Luka 23:17-53 in Gourmanchéma

¹⁷ Li den sua ke mi pendima jaanma kuli li tie tiladi Pilata n faabi kpaadi yenli ku niligu po.

¹⁸ Ku niligu kuli den taani ki tiani: “Teni ban kpa o joa na, ki faabi tipo Balabasa.”

¹⁹ Bi den kuani Balabasa li kadidieli nni kelima o den fiini mi janjanma u dogu nni ki go kpa o nilo moko.

²⁰ Pilata den bua ki faabi Jesu. Lanyaapo o go den maadi leni ku niligu.

²¹ Ama bi den tangi ki tua: “Joani o li dapoanpoanli po, joani o li dapoanpoanli po.”

²² Pilata go den maadi ba mi tataama ki yedi: “O tieni be yo ke li bia? Mii laa ke o tieni ya bonbiadila n pundi mi kuuma. Lanwani n baa teni ban pua o ki ŋa o.”

²³ Bi go den ñi ki tangi ki tua ke ban joani o li dapoanpoanli po, ŋali ke bi tantani den paadi Pilata.

²⁴ Lanyaapo Pilata den jia ti buudi ki kadi ke ban mia ban tieni Jesu yaala yeni baa tieni.

²⁵ O den ŋa ban den kuani ya joa li kadidieli nni keli mi janjanma po leni mi nikpama kuli po yeni nani ku niligu n mia maama, ki taa Jesu ki teni ba ke ban tieni o ban bua yaala.

²⁶ Ban den ñani Jesu likani ki caani o ki baan kpa o, bi den tuogi Silena dogu yua ke bi yi o Simono ke o ñani i kuani po. Bi den cuo o ki bugini o li dapoanpoanli wan ya bugi ki ŋua Jesu.

²⁷ Li nigocianli den ŋua o, bi siiga bi puoba den ye, ki pua bi bena ki mua Jesu po.

²⁸ O den jigidi ki yedi ba: “Yinba, Jelusalema puoba, da mua mani mini yaapo, ya mua mani yi ya yula po leni yi bila po.

²⁹ Kelima a dana baa ti cua ke bi baa yedi: 'Li pamanli ye leni mu poŋoalimu, yaaba n ki mali leni yaaba n ki ŋaandi biga kuli po.'

³⁰ Laa yogunu bi niba baa maadi leni a joaciama ki tua: 'Baa mani tipo,' ki go ya maadi a joabila ki tua: 'Hoagini mani ti.'

³¹ Kelima bi ya tieni ku dasoagigu yeni, bi baa tieni ku dakuongu mo lede?”

³² Bi go den gedini nikpaba lie ki baa taani ki kpa ba leni Jesu.

³³ Ban den pundi ban yi ya kaanu ku yukuokuogu, bi den joani Jesu li dapoanpoanli po, ki go joani bi nibiadiliediba a dapoanpoana po, yendo Jesu jienu po, o yua mo o ganu po.

³⁴ Jesu den yedi: “N Baa, tieni bipo sugili kelima baa bani ban tiendi yaala.” Bi den toani tiatia ki boagidi o tiayiekaadi.

³⁵ ku niligu den se li kani ki diidi. Jufinba yudanba den ñuadi Jesu ki tua: “O den ga nitoaba, o ya tie Kilisiti U Tienu n Gandi Yua, wan ga o yuli.”

³⁶ A minteela moko den ñuadi o ki cua o kani ki teni o mi ñinmiligima ki yedi:

³⁷ “A ya tie Jufinba bado ŋan ga a yuli.”

³⁸ Ya diani n tie na den taabi ki yiini o yuli po: One n tie Jufinba bado.

³⁹ Bi nibiadiliediba yaaba n den juani a dapoanpoana po yeni siiga yendo den sugidi Jesu ki yedi: “Haa tie U Tienu n Gandi Yua kaa? Ga a yuli ki nan ga ti mo.”

⁴⁰ Ama o lielo den funi leni o ki yedi: Haa jie U Tienu, fini yua n ta leni o joa naa?

⁴¹ Tinba yaapo, ya cuonu n tie na tiegi, kelima ti ga ti tuona panpaani, ama one naa tieni bonbiadilaba kuli.”

⁴² Lani o den yedi: “Jesu ŋan tiadi npo a ya ti cua ki diedi a diema nni ya yogunu.”

⁴³ Jesu den goa ki yedi o: “N waani a moamoani, ke dinla liga a baa ye leni nni ŋalijani.”

⁴⁴ Lan den bua ki pundi u yensicocolu ki yenga den biigi, ke li biigili tieni ki tinga nni kuli ki ya caa ŋali li yenlebidili.

⁴⁵ U Tienu diegu kpalidoaginkaabu den padi siiga nni ki boagidi boaga lie.

⁴⁶ Jesu den kpaani ki yedi: “N Baa, n teni n miali a nuu nni.” Wan den yedi yeni, o den fuo ki jiini.

⁴⁷ Minteela kobiga yudaano den laa yaala n tieni, o den pagi U Tienu ki yedi: “Moamoani, o joa na den tiegi lige.”

⁴⁸ Ya nigola n den taani likani ki diidi, n den laa yaala n tieni, bi den lebidi ki kuni ki pua bi bena.

⁴⁹ Yaaba n den bani Jesu kuli leni ya puoba n den ciani o ŋali Galile, den se ŋali foagima ki nua yaala n tiendi.

⁵⁰ Jufinba cancannikpeliba taancianli yaaba siiga yendo den ye ke bi yi o Josefi, ya nilo n ŋani ki tiegi,

⁵¹ ki tie Jufinba dogu Halimate yua. O den gu ke U Tienu diema n pundi. Waa den taani leni o lieba bi jagili nni, leni ban den tieni yaala kuli nni.

⁵² Laa joa den gedi Pilata kani ki mia o ke wan teni o Jesu o kpiemo.

⁵³ O den jiini li dapoanpoanli po, ki bobini o bu kpalipienbu, ki duani o li kuli nni. Li den sua ke bi kpiedi li kuli yeni ku tangu po ki daa duani kpiemo kuli lienni.

¹⁷ Mi pendima jaanma kuli, a yi luodi dansalyenga.

¹⁸ Ki bi niba yen kuli tandi maadi:... kpa man'o, ki luodi Barabasa!

¹⁹ Bi den luoni Barabasa kelima o den baadi yeni li ŋmadli o dogun i, k gɔ kpa o nulo.

²⁰ Ama Pilat den kpaani wan ŋa jesu k o buali bi niba

²¹ yabi se ki yigni yeni: ban kpaa o, ban kpaa o.

²² K o guani ki bual o, o tien be ki li dagdi yen ban kpaa o? N k la tagiliba k li dagdi yeni ban kpaa o, n bi cedi ban pua o, k ŋa o.

²³ Yeni, ki bi kuli tandi ki sua k ban kpaa o, ban kpaa o, ki bi tantandi biid Pilat pali boncianli

²⁴ Pilat ji den te juodi ki cabi, ki tieni bi buama.

²⁵ Pilat den cedi ki bi luodi o nikpali Barabasa, ki tugi yesu ki ten ba ban kpaani yua.

²⁶ Ban bo caa yen o, ki bi cendi Simɔ siren ja, k o ñani o kpaabu po, k bi niin o ki wan taani jesu ki wan bugi o dapɔnpɔnli.

²⁷ Bi niba boncianli bo ŋua o. Ki bi puobi fabni ki buudi o po.

²⁸ K o gbagi ki maadi ba:... jerusalem puoba, da buudi mani n po, ya mua mani i yula po yeni i bila.

²⁹ Kelima a dana baadi, k tie pamanli ya puoba ki pia bid, k tie ŋɔlmi, k kpeli ki ŋaani biga po.

³⁰ Li yogunu bi ba maadi a juaciama: “baa mani ti po”, ki gɔ maadi a juabila “legni mani po.”

³¹ Kelima bi ya tiendi dasɔngu mama ne, bi ji ba tieni dakuogu ledi?

³² Bi bo ba yeni bibiadmu lie, k bo bi taani k kpaa ba yen o.

³³ Ban bo pundi ya kaano, ki bi yi li: “yukpabgu”, bi kpaa jesu li dapɔnpɔnli po, wan yeni i bibiadmu lie yeni, yendi o ganga po, o lielo o jienu po.

³⁴ Jesu bo jaandi:... n baà, tieni sugli bi po, kelima bi ki bani ban tiendi yaali. A minteela den tɔni o tiadi, titia, ki bɔgdi bɔgdi.

³⁵ O nuwuligu den se ki nua li kuli. k cedi o dogu yudanba den ñuadi k sua:... wan ka den fabi bi niba, wan ji fabi oba, o ki yedi k o tie U Tienu n lugdi yua kaa!

³⁶ A minteela mɔ den se ki la o. B den nagni ki ten o, li damilma,

³⁷ ki maadi:.. a ya bani k a tie suifinba bado, fabi a yuli!

³⁸ Bi den diani ki tabni o yuli po k sua: “o ne tie Suifinba bado.”

³⁹ I bibiadmu siiga, o yendi den sugdi jesu ki maadi a ki tie U Tienu tondo kaa? (U Tienu n lugdi yua)

⁴⁰ O lielo den ŋmian o:.. a ki jie U Tienu?

⁴¹ tinba wan dagdi yenli: ti pa, ti biid panli, ama, o nulo ne ki pia tagiliba kuli.

⁴² K o pugni ki maadi:... jesu, ya tiani n po, ya yogunu k a do a baa kani

⁴³ Ki jesu maadi o:... yen i mɔni, dine mɔno, a baa ye yen n aljada n,

⁴⁴ Li den tie yensiinu nni, k u dogu kuli gaa ki bondi, li bonbonli den waagi nani kudi ta yeni.

⁴⁵ O Yienu ji dee nua, k o jaandiegu cabciangu padi siiga nni.

⁴⁶ Yeni ki jesu yigni:... n baa, n kubndi n naano a nugu nni. Wan maadi ki gbeni k o kpe.

⁴⁷ Rom minteelkpeli n la li kuli k o dondi U Tienu k maadi:... yeni i mɔni, o ja ne bo tie U Tienu biga.

⁴⁸ Ban den la yaali n tieni kuli, o nuwuligu den lebdi ki kuni ki pua bi pala po.

⁴⁹ Jesu donlinba yen bi pua yaabi n den ŋua jesu hali Galile den se fagma ki diidi li kuli.

⁵⁰ Ja ba den ye ki bi yi u Sosef, o bo tie suifinba taanli yua, o den ki pia tagiliba kuli,

⁵¹ o den ki cengi bii ki tie Suifinba n suani yaali kuli. O den maani ki caa Arimate yen Sude dogun ki gu U Tienu baama.

⁵² O den gedi ki mia Pilat jesu gbanu(o kpiemo).

⁵³ Wan den jiin o li dapɔnpɔnli po, k o finfin o a caba, ki duan o li kuli nni. Naani k ba baa ki pi kpiemo daan.