36 Ka alu to kuma wo kan, Isa bɔra gbɛ rɔ ie tɛma. A kan ko: «Alla ye hɛra kɛ ai yɛ.»
37 Alu bɛɛ barara ka silan kojuuya, baa alu tɛrɛ ye a jatela suu jiya kɔrɔ le ri.
38 Isa ka a fɔ ie yɛ ko: «Ai silanni nfenna? Ai sikani nfenna?
39 «Ai ye imadon n na ka n boloilu mafɛnɛ, a ni n senilu. Nde jɛrɛ le fasayi! Ai ye ai bolo maa n na. Bu ni kolo ye n na jɔ! Ni suu jiya kɔrɔ le, ai ri bu ni kolo yen wo la wa?»
40 Wo rɔ, a ka a boloilu ni a senilu yiraka ie la.
41 Wo kɛra sewa ko ba ri, kɔni alu kabannakoyani tɛrɛ kojuuya, haan ka ie kɔndafili. Sika tɛrɛ ye ie rɔ butun. Ka alu to miriya wo rɔ, Isa ka a fɔ ie yɛ ko: «Damunun fen tɛ ai bolo yan wa?»
42 Alu ka jɛɛ janinni do ta ka di a ma.
43 A ka a ta ka a damun ie bɛɛ ɲana.
44 Wo kɔ, a ka a fɔ ie yɛ ko: «Waati taminni, n tɛrɛ ye a fɔla ai yɛ ko fen fen sɛbɛni n na ko rɔ, wo bɛɛ ri dafa. Mɛnilu sɛbɛni Nabi Musa la sariya rɔ, a ni mɛnilu sɛbɛni nabiɲuma tɔilu la kuma rɔ, a ni mɛnilu sɛbɛni Jaburi kitabu rɔ, woilu bɛɛ ri dafa fewu.»
45 Wo rɔ, a ka hankili di ie ma, sa alu ri se ka Alla la kuma ɲa yen.
46 A ka a fɔ ie yɛ ikɔ tuun ko: «A sɛbɛni Alla la kuma rɔ ko Alla la Mɔɔ Ɲenematɔmɔnin di jakankata ka faa. Kɔni a faa tele sawana, a ri wuli ikɔ tuun.
47 A ri fɔ mɔɔilu bɛɛ yɛ Alla la Mɔɔ Ɲenematɔmɔnin tɔɔ rɔ ko alu ye tubi, kosa Alla ri ie makoto. A kibaro ri bɔ Jerusalɛmu yan ka jɛnsɛn jamana bɛɛ rɔ.
48 Ai ri ko woilu sereilu ri.
49 N Fa ka lahidi mɛn sidi ai yɛ, n di wo dafa lana ai ma. Wo rɔ, ai kana bɔ Jerusalɛmu so kɔndɔ fo sɛɛbɛ wo wa bɔ sanfɛ ka jii ai kan.»
50 Wo kɔ, a wara ie malɔ Betani so fan fɛ. A ka a bolo fila kɔrɔta ka duwawu kɛ ie yɛ.
51 Ka a to duwawu la, a kɔrɔtara ka bɔ ie tɛma ka wa sankolo rɔ.
52 Alu ka a bato, ka ban ka ie koseyi Jerusalɛmu sewa ba rɔ.
