20 Ndipo amakabusa wale adabwerera, acimbakuza na kupasa mbiri Mulungu pabzentse bzomwe adabva na kubziwona ninga momwe akhadauzidwira.
21 Pomwe mwanayo adapfitsa ntsiku zisere, adacita msinda wakucosa mcikuta, acimupasa dzina kuti ni Jezu lomwe anjo akhadam'pasa kale pomwe mamace akhanati kutenga mimba.
22 Panthawe ya msinda wawo wakutsukidwe ninga momwe ukhalewera mtemo wa Mozeji, azibaba wa Jezu adayenda naye kuJeruzalema kuti akamupereke kuna Mbuya,
23 (ninga momwe udanembedwa mtemo wa Mbuya kuti: “mwana wakuyamba kubadwa wacimuna bzin'funika kuti adzaperekedwe kuna Mbuya.)
24 acipereka pomwe ntsembe ninga momwe ukhalewera mtemo wa Mbuya kuti: “njiwa ziwiri ayai nkhangaiwa ziwiri.”
25 Akhalipo munthu m'bodzi kuJeruzalema, dzina lace Simiyau omwe akhali wakulungama na wakulemekeza kuna Mulungu. Iye akhadikhira Mulungu adzapepese Ijirayeri. Ndipo Mzimu Wakucena ukhana iye.
26 Mzimu Wakucenayo ukhamudziwisa kuti an'dzafa lini acisaya kudzawona Krixtu wa Mbuya.
27 Mzimu udamuyendesa kunyumba ya Mulungu. Pomwe adabwera azibaba wa Jezu kudzacita msindayo
28 ndipo Simiyauyo adamutesa mmanja acitenda Mulungu aciti:
29 “Mbuya, tsapano mulekeni nyabasa wanu ayende na ufulu ninga momwe limbalewera fala lanu!
30 Nakuti ndaciwona kale cipulumuso canu na maso yangu,
31 comwe imwe mudatumiza kumadzindza yentse ya pantsi.
32 Ni ceza kuna wanthu wakunja, mbiri kuna wanthu wanu wa kuIjirayeri.
33 Ndipo azibabace adadabwa na bzomwe bzikhalewedwa kwa mwanayo.
34 Pamwepo Simiyau adawasimba aciuuza Maliya mamace kuti: “Mwanayo an'dzagwesa ndipo acidzamusa pomwe wanthu azinji wa kuIjirayeri. An'dzakhala cizindikiro cakuti wanthu azinji an'dzalewana naco kuipa.
35 Na tenepo ndzeru za wanthu azinji zin'dzazimbuka padeca ndipo acidzaphayambo pomwe mtima wako ninga cisenga.
36 Akhalipombo mpolofeta wacikazi m'bodzi nkhalamba, dzina lace Yana, mwana wa Fanwere wa dzindza la Aseri. Iye akhadalowodwa acikhala magole manomwe yokha na bayace kucokera paudende bwace, ndipo akhali mamsiwa mpaka kupfitsa magole makumi masere na manai.
37 Ndipo iye akhacoka lini mnyumba ya Mulungu, acimbabzimana kudya na kumbacita mikumbiro nthawe zentse.
38 Panthawe yomweyo adafenderambo pamwepo acitenda Mulungu acilewa bza mwanayo kuna wentse omwe akhakhulupirira kudzawona ufulu bwa Jeruzalema.
39 Pomwe adakamala kucita bzentse bzomwe bzikhalewa mtemo wa Mbuya, iwo adabwerera kumui kumzinda wa Nazalee cigawo ca Galileya.
40 Ndipo mulumbwanayo akhakula acilimbika, acikhala na ndzeru ndipo Mulungu akhamusimba.
41 Ndipo azibabace akhambayenda kuJeruzalema magole yentse kucikondweso ca Paxikwa.
42 Pomwe iye akhana magole khumi na mawiri, adayendambo nawo kuJeruzalemako ninga momwe ukhali msambo wa cikondwesoco.
43 Pomwe cidamala cikondwesoco, iwo adabwerera kumui. Tsono mwanawo Jezu adasala kuJeruzalema. Ndipo iwo alibe kudziwa kuti iye wasala.
44 Iwo akhakumbuka kuti ali kubwera mmambuyo na andzace, ndipo adafamba ntsiku yentse. Adamunyang'ana kuna azibaba winango na anantsi,
45 tsono adamusaya, ndipo adabwerera pomwe kuJeruzalema.
46 Pomwe zidapita ntsiku zitatu, iwo adakam'bulukira mnyumba ya Mulungu. Iye akhadakhala pana apfundzisi wa mtemo acimbawatetekera na kuwabvundza.
