3 Pilato ia i oimurini, i ene, “Oa Iudea edi Wasawasa?” Iesu ia arinana i heuio, i ene, “Oa u ene doha meta.”
4 Pilato abo i ribalau kohena lailaidi, eo tatao aridi eai, i ene, “Teina tau ta ena baaea nige ea lobai.”
5 Isi abo se ouialaiala ariri, si ene, “Eanua tataodi i heasiworeworedi. Galilaia i lauheata hetubu, eo eanua gamagamagari i laoma hinage ina eanua eai ta.”
6 Galilaia esana se atai, Pilato i ataiei, abo i hesio aridi eai, i ene, “Tau ta Galilaia tauna?”
7 Abo i nuatui Iesu Heroda ena tupo eai i laoma, arinai i hetamari Heroda arinai, Heroda wa nei huiana ne Ierusalema eai.
8 Heroda Iesu ie ita nuana i lolo ariri: nabada wa ena gadosisi bena ia i ita, paana ia wasana gamagaridi i ataiedio; eo ena nuatu i ene bena ena laulau gigibori esau abo i ita.
9 Riba gamagamagari aridi eai i hesiolau Iesu arinai: ia arinana nige i heuio.
10 Kohena lailaidi eo tauuriuri tataodi se toro ia se hegihegirudaoi.
11 Heroda, ma ena iala tataodi ia se isugaraei, eo se talatalawasiei, eo lulu balebalelemna esau ia se helui, ia abo se hetamari uio Pilato arinai.
12 Nei asubenana ne Pilato eo Heroda se awaheriam, nabada wa taudi labui se heiheisugara.
13 Pilato, kohena lailaidi eo babadadi eo eanua tataodi i eogagogoidi,
14 abo i ribalau aridi eai, i ene, “Ina tau ta au woeaiama arigu eai ta, au ene tatao i hegegewaridi: ia matamiu eai ana mata ea eoodadaasa eai, riba wa emi abahegiruna wa ina tau ta nige baaeana saha ea lobai:
15 nige’e, hinage Heroda nige i lobai: paana ede ea hetamarimiu Heroda arinai; nige mate laulauna esau i laulauei.
16 Ia abo ea lubilubini, eo ea eairigabaei.”
17 (Mataasi huiadi eai ne kamanidi, tau esau se eairigabaei.)
18 Ma esega se eogayogalau, si ene, “Ina tau ta au abiyawa, na Baraba au eairigabaeyama arimai eai.”
19 (Tau ta eanua i heasibuibuidi, eo i aiaiunu, arinai ia se tore numa masigiri eai.)
20 Pilato, bena Iesu i eairigabaeuioi, arinai i riba uio aridi eai.
21 Na isi abo se eogayoga, si ene, “Ia au hesatauroeawa, ia au hesatauroeawa!”
22 Ma haiona hinage i ribalau aridi eai, i ene, “Ie saha, baaea esana ie abi? Ena mate paana nige ea lobai: abo ea lubilubini, eo ea eairigabaei.”
23 Se samadudui ma arina lailaidi si ene ia bena se hesatauro. Isi arinadi eo kohena lailai arinadi abo se hebigawatai.
24 Pilato abo i heribadi isibom edi nuatu abo se abiyawa.
25 Tau wa se tore numa masigiri eai paana tatao i heasibuibuidi eo i aiunu wa i eairigabaei, isi edi gadosisi wa i lauwatai: Iesu i moselaei edi samadudu eai wa.
26 Isi Iesu se woealaei, Kurene tauna esau esana Simona se toai, ealeba eai i laolaoma, satauro se toresae ia dabaearona eai, bena i bahei Iesu murina eai i laulauwatai.
27 Tatao peledi lailai ia se lauwatai, eo sisine, isi hinage ia se doudoui, eo se laulaukaporei.
28 Na Iesu i torobui aridi eai, i ene, “Ierusalema nanatunayao sisine e, tabu au doudouigu, omibom au doudouuioimiu, eo nanatumiuyao au doudouidi.
29 Na asubenadi abo se lagema aridi eai abo si ene, ‘Isi sisine se agaagari, eo nige se haihaisu, eo susudi nige se hemahemadoedi, se lolo ede.’
30 Isi abo se ribahetubu oea tupidi aridi eai, si ene, ‘Au buima potamai eai’; eo oea tupi gagiridi aridi eai abo si ene, ‘Au bubulitawaimai.’
31 Paana ena teina ginauridi ta se ginauridi oeagi idaidaina eai, saha abo se abi oeagi kokoiagina eai?”
32 Tatao baaea labui hinage ia maenayao se woeaesegaidi se laedi bena se unuidi.
33 Isi se lage dimo wa arinai, ia ede esana se tore Moiyaru, metai ia abo se hesatauro tatao baaea labui wa maenayao, esau ia nima tutuna eai, eo esau ia nima seuseurina eai.
34 Iesu abo i ene, “Tamagu e, edi baaea ta u nuatugabaei; edi abiabi ta nige abina se ata.” Ana lulu se soi: kelero eai se ginauri.
35 Tatao wa se totoro se itaitalau. Tanuagayao hinage maedi ia se liuliuaei, si ene, “Hari tatao mo i hemauridi: ena ia Keriso, Eaubada i hineri, taba iabom mo i hemauriuioi.”
36 Iala tataodi ia hinage se liuliuaei, se laoma ia arinai vinega se helelesae arinai.
37 Eo si ene, “Ena oa Iudea edi wasawasa oabom u hemauriuioim.”
38 Uriuri esau hinage se urisae ia potana eai, Heleni, eo Roma, eo Heberu arinadi, si ene, “IA EDE TEINA TA IUDEA EDI WASAWASA.”
39 Tau baaea esau wa, se heabasi wa, Iesu i riba baaeaei, i ene, “Ena oa Keriso u hemauriuioim, eo ai taumai labui hinage u hemaurimai.”
40 Ana sagu wa arinana i heuio i ribasuui, i ene, “Eaubada nige u matausiei, eda mate esega ta hearo ta?
41 Ita ta mate i lolo; eda laulau maisana ia ede: teina tau ta nige ena baaea.”
42 I ribalau Iesu arinai, i ene, “Guiau e, oa u laoma em basileia u abi abo u nuatuigu.”
