7 Aniꞌa raenaꞌa, 'Eḡe, Vaze Ubugaꞌe revonadu sauꞌa azaḡa evora riꞌiniꞌuma ebu sataurohiꞌuma, rehano mada uḡiduḡano bare ḡabode iḡuniꞌuma.'”
8 ꞌOuge reirotene, roḡaeroḡaeꞌa Iesuꞌa reiroteꞌe ḡoeꞌa zamariro.
9 Roḡaeroḡaeꞌa idu habaꞌanonoꞌo bare onaadu zeḡe mazao naginiꞌa fureraroteꞌe niduꞌa Iesu tahiꞌa 11 zu ane vaze nunu niduꞌa ziro.
10 Idu habaꞌa onamiroteꞌe roḡaeroḡaeꞌe Magadala roḡaeḡa niḡa Maria, ꞌahogaꞌe niḡa Ioana, Iakobo viꞌa niḡa Maria ebu roḡae nunu. Zeꞌe naginiꞌa fureranateꞌe apostolo azaḡa mazao rae fureniro.
11 Rehano Iesu tahiꞌatahiꞌaꞌa ze ḡoereꞌe ḡiriho hariḡa radu mene mae ḡihiniro.
12 U Petero ani iḡunadu idu habaꞌa dure onamiro. Aniꞌa ḡuḡuradu idu zamaḡa ḡianirotene, Iesu ahiri umiroteꞌe dabuaḡa daꞌo horoniro. Ebu ani naginiꞌa fureranateꞌe zamare ꞌadaꞌadeꞌenaꞌa, ne bare onamiro.
13 Eꞌe madaḡano roḡaeroḡae ḡoere igiroteꞌe azaḡa boꞌaḡano tahiꞌa ꞌaheuꞌa Emausa neḡa ibiḡa onaminu. Eꞌe neḡaꞌe Ierusalema habaꞌanonoꞌo ani faḡaꞌe 11 kilomita.
14 Anianine ibio onameꞌenaꞌa naginiꞌa fureranateꞌe ḡauḡa niduꞌa ḡoꞌane onaminu.
15 Zeḡeꞌa ḡoꞌane onameꞌenogano, Iesu aneꞌa zeḡe uhiḡa aradu idaḡa onamiro.
16 Zeḡe horoniro rehano, mene ederiro aꞌe Iesu, mazaḡa ze ani mene ederoga veize biriro.
17 Iesuꞌa ziro, raenaꞌa, “Ḡanine onameꞌenaꞌa, nagini ḡoꞌaneꞌohe?” Ebu ze vetuḡarauꞌenaꞌa tue edaro.
18 Ze boꞌaḡano vaze ꞌahoga niḡa Kuleopaꞌa naenaeniro, raenaꞌa, “Izidi Ierusalema habaꞌano naginiꞌa fureranataꞌaꞌe vaze niduꞌa edeḡa. Ḡaꞌe eꞌea radiunu rehano, ḡaꞌa daꞌo aḡuꞌahehe?”
19 Iesuꞌa zinaꞌa, “Naginiꞌa fureraneha?” Zeḡeꞌa ninaꞌa, “Aꞌe Iesu, Nazareta vazeḡa hariḡa. Badiꞌa zu vaze niduꞌa zamao ani peroveta vazeḡa raha. Aniꞌe haḡaiḡa gigiꞌa haḡainu zu ḡoere gigiꞌa haraminu.
20 Rehano Badiꞌa dibuꞌo hauꞌeteꞌe ḡihiꞌaḡaḡihiꞌaḡa zu vaze ibitoziniꞌeteꞌe azaḡaniꞌa Iesu manoga radu Roma gavana ꞌevorao riꞌiniro ebu satauroniro.
21 Emeꞌe ani Isaraela azaḡa agireonoꞌo mae vaḡiziꞌuma vazeḡa rae zamariro. Ebu Izidi Iesu rudaroteꞌe madaḡanonoꞌo onao mada uḡidu maha.
22 U eme boꞌaḡano roḡaeroḡae nuꞌa zaguzagufeha. Ze oheredaꞌo idu habaꞌa onameha,
23 rehano Iesu ahiꞌa mene horoneha. Ebu ze bare onaradu, raenaꞌa, 'Aneruꞌa emeḡe mazao fureranadu Iesuꞌe bare ḡabodeha rae raha.'
24 Emeḡe boꞌaḡano vaze nuꞌa idu habaꞌa onamatene, roḡaeroḡaeꞌa rateꞌe teige, ze zuni Iesu ahiꞌaꞌe mene horoneha.”
25 Iesuꞌa ziro, raenaꞌa, “Zaꞌe mene huhuzaḡa! Peroveta azaḡaniꞌa reiroteꞌe ḡoeꞌa mene ḡarihe mae ḡihineꞌohe.
26 Peroveta azaḡaniꞌa raenaꞌa, 'Kerisoꞌe ꞌouge aduga meꞌuma, ebu hena ḡabodadu ane haba agaḡano diuḡiuma.'”
27 Iesuꞌa Buka Zaḡoḡa zamaḡano Moseꞌonoꞌo onamo peroveta azaḡaniꞌa ani moneo mirihiroteꞌe ḡoeꞌa niduꞌa faine ihoze onamiro.
28 Ebu ze Emausa neḡa hanitiro, rehano Iesuꞌe ize ibio onamihi reiro.
29 Ze Iesu radoga radu uminiro, raenaꞌa, “Ḡorava raneha zu madaꞌe hauḡeha. Eꞌanoꞌo emeḡe teite bazihi!” ꞌOugadu ani zeḡe ne diuḡiꞌ onamiro.
30 Ani ogomu veize zeḡe teite ehoriro. Ebu beredi madu Badiꞌa mazao kuranadu vahege ziniro.
31 Eꞌe zamaḡano ubumazeꞌa bohatanadu 'Ahiꞌe Iesu!' rae ederiro. Rehano zeḡe ubumao ani dauḡiro.
32 Ebu anianine ḡoretitiro, raenaꞌa, “Ibio aneꞌa eme teite ḡoeratene zu Buka Zaḡoḡa huga meꞌodofeatene, zamafeꞌa matuꞌe rudaneha!”
33 Ebu tahiꞌa ꞌaheuꞌa Emausa neḡaꞌonoꞌo zogone iḡunadu Ierusalema habaꞌa bare itiro. Eꞌea Iesu tahiꞌa 11 zu zeḡe teite radiunuteꞌe vaze nu haniziro.
34 Ze raenaꞌa, “Hube hune Iesu ani bare ḡabodeha ebu Simona mazao fureraneha!”
35 ꞌOugadu tahiꞌa ꞌaheu eꞌeꞌa zuni zeḡe mazao Emausa ibiḡano naginiꞌa fureranateꞌe zu Iesuꞌa beredi vahegeꞌenogano Iesu ederateꞌe hariḡa meꞌodoziniro.
36 Ze harize meꞌodeꞌeteꞌe zamaḡano Iesuꞌa tabara zeḡe boꞌaḡano edaro, ebu raenaꞌa, “Zama roḡeḡa zae teite radoꞌi!”
37 Rehano zeꞌe ane vine horoneꞌohe rae zamareꞌenaꞌa, zaguzagaro zu rihau rudaro.
38 Iesuꞌa ḡadiziro, raenaꞌa, “Zaꞌe nougadu rihauꞌohe? Nougadu 'Ahiꞌe iniu?' rae zamare doudeꞌohe?
39 ꞌAhi eḡe! Eḡe ꞌevore zu oda ḡianoꞌi! Ebu obohe nuroꞌi! E vine reifone, modarehe zu isinehe oꞌoꞌa reifo. Rehano za horoheꞌeteꞌe teige, eꞌe modare zu isineheta.”
40 Ani ꞌouge radu ꞌevoreḡa zu odaḡa ihoziro.
41 Rehano ze matuꞌe rudanadu zaguzagaroteꞌe uꞌano, ze ize Iesu ḡoere mene mae ḡihiniro. Ebu Iesuꞌa ḡadiziro, raenaꞌa, “Zae mazao ogomu nu eꞌehehe?”
42 Zeḡeꞌa ḡozone kiroḡa harotene,
43 aniꞌa madu zeḡe ubumao aro.
