone jauŋ ecneha soka sanaŋ ehuc mamana sâkohec ewec.
41 Maria â Josefe jahe jara sâc aakic hombaŋte Jerusalem haeo fejupirec.
42 Ehame Jesu motec jara‐ticne 12 bazume hombaŋte fefe dameŋ‐jeŋic maickeme jowapire mâmâc fembiŋ.
43 Ferâ juhapie hombaŋ tarame Maria â Josefe jahe Jesu motec hetarapire Jerusalem haeo juhame buc risiepic.
44 Risiehuc guru sâko jaŋehec biac bâniejec murâ hatao âgo wiacfâc‐jekic jaŋerao basa rahuc juhapire ŋafewec.
45 Jaŋerao basa‐bipierâ hae fureme mocwâc Jerusalem haeo risierâ ira basapic.
46 Basahapire gie bapa jahec â moc eme taha ufuŋko bâfuapic. Ira miti qaqazu jaŋere ŋondeŋko ŋehuc dâŋjeŋic manahuc fuŋnere mu wioc ejarewec.
47 Eme ŋembiŋ jaŋe mâmâc sasawa mamana‐ticnere â dâŋticnere wareckembiŋ.
48 Eme jaŋere ŋondeŋko hâcne ŋehame bâfuarâ wodâtâŋnepic. Ehuc neŋgocnezi ʒiŋuc âzâcnewec: “Ŋokâ‐mae, go wemocte iŋuc enâctekomec? Manakic, mamacgehec nâhe huacbuc ehuc basacguhuc jukoperec.”
49 Mume ʒiŋuc jasawec: “Weniŋuc erâ basacnuhuc jukopirec? No Mamac‐nanere gieo jupemurâ munarekicne, i manakopirec me?”
